ERMIYAASI 52 - Qullaawa Maxaafa

YERUSAALAME UBBANNO GARA

¹ Sedeqiyaasi Yihudaho moohinohu 21 dirisinniiti; isi Yerusaalame teesso assi're Yihuda 11 diro gashshino. Amasi su'mi Hamuxaliiti; annise Ermiyaasi Libina Katami manchooti.

² Alba moote Iyoaaqeemi assinonte gede, Sedeqiyaasino Kaaliiqi albaanni busha coye assino.

³ Kunnira, Kaaliiqi Yerusaalametenna Yihudu manna albisinni shorre huni. Moote Sedeqiyaasino Baabilooni moote Nabukadanatsoorira mokkookki.

⁴ Sedeqiyaasi moohihunni honsikki diro tonnikki aganira tonnikki barra, Nabukadanatsoori olantosi adhe daye Yerusaalame qasara doyisse amadi. Olantosino katama gaangeessite huxxu qooxeessira bushsha tuultu.

⁵ Kunni garinni Sedeqiyaasi moohihunni honsikki dirinni kayise tonaa mitikki diri geeshsha doyissite keeshshitu.

⁶ Hakko diro shoolki aganira honsikki barra, mannaho itannori goofeenna hude batidhu.

⁷ Diinu olanto huxxa dhoosse e'uta, Yihudu olanto hashsha fulte ba'u. Baabilooni olanto agarte heedheennanni, lamenka huxxa xaadisanno waalchi widoonni mootete gati muleenni higge Yordaanoosi Lagi widira higge hadhu.

⁸ Ikkollana Baabilooni olanto Sedeqiyaasi shorrite Iyyaarko mule noo xawira amadde qafaddusi; gaaddosi baalanti iso hunte xooqqu.

⁹ Isono Nabukadanatsooriwa haadhe massitu. Hatte yannara Nabukadanatsoori Hamaati gobbara Ribila yinanni katamira no. Sedeqiyaasirano bunshesi daafira erecco kari.

¹⁰ Hakkiicho Ribila illesi la'anna oososi shinanni gede assi; Yihudu gashshaanono shiishiishi.

¹¹ Hakkunni gedensaanni Sedeqiyaasitano ille giddonni fushshite lekkasira quwe gante Baabilooni haadhe hadhusi. Reyanno barri geeshshano hakko Baabilooni usuranya ikke hee'ranno gede assisi.

QULLAAWU MINI DIIGAMA

¹² Nabukadanatsoori moohihunni tonaa honsikki diro ontikki aganira tonnikki barra, mootete mini agaraasine roorrichi Nabuzardaani Yerusaalame ei.

¹³ Qullaawa Mine, mootete minenna Yerusaalamete hee'rino manna jajjabbunnitera giira qasi; wole qara qara minnano giire huni.

¹⁴ Olantosino Yerusaalamete huxxa diiggu.

¹⁵ Nabuzardaani gobbansa gibbe Baabiloonootu ledo heedhannore, angate ogimma afidhinorenna gama buxane ikkino manna qafade haa're ha'ri.

¹⁶ Horo buxxinore kayinni hakkiicho dargaho agurino. Insa woyinete kaashsho shuquntanno gedenna baatto hawuurtanno gede assino.

¹⁷ Baabiloonootu Qullaawa Mine noota camotenni seekkinoonni tuuqqa, uduunne aanaho worrannire lekka afi'rinorenna camotenni seekkinoonnita waa worrannita jawa gawate hiiqqaqqitu. Camo baala kayinni Baabilooni adhite hadhu.

¹⁸ Kerra, qarawa, buluulo fushshinannire, xiltaame saannanna mooqquwa, qoleno camotenni seekkinoonniha Qullaawu Mini uduunne baala adhite hadhu.

¹⁹ Nabuzardaani xiltaame saanna, hixaana giirrannire, xiltuwa, kerra, caabbicho worranniha, mooqquwa agattote fushshaate shiqinshannirenna culkunninna birrunni seekkinoonni uduunne baala adhe ha'ri.

²⁰ Moote Selemooni Kaaliiqi Minira ikkanno gede seekkisiisino uduunne: 2 tuuqqa, uduunne aanaho worranniha lekka afi'rinoricho, 12 bootu suudinni seekkinoonnita wayinnita jajjabba camote gawatta aanaho worrannire baala adhe ha'ri. Kore baala seekkinoonni camo lowota ikkitino daafira keenne dila'noonni.

²¹ Lamunku tuuqi mittu suudinni seekkinoonniho. Mittu mittunku seendille 18 cigile, du'mille 12 cigile ikkitanno; tuuqqano giddo boombete; tuuqqate gooro du'millino taakkote darateeti.

²² Lamenka tuuqo umo camotenni seekkinoonni. Hojja 5 cigile assine meemmotenna shaffote suudinni seesiinsoonni.

²³ Mittu mittunkura 100 shaffo noonsa. Kuri giddonni 96 shaffo uulla hee'neennanni leeltanno.

YIHUDU MANNA BAABILOONI HAA'NE HA'NI

²⁴ Nabuzardaani qeesootu roorricha Seeraya, isi hoodeha qeesicha Soffooniyaasinna wole 3 Qullaawu Mini roorroota amade haa're ha'ri.

²⁵ Katamu gaaddo hajajaancho, hatte yanna geeshsha katamaho keeshshitinore 7 mootete amaalaasine, olantote haja borreessannoha olu hajajaanchi hoodehanna wole 60 jajjabba manna haa're ha'ri.

²⁶ Konne manna baala Hamaati gobbara Ribila katamira noohuwa Baabilooni mootewa haa're ha'ri.

²⁷ Mooteno hakkiicho gansiise shettotenni reyitanno gede assi. Yihudu manni gobbansanni kunni garinni qafadame ha'rino.

²⁸ Nabukadanatsoori qafade haa're ha'rino manni kiiro aante noote: moohihunni lamalki diro 3,023 manna qafadino.

²⁹ Moohihunni tonaa settikki diro, 832 manna Yerusaalametenni,

³⁰ qoleno moohihunni lemiina sayikki diro, 745 manna Nabuzardaani qafade haa're ha'rino. Qafande haa'ne ha'noonni manni kiiro mitteenni 4,600.

³¹ Moote Ewili-Merodaaki Baabilooni moohi yannara, Yoakiini qafadamihunni sajjiina lamalki diro, tonaa layinki aganira lemiina ontikki barra usurunni tirisi.

³² Isi Yoakiinira dancha coye assinosi. Isi gede qafadante Baabilooni heedhino mootoolla baalantenni roore ayirrado darga uyinosi.

³³ Yoakiini usuru mini imaana soorri're, reya geeshsha mootete ledo itanno gede assinoonnisi.

³⁴ Lubbotenni hee'ri geeshsha barru barrunkunni hasiisannosire baala uyinannasi hee'rino.