ERMIYAASI 47 - Qullaawa Maxaafa

FILISIXEEMETE KULLOONNI HIMANA

¹ Gibitsete moote Gaazaho bala tugara albaanni Filisxeemootu daafira Kaaliiqi,

² «Kune wayi aliyyenni kae, wo'me dayinohu gede ikke lolahanno; baattonna aanase noore baala, katammanna giddonsa noo manna baala egemmanno. Mannu baalu kaa'lote raaranno; baattote aana noohu baalu hururame wi'lanno.

³ Gulunfanni faradi hirbi, lami-qalete luulinna, faradi gaarete gugatto masisseenna wolqansa ba'ino daafira, annuwa oosonsa nafa caaqqi yite dila'anno.

⁴ Kuni ikkannohuno, Filisxeeme ba'annoti yanna daggino daafiraati. Reyotenni gatte Xiroosinna Sidoona kaa'litannori baalu, murantanno yanna iillitino. Ani Kaaliiqi, Kereeti Giddichonni dagginore, Filisxeemete ga're baala gudeemmo.

⁵ Gaazu manni manchite umo meexxanno; Asiqeloona mannino beeshshi're sammi yaanno. Gattino Filisxeemooti, bisonsa huduuxxitanni manchittannohu mamooti geeshshaati?

⁶ ‹Kaaliiqi bise! Murmuratenni fooliishshi'rattahu mamooteeti? Eeggakkiitina koikki giddora higge fooliishshi'ri› yitinanni raartinanni.

⁷ Ani Asiqeloonahonna baaru gama, hee'ranno manna guddanno gede hajajoommona, ani yoommore wonshitukkinni hiitto ikkite higganno?» yee kulinoe.