ERMIYAASI 3 - Qullaawa Maxaafa

ISRAEELETE MANNI MAGANOHO AMMANAMA HOOGI

¹ Kaaliiqi, «Mittu manchi galtesi ha'riseenna, iseno hadhe woleho assidhuhu gedensaanni galagale galtesi assi'rara dandaannoni? Hatto assiro baatto batteessanno. Ati Israeele kayinni lowo ella ledo foorootta; xa kayinni galagalte ane Kaaliiqiwa higa hasi'rattani?

² Hanni hakka gaaru widira qolte lai; kaphu magannakki ledo fooroottakki dargi nooni? Mulqi'rara dubboho maaxame agaranno addi-fuli gede, atino doogote gama ofolte ellase agadhitanno mancho gede bunshekkinninna ammanama hoogakkinni baatto batteessootta.

³ Kunnira, badheessinna hawadi xeeni dirrannokki gede hooloommo. Ati kayinni foortanno mancho gede saaliweelo ikkootta.

⁴ «Xa kayinni, ‹Anna'ya, anje'yanni kayisse elo'ya,

⁵ hanqoottoe gedeennilla hee'ratto?› yite coyi'rootta. Ikkollana hasi'rootta bunshe baala assootta» yii.

ISRAEELENNA YIHUDU MANNI AAGINTAAWA HASIISSANNONSA

⁶ Iyosiyaasi moohe noo yannara Kaaliiqi anera, «Ammana xe'inoseti Israeele assiture afitto? Ise anewiinni baxxite seeddaanna ilaallanna lowiddaanna sinna batidhino haqqe baalate hunda marte foortino.

⁷ Konne baala assituhu gedensaanni, galagalte anewa higgannoha lawinoena, kayinnilla galagalte dihiggino. Mittoreno hexxinannikkiti rodoose Yihudu konne coye baala affino.

⁸ Israeele anera ammanama hoogge foortino daafira, fushshe ha'risoommo. Dogaancho rodoose Yihudu kayinni diwaajjitino; ise umiseno qolte foortannota ikkitino.

⁹ Horonta disaalfattino; kinchonna haqqa magansidhanni baatto batteessitino.

¹⁰ Konne baala assituhu gedensaanni dogaancho Israeelete rodoo Yihudu, galagalte anewa higginohu digodowinniitina goowi alinniiti. Konne coye coyi'roommohu ani Kaaliiqaati» yiie.

¹¹ Kaaliiqi, Israeele isiwiinni baxxite sao assituro nafa, dogaancho Yihuduwiinni woyyitannota kulinoe.

¹² Xa aliyye widira ha're Israeelete mannira, «Ammanantinannikki Israeele, ane Kaaliiqiwa higge! Ani maaro batidhinoha ikkoommo daafira dihanqeemmo; ki'nera hegere geeshsha hanqoommo gedeenni dihee'reemmo.

¹³ Ki'ne sao'ne calla ammanne; ane Magani'ne Kaaliiqira haxawarra'nera, wole manni gobba maganna kaphunnite ledo, jajjabba haqqe hunda foora'neranna, hajajo'ya agadha hooga'nera aagintaabbe. Konne coye coyi'roommohu ani Kaaliiqaati.

¹⁴ Ki'ne hexxinannikki manni, ani Mooticha'neetina ane Kaaliiqiwa higge! Ani ki'ne mereerinni, mittu mittu katami giddonni, mitte mittente maate giddonni lame lame doodhe, Tsiyooni Ilaaliwa haa're masseemmo.

¹⁵ «Ani egennaamma gashshaano dooreemmo'ne; insano danchu allaalaanchi gede assite massagganno'ne.

¹⁶ Hatte baattora mannu kiiro batidhanno yannara, baattote aana gondooru taabooti'yare kayisannohu dihee'ranno. Hakkunni gedensaanni isire diheddanno; hasidhannokki daafira wole seekki'rateno dihasidhanno.

¹⁷ Hatte yannara, Yerusaalame, ‹Ayirrado Kaaliiqi barcimaati› yinanni. Mannu ane magansi'rara, gashshootu baalu giddonni hakkiira gamba yaanno; hakkunni gedensaanni hettisamaanchunna bushu wodanire di"ikkitinanni.

¹⁸ Hakka waro Yihudunna Israeelete manni mitteenni aliyye widoonni noo gobbara qafadaminowiinni daanno; akaakkansara hegerera iqqa asse oommonsa gobba galagale higanno» yeemmo gede kulino.

MAGANU MANNA CUBBUWIINNI HIGANNO GEDE WOSHSHI

¹⁹ Kaaliiqi, «Ani ki'ne Israeelete manna, ooso'ya gede asse dogisiiseemmo'ne. Gobbate aana lowo geeshsha biiffinotanna, shaqqado baatto aammo'nera halchoommo; anna'ya yitine woshshitinaeranna, kunni ka'ano anewiinni horonta badantinannikki gede hasi'roommo.

²⁰ Ki'ne kayinni, ayiddaannase agurte hadhino mancho gede ikkitinoonni; ammanama hooga'nenni ane agurtinoonnie. Konne coye coyi'roommohu ani Kaaliiqaati.

²¹ Ilaalu aana raare macciishshinanni; tini raareno Israeelete manni cubbo loosanni, ane Kaaliiqa Maganonsa agure hee're, xa kayinni gaabbe raaranni noo raareeti.

²² Ki'ne ammanama noo'nekkiri baalu anewa higge! Ani hakkiinni gatise ammanantinoonnire asseemmo'ne» yii. Ki'neno, «Maahoyye, ati Kaaliiqi Maganonkeetina, atewa hingeemmo.

²³ Halaalinta gaarrate birxe fulle, kaphu maganna magansi'ranke mittoreno dileddinonke. Israeele gatisattohu Maganinke Kaaliiqi ate callaati.

²⁴ Tini saalsiissannoti kaphu maganna, akaakkanke daafurte gamba assitino jajja baala guddino. Ninkeha, ge'reewonke, lalonke, labballi oosonkenna seennenkeno guddino.

²⁵ Ninkenna akaakkanke ate agurre, cubbo loosankenni ate Maganonke Kaaliiqa dadillinsoommo; hajajokkino diwonshinoommo. Saalanke duqqine, shollinyenkeno imaanimma uddi'noommo» yitinanni.