ERMIYAASI 26 - Qullaawa Maxaafa

HIMANISI DAAFIRA ERMIYAASI SHAATE MALLOONNI MALA

¹ Yihudu moote Iyosiyaasi beetti Iyoaaqeemi moohanni hee'reennanni Kaaliiqi,

² «Qullaawu Mini nafarira uurrite, Yihudu katamma baalantenni magansi'rate daggannorira baalaho yoommohere mittoreno gatisittokkinni kulinsa.

³ Miteekkite macciishshite, busha doogonni agurte higgannoha ikkannona. Anino hedoommonsaha busha coye agureemmo» yii.

⁴ Kaaliiqi mannaho, «Ani Kaaliiqi yoommota macciishsha gibbinironna oommo'ne seera wonsha hoogginiro,

⁵ soqqamaano'ya himanaano kultino'ne coye macciishsha gibbiniro nafa, ani kayinni insa marro marro hige soommo'ne.

⁶ Yoommota ikkitinannikkiha ikkiro, konne mine Seelo assummo gede asseenna konne katamano baattote aana noo gosa baala rumonniha assite kiirtanno» yii.

⁷ Qeesootu, himanaanonna mannu baalu ani Qullaawa Mine hee're konne coye coyi'ranna macciishshitu.

⁸ Kaaliiqi kulinoere baala coyi're gudanni hee'reennanni, «Ati shinanniho!

⁹ ‹Kuni mini Seelo gede ikkanno. Kuni katamino mullichonna ona ikkanno› yite Kaaliiqi su'minni mayira coyi'ritto?» yitinoe. Mannu baaluno daye gaangeessie.

¹⁰ Yihudu roorrootino konne coye macciishshite gashshootu mininni ka'e Qullaawu Minira dagge haaru e'nanni xullichira ofoltu.

¹¹ Qeesootunna himanaano, albisootahonna manna baalaho, «Kuni manchi coyi'rinore ki'ne baalunku macca'nenni macciishshitinoonni. Kataminkera busha coye himanino daafira reya hasiissannosi» yite coyidhino.

¹² Ani Ermiyaasino roorrootahonna manna baalaho, «Kunni kataminna kunni mini daafira macciishshitini himana kuleemmo'ne gede Kaaliiqi soyinoe.

¹³ Xaano, doogo'nenna looso'ne agurtine, Magani'ne Kaaliiqi yiino gede ikke. Hakkunni gedensaanni, Kaaliiqi hedino bao aana'ne diabbanno.

¹⁴ Ani kayinni kune anga'ne noommona, ki'nera danchanna halaale lawe leellino'ne gede asse"e.

¹⁵ Ikkollana, konne coye kuleemmo'ne gede soyinoehu Kaaliiqaatina, assoommori nookki beebbaataamo shitine umi'nera, kunni katamiranna konne noo manni baalunkura shede abbidhinoonte» yoommo.

¹⁶ Roorrootunna mannu baalunku, qeesootahonna himanaanote, «Kuni manchi Maganinke Kaaliiqi su'minni coyi'rinona, reya dihasiissannosi» yitu.

¹⁷ Gobbate geerrino kae, gamba yee noo manni baalunkura,

¹⁸ «Morisheeti Katamihu Mikiyaasi Yihudu moote Hiziqiyaasi yannara himanaanchoho. Isino Yihudu manni baalunkura, Olantote Mootichi Kaaliiqi, ‹Tsiyooni loosi'nanni gati gede ikke hawuuramanno; Yerusaalameno diingoonni duuno gede ikkitanno; Qullaawu Mini noo gaarino dubbo ikkanno› yee coyi'rino.

¹⁹ Moote Hiziqiyaasinna Yihudu manni Mikiyaasi shiinosiyya? Hiziqiyaasi Kaaliiqa waajjino; baxillesi afi'rara huucci'rino. Kaaliiqino abbara hedino bao aaninsanni hoolino. Ninke kayinni, uminke aana shetto abbi'nammoraati» yitu.

²⁰ Qiriyaati-Yiariimi Katamira hee'rannohu mittu Shemaiya beetti Ooriyo yinanni manchi no. Kuni manchino Ermiyaasi kunni katamiranna kunni gashshootira bao daggannota Kaaliiqi su'minni himanino.

²¹ Moote Iyoaaqeemi, wolootu ayirraddunna gaadaannuwa Ooriyo coyi'rinota macciishshitino. Moote shaasira hasi'reenna waajje Gibitsete gobba xooqino.

²² Ikkollana, Moote Iyoaaqeemi haa're abbanno gede Akiboori beetto Elinaataani wolu manni ledo Gibitse soyino.

²³ Insano Ooriyo Gibitsetenni abbite moote Iyoaaqeemiwa massiteenna, shee doogote aana madaarranni gede assino.

²⁴ Saafaani beetti Ahiqaami gargarinoe daafira shitannoerira sayise diuyinoe.