ERMIYAASI 22 - Qullaawa Maxaafa

^1-2 Kaaliiqi, Daawiti sircho ikkinohuwa Yihudu mootewa, ledosi gashshaanowanna mannu baalunniwa soye,

³ «Taalonna halaale loosse; ku'u ko'onne gawajjannokki gede agarre. Manni gobba manna, annanna ama afidhinokkirenna galte shii'rino meento gadadissine tootayyeessitinoonte. Tenne gobbara beebbaataamu manchi mundee duntinoonte.

⁴ Yoommo gede assitiniro, Daawiti darga amaddino mootoolla ledonsa gashshaanonna mannu dukkiseenna faradi gaarensara ofolte konne mootete mini waalchi widoonni higge e'anno.

⁵ Hajajoommore assa hoogginiro kayinni, halaale kuleemmo'nena, kuni mini diigamanno. Konne coye coyi'roommohu ani Kaaliiqaati» yii.

⁶ Kaaliiqi Yihudu mini daafira coyi'ranni, «Yihudunnihu mootete mini, Geleaadi woy Libaanoosi birxe gedee ayirradooti. Ani tuge agureemmosi woyite kayinni, mullicho ona katama ikkanno.

⁷ Bagado anga adhitinore, guddanno'nere soyemmo; insano danchu daguwita tuuqqa'ne murmurte, giirate tugganno.

⁸ Hakkaanni hige sa"annohu wole gobba manni, ‹Kaaliiqi kunni lowo katamira tenne bao mayira abbi?› yee mimmito xa'manno.

⁹ Insarano, ‹Togo assinonsahu, Maganinsa Kaaliiqi gondooro agurte wole maganna magansidhinohuranna hakkurira soqqantino daafiraati› yine kullanni» yii.

ERMIYAASI SHALUUMI DAAFIRA KULINO HIMANA

¹⁰ Yihudu manna! Moote Iyosiyaasira wi'litinoonte; hatteentenni ilamino gobba galagale higannokkihura, beettisira Shaluumira wi'le.

¹¹ Annisi darga moohinohu Iyosiyaasi beetti Shaluumi daafira Kaaliiqi, «Kawiinni ha'rino; kunni ka'ano kawiira dihiganno.

¹² Qafadame ha'rinowa reyanno; tenne baatto layinkimeeshsho illetenni dila"anno» yaanno.

ERMIYAASI IYOAAQEEMI DAAFIRA KULINO HIMANA

¹³ Loosinosi mannira mittoreno uyikkinni, doogi-male mine minsiisi'rannohura, taalo coye assikkinni, minu aani mine minsiisi'rannohura aanne'e!

¹⁴ Kuni manchi, «Aneneete hala'ladu minu aani mini nooha, jawa mine mi'noommo» yaanno. Kunnira jajjabba masikootta wodhanno; daguwunni seesiisanno; danano duumo asse biifisanno.

¹⁵ Wolu manninni roorsite daguwunni mi'nakki, roore moote assitannoheni? Annikki dirosi wo'ma hagiirraamo ikke hee'rino; isi wo'manka woyite halaalaanchonna, taashshannoha ikkino daafira, baalunku coyi qiniinosi.

¹⁶ Buxanetenna gadadaammaho halaale fushshannoha ikkino daafira, baalunkuri injiinosi; ane Kaaliiqa afate yaa, hattooti.

¹⁷ Ati beebbaataamo shaanna, manna gadadisalla egennootto; illekkinna wodanikki hanaaqunni jiro gamba assi'ralla hassanno.

¹⁸ Kunnira, Iyoaaqeemi! Reyatto barra wi'lannohehu dihee'ranno. « ‹Moote'ya, baittoe! Gashshaanna'ya hoogummohe› yaanni, wi'lannohehu dihee'ranno.

¹⁹ Reeshshakkino uulla goshoonshanna sholle, Yerusaalamete waalchira gobbaanni tungeenna, harrete reeshshi gede ikke gatanno» yii.

ERMIYAASI YERUSAALAMETE DAAFIRA KULINO HIMANA

²⁰ Olu miilla'ne baala qeelantinona, Libaanoosi Ilaalla gidditine raarre. Baasaani gobba hadhine «Woo!» yiiyye; Moaabi Ilaalla gidditine raarre.

²¹ Keere heedhinoonni waro, ani seejjoommo'ne. Ki'ne kayinni dimacciishshitinoonni; techo geeshsha hattennenni heedhinoonni; ani yoommota gibbinoonni.

²² Loossinoonni cubbi daafira, gashshaano'ne bubbe fiite haadhe hadhanno kuri gede ikkitanno. Olu miilla'neno qafadante manni gobba hadhanno; saalunna shollinyu amadannonsa.

²³ Ati Libaanoosinni abbinoonni daguwinni minnoonni mine hee'rattohu, iltanno mancho amaddanno game gedeeti amaddannohe woyite, hiitto ikkite uratto ikka?

ERMIYAASI YOAKIINI DAAFIRA KULINO HIMANA

²⁴ Kaaliiqi Yoakiinira, «Yihudu moote Iyoaaqeemi beetto Yoakiini halaali'ya afanna mootimma'ya wolqaha qiniitichu angichi cuue'ya ikkittorono fushshe tugeemmohe.

²⁵ Shitahera hasidhannorinna waajjattori angara Baabilooni mootera Nabukadanatsooriranna olantosira sayise eemmohe.

²⁶ Atenna amakki, ilantinoonnikkitera manni gobbara masse huneemmo'ne; lamunku hakkiicho reyitinanni.

²⁷ Tenne gobba sinsinnaabbinanni; kayinnilla galagaltine dihigginanni» yii.

²⁸ Anino, «Kuni manchi Yoakiini, hiiqqamino gambayichi gede, tugame gatasiitini? Isinna oososi egentinokki gobba, qafadante hadhuhu hada iseraatini?» yoommo.

²⁹ Baatto! Baatto! Baatto! Ani Kaaliiqi coyi'reemmore macciishshi:

³⁰ Kuni manchi ilaweelu gede ikke gatino; heeshsho qiniitinosikki manchooti. Daawiti gashshoote ragi're, ilasi giddonni Yihudaho moohannohu dihee'ranno. Konne coye coyi'roommohu ani Kaaliiqaati.