ERMIYAASI 13 - Qullaawa Maxaafa

SHAALADO SHALONNI GANNOONNITA GIDDOYIDI UDDANO

¹ Kaaliiqi, «Hadhe shaalado shalonni gannoonnita giddoyidi uddano hidhite qodhi; tenne uddano wayi kisoonke» yiie.

² Anino Kaaliiqi yiinoe garinni giddoyidi uddano hidhe qodhoommo.

³ Kaaliiqi qole,

⁴ «Hidhoottota giddoyidi uddano haadhe Efiraaxisi Wayiwa massite kinchu dadhamme giddo maaxi» yiie.

⁵ Anino Kaaliiqi hajajinoente gede giddoyidi uddano masse Efiraaxisi Wayi mule maaxoommo.

⁶ Lowo barri gedensaanni Kaaliiqi, «Efiraaxisi Wayiwa massite maaxi yuummoheta giddoyidi uddano marte haa'ri» yiie.

⁷ Anino Efiraaxisi Wayiwa mare uddano maaxoommo darginni ume fushshoommo; uddanono tatta'e mitturirano kaa'litannokkita ikkitino.

⁸ Kaaliiqino coyi'ranni,

⁹ «Ani yeemmoti: Yihudunnitanna Yerusaalamennita lowo boo'na co'o asse huneemmo.

¹⁰ Tini busha gosa yoommota gibbannori, haxo mokkookkitinori, wole maganna magansi'rate hoodensa hadhannori tenne uddano gede mitturirano kaa'litannokkire ikkitanno.

¹¹ Giddoyidi uddano halloho hossannonte gede, Israeeletenna Yihudu mannino anewa gamba yaara hedoommo. Tenne hedoommohuno manna'ya ikkitanno gede, galattannoenna ayirrissannoe gedeeti. Insa kayinni ani yoommota dimacciishshitino» yii.

WOYINETE XAJJE WORRANNI GOOGIDE

¹² Kaaliiqi Maganu, «Ermiyaasi! ‹Googidda baalantera woyinete xajje wo'mitino› yite kulinsa. Insano, ‹Googidda baalate woyinete xajje wo'mitinota anfoommokkiha lawinohe?› yitannohe.

¹³ Hakkunni gedensaanni ani Kaaliiqi tenne baattora heedhannore baala, Daawiti darga amaddino mootoolla, qeesoota, himanaanonna Yerusaalamete heedhannore baala woyinete xajjenni dimbitanno gede asseemmo.

¹⁴ Aja akkala googiddate gede mimmitoho qole ganeemmo; insa hunate dimarareemmo; dimaareemmonsa; yoommotano badhera diqoleemmo» yii.

ERMIYAASI BOO'NANSA DAAFIRA QOROPHISIISINSA

¹⁵ Coyi'ranni noohu Kaaliiqaatina, ki'ne Yihudu manni boo'na'ne agurtine, wodana assitine macciishshe.

¹⁶ Tunsicho abbeenna, ilaallate aana sarraaqantinikkinni, xawaabba agadhitine heedhineenna, beebbu tunsichira soorrikkinni, Magano'ne Kaaliiqa ayirrisse.

¹⁷ Yiinota gibbiniro kayinni, boo'na'ne daafira maaxame wi'leemmo. Kaaliiqi manni qafadame ha'ranno woyite, agurummokkinni hururame xurfu yee wi'leemmo.

¹⁸ Kaaliiqi mootetenna mootete amara, «Ayirrinyi'ne ba'latto umi'ne aaninni ubbinona, ayirradu barciminsa aaninni dirritanno gede kulinsa.

¹⁹ Wodiidita Yihudu katamma diinu doyisse amadanno daafira eannohunna fulannohu dihee'ranno. Yihudu manni baalunku qafadame ha'ranno» yii.

²⁰ Yerusaalame! Hanni aliyyera higge diinikki daanni noo gara lai. Hatti xuma hoshshakki hanniyya? Towaxxattohu mannikki hiikkiyya?

²¹ Ella'yaati yoottari dargakki amadde gashshitannohe woyite mayaattayya? Iltanno mancho gede game diamaddannohe?

²² «Kuni coyi mayira iillie?» yiittaro, imaanikki dadhame aanikkinni ho'leenna sholloottahu cubbikki batinyinni ikkinota afatta.

²³ Halaalinta Itiyophiyichu danasi, woy dagunchu muraamurrimmasi soorri'ra dandaannoni? Ki'neno rossinoonni bunshe agurranna, danchumma assitine affinannini?

²⁴ Kunnira ani Kaaliiqi, halalli diilallo kayissanno kuri gede asse billaalliseemmo'ne.

²⁵ Ane habbine wole maganna hexxitinoonni daafira, kuni coyi iillino'ne. Hakku coyi ikkanno gedeno ani assoommo.

²⁶ Ani umi'ya imaanakki dare teedikki leellanno gede asseemmo.

²⁷ Ani giweemmo coye assoottata afoommo. Manni galte dooyyanno manchinna iyyanno wodali gede, ilaallatenna gattate dagate maganna hoode ha'roottata afoommo. Yerusaalame atera aanne'e! Ati mamaro keeraa'matta ikka?