ERMIYAASI 12 - Qullaawa Maxaafa

ERMIYAASI ABBOOSHSHA

¹ Kaaliiqa'ya, abbooshshi'reemmohe kiirolla, ati keeraanchoho. Xa kayinni taashshate daafira xa'mi'reemmohe; bushu mannira mayira qinaannonsa? Hexxinannikki mannira mayira injaannonsa?

² Ati kaasseennansa rumuxxitino; lophite guma laaltino; ateri afiinsanni diho'lanno; wodaninsa kayinni atewiinni fafe no.

³ Kaaliiqa, ati kayinni ane egennoottoe; wodani'ya atewa noota afootto. Kunnira, diina'ya gorrinanni ge'reewi gede assite goshooshi; gorrantanno barrira badde qixxeessi.

⁴ «Assineemmore Kaaliiqi diafino» yaannohunni, bushu tenne gobbara hee'ranno manninni kainohunni, baattonke kooaartannohu, hayisso mooltannonna, saada gooffannohu mamari geeshshaati?

KAALIIQI QOLINO DAWARO

⁵ «Ermiyaasi! Mannu ledo qolchante daafurattoha ikkiro, faradu ledo qolchama hiitto dandaatto? Fano gobbara uurra dandaa hoogittoro, Yordaanoosi Dubbi giddo uurra hiitto dandaatto?

⁶ Umikki fiixi nafa badhe wodhinohena, atera gano gantinohena, danchare coyidhuhero nafa amma'nitooti» yii.

KAALIIQI MANNISI DAAFIRA DADILLI

⁷ «Manna'ya callachishoommo; dooroommota gosa'ya giwoommo; baxeemmonsare diinaho sayise oommo.

⁸ Umi'ya manni anera diinoome, dubboho noo doobbiichi gede, ittaninoe daafira giwoommo.

⁹ Doodhoommohu manni'ya, moyichu itanna gatinohanna, allaatte dooyyitanni noo cage lawanno. Daye itona, dubbu moyicho baala woshshe.

¹⁰ Lowoti wole gobba gashshaano, woyinete kaashshiha darga'ya huntino; loosi'reemmo dargano kakkadde huntino; dancha gate'ya mullicho darga assitino.

¹¹ Mullicho darga assite agurtino daafira, ane albaanni ona ikkino; isi daafira mitii'mannohu mittu nafa dino.

¹² Moola noori nookki gaarra aaninni, huntannori dagganno. Qaccetenni qaccete geeshsha bagado soommo daafira, mittuno keere diafi'ranno.

¹³ Qamade wixidhe uta mixxitino; daafurte mittoreno diafidhino. Hanqi'yanni bainohura, jajjinsara dadillitino» yii.

KAALIIQI ISRAEELETE OLLUUWARA UYINO HEXXO

¹⁴ Kaaliiqi, «Manni'yara Israeelete oommo baatto huntinore busha Israeelete ollaa baala buqqise huneemmo. Yihudano insa giddonni fushshe hooleemmo.

¹⁵ Tenne gosa buqqisummohu gedensaanni, galagale marareemmonsa; mitto mittonka iqqisiwanna gobbasiwa qoleemmo.

¹⁶ Manni'ya Ba"aali magansi'ranno gede assitino. Ani halaalaancho Magano ikkoommota ammante, manni'ya magansidhanno gara kulannonsa gede hasidhuro, tini gosano manna'ya ikkite qawaaxxidhe heedhanno.

¹⁷ Ani yoommota macciishsha gibburo kayinni co'onta buqqise huneemmonsa. Konne coye coyi'roommohu ani Kaaliiqaati» yii.