EJJEETTO 9 - Qullaawa Maxaafa

ABEMELEEKI

¹ Gedewooni beetti Abemeleeki abbuwisiwa Sekeemi ha'ri. Abbuwasinna amasi ayidde baala,

² «Sekeemi manni baalaho, ‹Lamalawunku Gedewooni ooso gashshitu'nero woyyannonso mittu manchi gashshi'nero woyyanno?› Abemeleeki kayinni maalanke ikkinota habbinoonte yiiyyensa» yii.

³ Amasi ayiddino isi su'minni konne coye Sekeemi mannira kuli. Insano, «Isi maalankeeti» yite wodana Abemeleeki widira qoltu.

⁴ Insano Ba"aali-Beriiti mininni 70 kinchu birra uyitusi. Abemeleekino hakko birranni yawaawulootanna haqaqqaaltannore hidhe wodhi; insano hoodesi hadhu.

⁵ Hakkunni gedensaanni Ofirara annisi minira ha'ri. Lamalaanka roduuwasi Gedewooni ooso mittu kinchi aana gorri. Gedewooni beetti maa'niidihu Iyoaataami kayinni maaxame gati.

⁶ Sekeeminna Beetimiilo manni baalunku Abemeleeki moohisate Sekeemi sooddichu mule noo qilxo hunda gamba yii.

⁷ Iyoaataamira tenne kulleennasi, Geriizaani Ilaali birxe fule qoonqosi naggi asse, «Sekeemi manna! Maganu macciishshanno'ne gede ani yeemmota macciishshe"e.

⁸ Mitto barra haqqe gashshannonsaha moohisidhara fulte ejersa, ‹Moohinke› yitino.

⁹ Ejersuno, ‹Haqqete aana lenqe yaammora yee Maganunna mannu ayirrannota zayite'ya aa aguroni?› yiino.

¹⁰ Hakkiinni sa'e haqqe balasete haqqicho, ‹Amo moohinke› yitino.

¹¹ Balase kayinni, ‹Haqqete aana lenqe yaate yee, lowo geeshsha coommado laalo'ya aa aguroni?› yitino.

¹² Hakkiino sa'e haqqe woyinete haqqicho, ‹Dagge moohinke› yitino.

¹³ Woyinete haqqichono, ‹Haqqete aana lenqe yaate yee, Maganonna manna hagiirsiissannota woyinete xajje'ya aa aguroni?› yitino.

¹⁴ Hakkunni gedensaanni haqqe baalanti uta, ‹Dagge moohinke› yitino.

¹⁵ Utuno, ‹Halaalinta ane moohissinannieha ikkiro, daggine caali'yara woroonni caa'le. Hatto assa hoogginiro kayinni sinna'ya giddonni giira fulte, Libaanoosi daguwano itto!› yiino» yiinsa.

¹⁶ Iyoaataami qole, «Abemeleeki halaalunninna godowunni moohissinoonni? Gedewooni assi'nere qaaggine maatesi hasiisanno garinni kaa'litinoonnini?

¹⁷ Anni'ya ki'nera yee olamita habbinoonte; ki'ne Midiyaamootu anganni gatisate umosi sayise uyino.

¹⁸ Ki'ne kayinni maatesira busha maltinoonni. Lamalaanta oososi mittu kinchi aana gorritinoonni. Fiixa'ne ikkino daafira borojjichote beetto Abemeleeki Sekeemi mannira moohissinoonni.

¹⁹ Maahoyyena, techo Gedewooni maate aana assitinoonnihu halaalunninna godowunni ikkinoha ikkiro, Abemeleekinni hagiidhe; isino ki'nenni hagiidhona!

²⁰ Hatto ikka hoogiro kayinni, giira Abemeleekiwiinni fulte ki'ne Sekeeminna Beetimiilo manna itto! Sekeeminna Beetimiilo manniwiinni fultino giirano Abemeleeki itto!» yii.

²¹ Hakkunni gedensaanni Iyoaataami xooqe Bieeri yinanniwa dayi. Rodoosi Abemeleeki waajjino daafira hakko hee'ri.

²² Abemeleeki Israeele 3 diro gashshihu gedensaanni,

²³ Maganu Abemeleekinna Sekeemi manna mimmitoho diina ikkitanno gede assi. Kunnira Sekeemi manni Abemeleekira gara giwi.

²⁴ Maganu hatto assinohu, roduuwasi shiino daafira Abemeleeki qorichishatenna lamalaanka Gedewooni ooso shaanno gede kaa'litinosire Sekeemi manna assitino beebbara rabbisara yeeti.

²⁵ Sekeemi mannino, gaa'le Abemeleeki agaranno manna wori. Kuni manni iso agare hee're sa"annoha baala mulqi'ri; duduwuno Abemeleekiwa iilli.

²⁶ Hatte yannara, Abeedi beetti Geaali roduuwisi ledo Sekeemi dayi. Sekeemi mannino iso hexxi.

²⁷ Gatinni woyinensa xinqidhe huuncituhu gedensaanni, maganinsa mine hagiirru ayyaana ayirrissu. Hakkiicho ittanninna agganni Abemeleeki xontu.

²⁸ Abeedi beetti Geaali, «Gashshannonkehu Abemeleeki ayeti? Ninke Sekeemi manni hiittooreeti? Isi Gedewooni beetto di"ikkino? Zebuulino isi kaa'laancho di"ikkino? Hatteentenni Sekeemi anni Hamoori sirchira digashshammeemmo? Abemeleekira mayira gashshammeemmo?

²⁹ Konne manna gashsheemmohu ane ikkoommoro, Abemeleeki hooleemmohu baino. Abemeleekino, ‹Olantokki haammachiishidhe dagge olami!› yee kuleemmosihu baino» yii.

³⁰ Katamu gashshaanchi Zebuuli, Geaali yiinota macciishshe lowo geeshsha hanqi.

³¹ Abemeleekiwa maaxe manna soye, «Kuneeti Abeedi beetti Geaalinna roduuwisi Sekeemi dagge, katamu manni aanakki ka"anno gede assitino.

³² Kunnira hashsha mannakki haadhe dagge xawoho gaa'lite agari.

³³ Soodo arrishsho fultanno woyite katama rakke marte, Geaalinna mannisi qassahera dagganno woyite hedeweelcho bala tugi» yii.

³⁴ Kunnira Abemeleekinna mannisi baalu hashsha marte, 4 gaamo ikkite Sekeemi mule ri'e agartu.

³⁵ Abeedi beetti Geaali katamunni fule e'nanni waalchira uurre nooha affe, Abemeleekinna mannisi gaa'litinowiinni fultu.

³⁶ Geaali insa afe Zebuulira, «Lai! Ilaalu birxenni mannu dirranni no» yiisi. Zebuulino daware, «Ilaallate caalilla manna lawinohena, dimannaho» yii.

³⁷ Xaano Geaali, «Lai! Mannu ilaalu halli geeshsha dayinowe! Mitte gaamo kiilaanote qilxo widoonni higge dagganni no» yee coyi'ri.

³⁸ Hakkunni gedensaanni Zebuuli, «‹Gashshannonkehu Abemeleeki ayeti?› yite boollaqi'rittohu xa hiikkittoyya? Xonitto manni dikonneeti? Amo fulte olami!» yiisi.

³⁹ Geaali Sekeemi manna anga adhe Abemeleeki ledo olami.

⁴⁰ Abemeleeki kayinni iso shorri. Katamu waalchira nafa lowo manni madi're uwi.

⁴¹ Abemeleekino mare Arruma yinanniwa hee'ri. Zebuulino Geaalinna roduuwasi katamunni shorre fushshi.

⁴² Layinki soodo Sekeemi manni loosi'rara gatira fuli. Tenneno Abemeleekira kullisi.

⁴³ Isino mannasi hoodete adhe fuli. Mannasino sasewa beehe loosu giddo rie agaranno gede assi. Abemeleekino Sekeemi manni katamunni fulinota afanni hee'renni, ri"inowiinni qasara fuli.

⁴⁴ Hakkunni gedensaanni, Abemeleekinna ledosi noo gaamo katamu waalchira agartara doddanni heedheenna, wole 2 gaamo marte loosu giddo noore baala shite guddu.

⁴⁵ Hakko barra Abemeleeki barra wo'ma olamanni hose katama angara qo'li. Manna gude, katamano hune, aanaho maxine finci.

⁴⁶ Sekeemi huxxi kinchunnihu giddo heedhannori konne coye macciishshitanni heedhenni, Ba"aali-Beriiti galmira noo qiisho giddora e'u.

⁴⁷ Abemeleekino hakkiicho maaxamansa afe,

⁴⁸ mannasi anga adhe Selmooni yinanni Ilaala fuli. Abemeleekino qotto haa're mitto haqqu caafa mure, qoteho wodhi. Hoodesi noo mannano, «Rakkine, ani assummota asse!» yee hajajinsa.

⁴⁹ Mannu baalunku caaffa mudhe Abemeleeki hoode ha'ri. Caaffano qiishote irkisse duunte mannu giddo hee'reennanni aanaho giira gantu. Kunnira Sekeemi qiisho giddo noohu 1,000 ikkanno manni meya labbaahu mitteenni goofi.

⁵⁰ Hakkunni gedensaanni Abemeleeki Tebesi Katama mare doyisse amadi.

⁵¹ Ikkollana katamu giddo kaajjado, kinchu shae noohura, katamu manni meya labbaaha yinikkinni gashshaanonte ledo mitteenni hakkiira xooqi. Cufana giddoonni cufidhe shaete iimira gidditu.

⁵² Abemeleekino olamanni giira qasara kinchu huxxi waalchiwa iillita,

⁵³ mitte mancho daammi-beetto aanasi tugge sammosi dhoossu.

⁵⁴ Hakkawoyintenni bagadosi duhannoha woshshe, «‹Meyati shitinosi› yinannikki gede eeggatena bisekki fushshite shiie» yiisi. Soqqamaanchisino yiino gede qase shiisi.

⁵⁵ Israeeleno Abemeleeki reyinota affanni heedhenni, qae qaensa hadhu.

⁵⁶ Abemeleeki 70 roduuwasi shee annisi aana assino saora Maganu loosisita uyinosi.

⁵⁷ Maganuno Sekeemi manni bunshe uminsara qolino. Gedewooni beetti Iyoaataami rumo amaddinonsa.