EJJEETTO 7 - Qullaawa Maxaafa

GEDEWOONI MIDIYAAMOOTA QEELI

¹ Gedewooninna ledosi noo manni baalu soodimaroho kae Haroodi Buicho gama kunseeni. Midiyaamootu qachi Israeele baxxisidhinohura aliyyeenni, More Gaari mule lagu giddooti.

² Kaaliiqi Gedewoonira, «Midiyaamoota anga'nera sayise aate ledokki noo manni lowo geeshsha bati'rino. Israeele uminsa wolqanni gattinoha laweennansa boo'nite anera ayirrinye ho'litannoena,

³ ‹Waajjinohunna masinohu hee'riro Geleaadi Ilaala agure galagale dayinowa ha'ro!› yite lallawi» yiisi. Kunni garinni 22,000 higeenna 10,000 manni callu gati.

⁴ Kaaliiqi Gedewooni, «Xaano mannu bati're noona, wayi laga haadhe massi. Hakkiichono ha'rannohanna gatannoha bade kuleemmohe. Ani, ‹Ha'rona› yeemmo geeshshi ledokki ha'ranno. ‹Ha'roonke› yeemmo geeshshi kayinni ledokki diha'ranno» yiisi.

⁵ Kunnira Gedewooni manna haa're wayi laga dirrisi. Hakkiichono Kaaliiqi, «Waa woshichu gede laccanni aggannore, guluphite aggannoriwiinni badi» yiisi.

⁶ 300 waa angansanni adhitanni aggu. Wolootu kayinni guluphite aggu.

⁷ Kaaliiqi Gedewoonira, «Waa angatenni adhitanni agguri 300 widoonni qole Midiyaamoota qeeltinanni gede asse gatiseemmo'nena, woloota kayinni daggino dagginowa hadhanno gede kulinsa» yii.

⁸ Gedewoonino sasenka xibbe gatise gattino Israeelooti baalunku, qae qaensa higganno gede assi. Gatturino badhera higginori sinqenna xurumba adhitu. Hatte yannara Midiyaamootu insara eelaanni lagaho no.

⁹ Hakko hashsha Kaaliiqi Gedewooni, «Angakkira sayise oommohena, dirrite kunni qachira bala tugi.

¹⁰ Bala tuga waajjattoha ikkiro kayinni, soqqamaanchikki Fura ledo qacha dirrite,

¹¹ yitannore macciishshi; hakkawoyite qachaho bala tugattota wolqa afi'ratto» yiisi. Kunnira Gedewooni soqqamaanchosi Fura hoodete adhe qachu qooxeessa mari.

¹² Kanchafaru gede kiiro batidhino Midiyaamooti, Amaaleqootinna wolootu soojjaati manni lagaho kunseente no. Gaalinsa batinyino baaru gami shaafi gede kiiro dianfoonniho.

¹³ Mittu manchi haaqii'rino haaqee jaalisira kulanni hee'reenna Gedewooni hakkiira mare iilli. Hakku manchino, «Haaqeete mittu hayixu qeeqqali gongo'manni Midiyaamootu qacha dirre, dukkanano jaddeesse ganeenna galchame diigamanna afoommo?» yaanni kulisi.

¹⁴ Jaalisino daware, «Kuni Israeelichu Iyoaasi beetti Gedewooni bagadooti ikkinnina, wolere di"ikkino. Maganu ninke Midiyaamootanna olantonke baala angasira sayise uyino» yii.

¹⁵ Gedewoonino haaqeenna haaqeete tiro macciishshi yannara kumbuule Magano galaxxi. Hakkunni gedensaanni Israeelootu qacha daye, «Kaaliiqi Midiyaamootu olanto anga'nera sayise uyinona ka'e!» yiinsa.

¹⁶ Sasenka xibbe manna 3 gaamo asse, mittu mittunku manchira xurumbanna kiffala giddo worroonnita mullicho maaqqe anga wori.

¹⁷ Gedewoonino, «Ani qachu qooxo iilleemmo woyite, asseemmore seekkitine la'ine, ani assummo gede asse.

¹⁸ Aninna ledo'ya noori baalu xurumba ufuunfeemmo woyite, ki'neno heedhinoonniwa heedhine xurumba'ne ufuuffinanni, ‹Kaaliiqiranna Gedewoonira olammeemmo› yitine adawadhe» yiinsa.

¹⁹ Agaraasine soorrineenna hashshi agare hananfi yannara, Gedewooninna ledosi noori 100 manni marte Midiyaamootu qacha iillitu. Xurumba ufuuffanni maaqquwansano hiiqqaqqitu.

²⁰ Sase gaamora beehamino manni baalunku xurumba ufuufi. Maaqquwano hiiqqaqqitu; kiffalla guracho anganni amadde, ufuuffanno xurumbano qiniiticho anganni amadde, «Bagadinkenni Kaaliiqiranna Gedewoonira olammeemmo!» yitanni adawadhitu.

²¹ Mittu mittunku manchi uyinoonnisi darga amadanni hee'reennanni, Midiyaamootu raartanni xooqqu.

²² Kaaliiqi, sasunku xibbi xurumbi luulo macciishshanni hee'renni, qachaho noo manni baalunku mimmitoho bagado qo'lanno gede assi. Diinu olanto Tsaritaani ragaanni Beete Shiixi geeshsha, gamisu kayinni Xebaati mule noohu Abeeli-Mehola danni geeshsha xooqqu.

²³ Hakkunni gedensaanni, Niftaalemi, Aseerinna Minaasehu lamunku darati manni gamba yee Midiyaamoota shorri.

²⁴ Gedewoonino gaaraame Efireemi gobbara heedhannorira baalaho, «Midiyaamootu aana dirre; Beetibaara geeshsha nooha Yordaanoosi Waano balaxxine amadde» yiinsa. Kunnira Efireemi manni baalunku lassineenna fule, Beetibaara geeshsha nooha Yordaanoosi Waa mare amadi.

²⁵ Hereebinna Zeebi yinannire 2 Midiyaamete sooreeyye amaddu. Hereebi, Hereebi Kinchi mule, Zeebi qolte Zeebi Woyine huuncinanniwa shitu. Midiyaamootano shorritu. Hereebihanna Zeebi umo murte Gedewooni noowa Yordaanoosira soojjaatoonni haadhe abbitu.