EJJEETTO 6 - Qullaawa Maxaafa

GEDEWOONI

¹ Xaano Israeele Kaaliiqi albaanni bunshe assitu; Kaaliiqino Midiyaamootaho sayise uyinsa. Insano 7 diro gashshitunsa.

² Israeelootuno Midiyaamootu wolqissinonsa daafira, ilaallate aana goddanna maaxantannowa seekkidhu.

³ Israeele wixa wixidhanno yanna baalate Midiyaamootu, Amaaleqootunna wolootu soojjaati gosa dagge gobba horritu.

⁴ Insano baattote aana tuulte Gaaza geeshsha noo gide gumuno gatikkinni co'o assite guddu. Mitte saadano gattukkinni ge'reewo, lalono harreno gudisse adhite hadhu.

⁵ Saaddansanna dukkannansa adhite dagganno woyite, kanchafarimma batidhinoreeti. Manninsanna gaalinsa kiirre didandiinanniho. Insano baatto mulqitara dagginoreeti.

⁶ Midiyaamootu Israeele qarru giddo tugginonsahura, kaa'lannonsa gede Kaaliiqiwa raartu.

⁷ Midiyaamete gawajjonni kainohunni Israeele Kaaliiqiwa higge raartu yannara,

⁸ Kaaliiqi mitto himanaancho soyinonsa. Isino, «Israeelete Magani Kaaliiqi, ‹Borojjimmate mininni Gibitsete gobbanni fushshummo'nehu aneeti.

⁹ Gibitsootu anganni hobbaasoommo'ne. Tenne baattora gadadissanno'neri baalu angannino gatisoommo'ne. Insano albi'nenni shorre hune, ki'nera baattonsa oommo'ne.

¹⁰ Ani Kaaliiqi Magano'neeti; gobba'nera noota Amooraawootu maganna magansidhinoonte› yoommo'ne. Ki'ne kayinni yoommota dimacciishshitinoonni» yii.

¹¹ Kaaliiqi sokkaasinchi Ofira yinanni qacha daye, Abieezerichu Iyoaasi gate noo qilxo hunda ofolli. Iyoaasi beetti Gedewooni, Midiyaamootu affannosikki gede maaxame woyine huuncinanniwa qamade ga'nanni no.

¹² Kaaliiqi sokkaasinchino isira leelle, «Koo jawaata worba! Kuneeti, Kaaliiqi ledokki no» yiisi.

¹³ Gedewooni daware, «Mooticha'ya, Kaaliiqi ledonke hee'roommero kuni baalu qarri iillannonkeni? Annuwanke, ‹Kaaliiqi Gibitsete gobbanni fushshinonke› yitanna macciishshinoommo. Xa kayinni Kaaliiqi ninke callachishinonke. Midiyaamootu angara sayise uyinonke» yii.

¹⁴ Hatte yannara Kaaliiqi isiwa caaqqi yee, «Noohe wolqanni ha'ri! Israeele Midiyaamootu anganni fushshatto gede soyemmohehu aneeti» yiisi.

¹⁵ Gedewoonino, «Mooticha'ya, ayiddi'ya Minaase ga're giddo hooffayidiho. Ani qole mininke giddo wo'munkura woriidiho. Israeele gatisate maminni dandeemmo?» yii.

¹⁶ Kaaliiqino, «Addintanni ani ledokki hee'reemmo. Midiyaamoota mittu manchi gede assite ganatto» yiisi.

¹⁷ Gedewoonino, «Hanni xa baxittoeha ikkiro, hasaawissanni noottoehu ati Kaaliiqa ikkoottota afeemmo gede malaate uyie.

¹⁸ Galagale higammo geeshsha, kakkalo'yano albikkira shiqishi'rammo geeshsha eeggatena hadhooti» yii. Kaaliiqino, «Higatto geeshsha agareemmohe» yiisi.

¹⁹ Gedewooni minisira ha're, aja meichu goco gorre gafi. 10 kiilo ikkitanno bullee haa're shiishinokki tima gani. Maala saffeho, waco midaanote haa're daye, qilxote hunda ofolle noohura shiqishisi.

²⁰ Sokkaasinchuno, «Maalanna shiishinokki tima haadhe kunni kinchi aana wori. Wacono maalunna timu aana duni» yiisi. Gedewoonino hajanjosi gede assi.

²¹ Sokkaasinchuno amadino siqqo birxenni maalanna tima kisi. Kinchu giddonni giira fulte maalanna tima ittu. Hakkunni gedensaanni Kaaliiqi sokkaasinchi mulisinni ha'ri.

²² Gedewooni Kaaliiqi sokkaasincho ikkinota buuxihu gedensaanni, «Mooticha Kaaliiqa, sokkaasinchokki ille'yanni afoommona baummo!» yii.

²³ Kaaliiqi kayinni, «Keeru ledokki hee'ro; direyattona waajjitooti» yiisi.

²⁴ Gedewoonino hakkiicho Kaaliiqira kakkalote darga seekki. Su'mano, Kaaliiqi Keereho yee fushshi. Kuni kakkalote dargi techo geeshsha Abieezerootu baattora Ofira yinanniwa no.

²⁵ Hakko hashsha Kaaliiqi Gedewooni, «Annikki hoshsha giddonni mitto middichanna wole 7 diri middicha haadhe, annikki Ba"aalira seekkinoha kakkalote darga diigganno gede assi. Mulesi noota Asheera mokkollicho murmurte tugi.

²⁶ Gaaraho luphi yiino darga, ane Maganikki Kaaliiqira malinoha kakkalote darga seekki. Hiiqqaqqite tugootto mokkollicho Asheeraha giirte, layinki middichi maala shilqishshe kakkali» yiisi.

²⁷ Gedewooni soqqamaasinesi giddonni 10 anga adhe mare Kaaliiqi hajajinosi gede assi. Minisi mannanna katamu manna waajjino daafira, konne assinohu dibarraatina hashshaati.

²⁸ Hashshu soodeenna katamu manni goxinowiinni ka"anno woyite, Ba"aalihu kakkalote dargi diigame, mulesi noohu Asheera mokkollichino murmurame, haaro seekkinoonni darga layinki middichi kakkalame no.

²⁹ Insa insanaa, «Konne mayi assi?» yite mimmito xa'mitu. Coye duudhe hasse, Iyoaasi beetti Gedewooni assinota affu.

³⁰ Katamu mannino Iyoaasi, «Ba"aaliha kakkalote darga diiginohanna mulesi nooha Asheera mokkollicho murmurinohu beettokkiitina shineemmona fushshi» yitusi.

³¹ Iyoaasi kayinni hanqunni hufe gaangeesse noosi mannira, «Ba"aalira rabbissinannisini? Gatissinasira wo'naaltinannini? Isira rabbisannohu sooda geeshsha reyo! Ba"aali magano ikkinoha ikkiro, kakkalosi darga diinganni woyite hoo'lara dandaanno» yiinsa.

³² Kunnira, «Kakkalosi darga diiginoha umisi Ba"aali rabbiso» yitanni hakko barra Gedewoonira, «Yirubaeeli» yite su'ma fushshitusi.

³³ Hatte yannara Midiyaamootu baalu, Amaaleqootunna wolootu soojjaati manni mitteenni gamba yite Yordaanoosi Waa fulte Iyiziraeeli lagira kunseentu.

³⁴ Hakkunni gedensaanni, Kaaliiqi Ayyaani Gedewooni aanira dirri. Isino buudu xurumba ufuufe, Abieezeroota hoodesi hadhanno gede woshshi.

³⁵ Hattonni Minaase baatto baalate manna soye ha'runsitannosi gede assi. Qoleno Aseeri, Zaabilooninna Niftaalemi manni fule olamanno gede sokka soyi.

³⁶ Gedewooni Maganoho, «Coyi'rootto garinni Israeele ane widoonni qolte gatisattoha ikkiro,

³⁷ kuneeti ge'reewu orda ayiddummete woreemmo. Baatto baala moola ikkiteenna orda callate aana loju hee'rannoha ikkiro, yiitto gede Israeele ane widoonni qolte gatisattota afeemmo» yii.

³⁸ Yiinonte gede ikki. Gedewoonino soodo gute kae, loju aanaho noo orda huunceenna fulino wayi mitte maaqqe wo'mi.

³⁹ Hakkunni gedensaanni Gedewooni Magano, «Xaano mitto coye huucci'reemmohena hanqitootie. Hanni xaano mitte hige orda tenne woreemmona, baatto baala loja ikkiteenna orda moola ikkitanno gede assi» yii.

⁴⁰ Hakko hashshano Maganu Gedewooni yiino gede assi. Baatto baala loja ikkiteenna orda calla moola ikkitu.