EJJEETTO 4 - Qullaawa Maxaafa

DIBOORANNA BAARAAQI

¹ Naoodi reyihu gedensaanni xaano Israeele Kaaliiqi albaanni bunshe loossu.

² Kunnira Kaaliiqi Hatsoori gashshe noohura Kana"aani mootera Yaabiinira sayise hirinsa. Yaabiini olanto hajajaanchi Sisaara, Harosheti-Hagoyimi hee'ranno.

³ Isirano 900 siwiilu faradi gaare noosi daafira, Israeele 20 diro kade gashshino. Insano kaa'lannonsa gede Kaaliiqiwa raartu.

⁴ Hatte yannara Lefidooti galte himanaancho Diboora Israeele gashshite no.

⁵ Iseno gaaraame Efireemi gobbara, Raamanna Beeteli mereero saattu hunda ofolte mannaho coye affanno. Israeeleno coyensa adhite isewa dagganno.

⁶ Diboora, Niftaalemi giddo Qedeeshi yinanni katamira hee'rannoha Abiniemi beetto Baaraaqi woshshiishshe, «Israeelete Magani Kaaliiqi, ‹Ka'e Niftaaleminninna Zaabilooninni 10,000 manna haadhe Taaboori Ilaala fuli.

⁷ Anino Yaabiini olanto hajajaancho Sisaara faradi gaaresinninna olantosi ledo Qishooni Wayiwa daanno gede kayiseemmo. Isono angakkira sayise eemmohe› yiino» yitusi.

⁸ Baaraaqino, «Ati ledo'ya ha'rattaha ikkiro ha'reemmo; ledo'ya ha'rattakkiha ikkiro kayinni diha'reemmo» yii.

⁹ Diboorano dawarte, «Maahoyye, ha'ra ledokki ha'reemma. Ani ledokki ha'reemmaha ikkiro kayinni ayirrinyu ateha di"ikkanno. Kaaliiqi Sisaara meyate angara sayise aanno» yitusi. Hakkunni gedensaanni, Diboora Baaraaqi ledo Qedeeshi hadhu.

¹⁰ Hakkiicho Baaraaqi Zaabilooninna Niftaalemi manna woshshiishi. Insa giddonnino 10,000 manni hoodesi fuli. Diboorano ledosi hadhu.

¹¹ Hatte yannara, Qenaawichu Hebeeri, Muse galte rodii Hobaabi sirchiwiinni baxxe Qedeeshi mule Tsainayimi yinanniwa lowo qilxo qote dukkana qasi're no.

¹² Abiniemi beetti Baaraaqi Taaboori Ilaala ha'rinota Sisaara macciishshe,

¹³ 900 siwiilu faradi gaare Harosheti-Hagoyiminni Qishooni Wayi geeshsha noo olanto baala gamba assi.

¹⁴ Hatte yannara Diboora Baaraaqi, «Kai, Kaaliiqi Sisaara angakkira sayise uyino barri konneeti; kuneeti Kaaliiqi balaxe albakkiinni fulino» yitusi. Baaraaqino 10,000 manna hoodete adhe Taaboori Ilaali aaninni dirri.

¹⁵ Kaaliiqi Sisaaranna faradi gaaresi baala Baaraaqi bagadinni gara habbe jaanjurtanno gede assi. Sisaarano faradi gaaresi aaninni dirre lekkatenni xooqi.

¹⁶ Baaraaqi kayinni Sisaara faradi gaarenna olantosi Harosheti-Hagoyimi iillisha geeshsha shorri. Sisaara olanto baala mittuno gattukkinni gooffu.

¹⁷ Hatsoori moote Yaabiini Qenaawichu Hebeeri ga're ledo jaalooma afi'rino daafira, Sisaara xooqe Qenaawichu Hebeeri galte Iyaeeli dukkana ei.

¹⁸ Iyaeelino fulte Sisaarawa shiqqe, «Mooticha'ya, waajjitootina giddora ei» yitusi. Dukkanise giddorano eessite, uddano dibbe maaxxusi.

¹⁹ Sisaarano, «Goo'roommona ballo waa hayikkisie!» yiise. Iseno gereerete noo ado haadhe uyitusi. Age kaihu gedensaanni xaano dibbe maaxxusi.

²⁰ Isino, «Hanni marte xullote uurri; mannu daye, ‹Konne noohu nooni?› yee xa'mihero, ‹Dino› yaattana» yiise.

²¹ Hebeeri galte Iyaeeli kayinni Sisaara daafurinotanna, goxe bainota affuhu gedensaanni, dukkanu cifichonna meencho haadhe suutunni isiwa shiqqi yitu. Hakkunni gedensaanni, cificho qontichisira gante baattote ledo xaadisse agurtu.

²² Baaraaqi Sisaara faana gananni hakkiira iillita, Iyaeeli fulte isiwa marte, «Amo, hasi'rootto mancho leellisheemmahena» yitusi. Isino ledose dukkanise giddora ei. Sisaarano qontichisira cificho gantino gedeenni hee're ree diriire nooha afi.

²³ Hakko barra Maganu, Israeele Kana"aani moote Yaabiini olanto qeeltanno gede assi.

²⁴ Kana"aanootu moote Yaabiini wolqa co'o yite gooffa geeshsha Israeele olama diuurrissino.