EJJEETTO 21 - Qullaawa Maxaafa

BIINIYAAMI GA'RERA UYINOONNI SEENNE

¹ Israeele Mitsipha xaadde, «Ninke giddonni mittuno seennesi Biiniyaamootaho oonke» yite xaartino.

² Israeele Beetelira marte hawarra geeshsha Maganu albaanni ofolte, qoonqonsa naggi assite hururante wi'litu.

³ Insano, «Israeelete Magano Kaaliiqa, kuni coyi Israeelete aana mayira ikki? Israeelete giddonni mitte ga're mayira ba'u?» yitu.

⁴ Mannu soodimaroho gute kae, hakkiicho kakkalote darga seekke mittimmannitanna shilqote kakkalo shiqishi.

⁵ Israeelete manni, «Israeelete ga're baalate giddonni Kaaliiqi albira songo dayinokkihu ayeti?» yee xa'mi. Hatto yiinohuno Mitsipha dayinokkihu horonta reyanno gede xaarino daafiraati.

⁶ Israeeleno roduuwinsa Biiniyaamootu daafira gaabbite, «Techo Israeelete giddonni mitte ga're ba'ino.

⁷ Seennenke uyineemmonsakki gede Kaaliiqi albaanni xaarroommo; gattinorira seenne maminni anfa ikka?» yitu.

⁸ Hakkunni gedensaanni, «Israeelete giddonni Mitsiphara Kaaliiqi albira dayinokkihu ayeti?» yite xa'misiisse, Yabiisi Geleaadinni mittu manchino songonniwa fulinokkita affu.

⁹ Manna olaho kiirri woyite, Yabiisi Geleaadinni mitto manchono dianfoonni.

¹⁰ Kunnira, 12,000 bagadaano sokke, Yabiisi Geleaadi noo manna meentunna qaaqquulluno gatikkinni shite guddu.

¹¹ Insano, «Labballonna mine assi'rino meento baala shiiyye» yitino.

¹² Yabiisi Geleaadi mine assi'rinokkire 400 seenne anfi. Hakkonne seenne haadhe Kana"aani gobba Seelo yinanniwa abbitu.

¹³ Hakkunni gedensaanni, Israeele Remooni kinchiwa noo Biiniyaamootira araaraho manna sokku.

¹⁴ Biiniyaamootuno hakkiinni higge, Yabiisi Geleaadi giddonni gatino seenne adhitu. Ikkollana kiironsa taaltinokkihura seennu wo'munkura di"iillinonsa.

¹⁵ Kaaliiqi Biiniyaamootu ba'anno gede asse Israeele fooqisino daafira, mannu lowo geeshsha dadilli.

¹⁶ Israeelete geerri, «Biiniyaami ga're giddo wole meyati dinona, gattinorira ma"assino?

¹⁷ Israeelete giddonni Biiniyaami ga're ba'annokki gede, gattinori ooso ila hasiissannonsa.

¹⁸ Ikkollana, Biiniyaamootaho seennesi aannohu rumammoha ikko» yinoonni daafira, seennenke insara aa didandiineemmo.

¹⁹ Hakkiinni aanchite, «Diru dirunkunni Seelo Kaaliiqi ayyaana ayirrinsanni barri iillino» yite heddu. (Seelo, Beetelira aliyyeenni Lebonara wodiidoonni Beetelinna Sekeemi mereero noo doogora soojjaatoonniiti.)

²⁰ Biiniyaami ga'reno, «Hadhine woyinete kaashshi giddo martine maaxantine agarre.

²¹ Seelo seenni godo'lara hakkiichira daanno woyite, woyinete kaashshi giddonni fultine umi umi'nera diidhine adhe; adhitine ka'ine Biiniyaami gobba hadhe.

²² Annuwansanna roduuwinsa dagge xa'mitunkero, ‹Olu gedensaanni adhitanno seenne hoongoommonsa; ki'neno seenne'ne baxxine uyitinoonnikki daafira, xaaro diamaddanno'nena, ballo mararrensa› yineemmona» yitunsa.

²³ Biiniyaamootuno yitinonsante gede assitu; seennu godo'lanni hee'reenna mittu mittunku umi umisira ikkitannota dii're adhe ha'ri. Qae qaensa higge katammansano gatamadhite heedhu.

²⁴ Israeeleno hattenne base agurte mini mininsara, iqqi iqqinsawa, ilama ilamansawanna ga're ga'rensawa hadhu.

²⁵ Hatte yannara, Israeelete moote nookki daafira, mannu baalunku lawisi gede ikke hee'ranno.