EJJEETTO 19 - Qullaawa Maxaafa

MITTICHO LEEWAAWICHANNA IRKOTE GALTE

¹ Israeelete moote nookki waro, gaaraame Efireemi gobbara widoonni hee'rannohu mittu Leewaawichi no. Isino Beetelihemete Yihudunni mitte irkote galte adhi.

² Iseno foortu; iso agurte annise minira Beeteliheme Yihuda hadhe, 4 agana ofoltu.

³ Isino araarame qo'lara hasi're isewa ha'ri; ha'ri woyiteno 1 soqqamaanchosinna 2 harre anga adhe ha'rino. Iseno annise minira haadhe eessitusi; anniseno hagiidhe haa'risi.

⁴ Beettote annino hakkiicho keeshshanno gede huuccisi; isino itanninna aganni 3 barra ledosi keeshshi.

⁵ Shoolki barra gutte hadhara ka'u. Beettote anni kayinni mancho, «Doogo hudidhe daafurattokki gede mitore afooho wodhi; hakkunni gedensaanni ha'rattona» yiisi.

⁶ Lamunku ittaranna aggara mitteenni ofoltu. Beettote annino, «Eeggatena techono hasaabbinanni konne galle» yiisi.

⁷ Manchu ha'rara kainonkunni ballisi huucceenna gali.

⁸ Ontikki barra Leewaawichu ha'rara soodo gute kai. Beettote anni kayinni, «Doogo hudidhe daafurattokki gede, sagale itte ha'rattona shiima geeshsha agari» yiisi. Hakkunni gedensaanni lamunku sagale mitteenni ittu.

⁹ Leewaawichunna galtesi soqqamaanchi ledo hadhara ka'uta beettote anni, «Yanna hashshitinona hasaabbinanni galle; soodo guttine ha'ra dandiitinanni» yiisi.

¹⁰ Leewaawichu kayinni hakko hashsha hakkiicho galara hasi'rinokkihura, hogomboonnire lamenta harresinna galtesi adhe Yabuusi yinanniwa Yerusaalame ha'ri.

¹¹ Yabuusi iilla rakkuta yanna hashshitino daafira soqqamaanchisi, «Konne Yabuusi Katama e'ne gallo» yiisi.

¹² Mootichisi kayinni, «Di"ikkanno; Israeelete ilama ikkinokkihuwa allaggichu manni katama die'neemmo; sa'ne Gibia ha'no» yii.

¹³ Qoleno, «Amo, ranke Gibia woy Raama iilline galleemmona» yiisi.

¹⁴ Doogonsa amadde hadhanna, Biiniyaami ga're Gibia iillituta arrishsho e'u.

¹⁵ Galtara Gibia alba higge hadhu. Martanno woyite haa're gashshannonsaha hoogge katamu gudumaalira keeshshitu.

¹⁶ Hakko mereero Efireemi gobbanni daye Gibia hee'rannohu mittu jawu manchi loosi'rara ha'rinowiinni higi. Hatte gobba manni kayinni Biiniyaami ilamaati.

¹⁷ Geerchu konne doogaasincho gudumaaleho afe, «Hiikkiinni dayitto? Hiikkiira ha'ratto?» yee xa'misi.

¹⁸ Manchuno, «Ninke Beetelihemete Yihudunni ka'ne gaaraame Efireemi gobba widiidi geeshsha ha'nanni hee'noommo. Xa kayinni balaxe Kaaliiqi minira ha'ranni noommo; konne hashsha gashshannoeha kayinni diafi'roommo.

¹⁹ Harrenkera galawunna kuru noonke; aneranna galte'yara kunni ledonke noo wedellichira ikkitanno sagalenna woyinete xajjeno noonke. Mooticha'ya, woliri mitturino dihasiisannonke» yee dawarisi.

²⁰ Geerchuno, «Amme ane minira ha'nona; hasiisanno'nere baala ani eemmo'ne. Gudumaaleholla galtinoonte» yiisi.

²¹ Minira e'eenna harresirano ittannore uyi; insano lekka hayishshidhe sagaleno ittu.

²² Hasaabbanni heedheenna, garimalu manni katamunni daye mine gaangeessi; cufana dhodhoossanni geercho, «Minikkira eino mancho siimu xaadooshshira hasi'neemmona fushshi» yitu.

²³ Geerchuno gobbara fule, «Roduuwa'ya, konne busha coye mayira assitinanni? Eegga'neetina manchu mini'yara einona konne saalu coye agurre.

²⁴ Kuneeti seemo beetto'yanna manchu galte mine noona, hatteentenni insa fushsheenna'ne hasidhinita asse. Kunni manchi aana kayinni konne saalsiisanno coye assitinoonte» yiinsa.

²⁵ Insa kayinni yiinota dimacciishshitinosi. Leewaawichuno galtesi gobbara fushshe uyinsa. Insano, manchote aanira hashsha wo'ma doyite doyitetenni sa'anni galte, duu'mu saaqquta agurte hadhu.

²⁶ Soodita mancho biilisi noo minira ka'e hadhe, arrishsho fulta geeshsha nafara diriirte keeshshitu.

²⁷ Biiliseno nafara fa'ne ha'rara gute ka"anno woyite, galtesi angase guwanete irkisidhe xullote ubbe diriirte noota afi.

²⁸ Leewaawichuno, «Kai ha'nona» yiise. Ise kayinni mittoreno didawartino. Hakkunni gedensaanni, reeshshase harrichoho hogowe qaesi ha'ri.

²⁹ Minira iillanni hee'renni, billawa haa're reeshsha tonaa lamewa murmure Israeelete gobba baala soyi.

³⁰ Konne coye afihu baalu mimmitoho, «Israeele Gibitsetenni fultunkunni togoori ikke diegennino; anfeno diegenninoonnina, ma"assa hasiisannonkero hanni mallo» yitu.