EJJEETTO 18 - Qullaawa Maxaafa

MIIKANNA DAANI GA'RE

¹ Hatte yannara Israeelete moote dino. Daani ga'reno Israeelete ledo uminsa iqqa adhitinokki daafira, heedhanno baatto hasidhanni no.

² Kunnira, Daani ga're gobba dooyyitannorenna shooqqannore 5 jawaata manna Tsorianninna Eshitaoolinni fushshite sokku. Insano gaaraame Efireemi gobbara Miika mine marte galtu.

³ Miika mine heedhe, Leewaawichu wedellichi huuro macciishshite, «Kawiichira ayi abbihe? Konne maa loossanni nootto? Konniicho mayi noohe?» yite xa'mitusi.

⁴ Isino daware, «Miika ledo hasaamboommori no; qoleno woxe aannae qeesimmatenni soqqameemmosi gede wodhinoe» yii.

⁵ Insano, «Hanni ha'nanni hee'noommo doogo qiniitannonke gedeenni Magano xa'minke» yitusi.

⁶ Qeesichuno, «Kaaliiqi heddinoonnire wonshanno'nena keerunni hadhe» yee dawarinsa.

⁷ Hakkunni gedensaanni, ontunku manni hakkiichinni ka'e Layishi yinanniwa hadhu. Hakkiicho noo manni Sidoonootu gede, yaaddo nookkiha keere hee'rannoha ikkinota affu. Gobbate mitturino hoongori nookki daafira mannu dureeyyete. Sidoonootuwiinni xeerti're hee'ranno; aye ledono xaado diafi'rino.

⁸ Galagalte Tsorianna Eshitaooli higgu yannara manninsa, «Hadhini haja hiittooti?» yee xa'minsa.

⁹ Sonkirino, «Baatto lowo geeshsha dancha ikkitinota anfoommo; ma agartinanni? Ka'e, marre qansona. Mare baatto amadate lame wodana ikkitinoonte.

¹⁰ Martinanni woyite yaadikkinni hee'ranno mannira aanaho fultinanni; baattono hala'ladote. Maganu, mitturino hoongokki gobba angankera sayise uyinonke» yitunsa.

¹¹ Hakkunni gedensaanni, olu bagado qodhitinori 600 manni Tsorianninna Eshitaoolinni ka'e hadhu.

¹² Hadhe Yihudu gobbara Qiriyaati-Yiariimira soojjaatoonni kunseentu. Kunnira, hakkonne darga techo geeshsha, Daani Qachaati yinanni.

¹³ Hakkiinnino ka'e gaaraame Efireemi gobba Miika minira daggu.

¹⁴ Layishi baatto dooyyituri 5 manni roduuwinsara, «Tenne minna giddo mittoho birra aanaho xallinoonni misile, wole misillanna qeesimmanniti gagasu uddano noota affinoonnini? Ma"assa hasiissannoro malle» yitunsa.

¹⁵ Insano Miika minira e'e wedellicha Leewaawicha keere haadhu.

¹⁶ Olaho qixxaawe fulinohu 600 Daani manni waalchoho uurre agari.

¹⁷ Qeesichu olaho qixxaabbe fultinori 600 manni ledo waalchoho uurre hee'reenna, gobba dooyyite higguri ontunku manni minira e'e, birra aanaho xallinoonni misile, wole misillanna qeesimmannita gagasu uddano adhite fultu.

¹⁸ Kuni manni Miika minira e"e konne uduunne adhanna afe qeesichu, «Hiissitinanni heedhinoonni?» yee xa'minsa.

¹⁹ Insano, «Sammi yii! Cuqqi curuqqi yitooti. Ninke ledo heedhe amaalaanchonna qeesicha ikkinke; mittu mini callaho qeesicha ikkattontenni, Mitte Israeelete ga'rera qeesicha ikka diwoyyitannohe?» yitusi.

²⁰ Kuni coyi qeesicha hagiirsiisisi. Isino qeesimmannita gagasu uddanonna, misilla baala haa're insa ledo ha'ri.

²¹ Insano oosonsa saadansanna jajjansa baala adhite insa ledo karsamino manninni ikkite fulte hadhu.

²² Faffe hadhino woyite Miika ollaasi woshshe gamba assi're, insa ledo faana gane Daani ga're mare iilli.

²³ Badhensaanni cancitanni noota macciishshite, Daani ga're Miikara, «Maaho maikkitto? Konne manna baala mayira gudhite dayitto?» yite xa'mitusi.

²⁴ Isino, «Mayira maikkitto yitinannie? Seekki'roommota maganna'yanna qeesicha'ya adhitine hadhinoonni; hanni anera mayi gatinoe?» yiinsa.

²⁵ Daani mannino, «Mitto coyeno coyidhootinke. Konne manna hanqisittoro gawajjamatto; atinna mannikki gooffinanni» yitusi.

²⁶ Daani ga're togo yituhu gedensaanni doogonsa amadde hadhu. Miikano dandaannonsakkita afe agure minisira higi.

²⁷ Hakkunni gedensaanni Miika seekki'rino misillanna qeesichasi Layishira haadhe hadhuhu gedensaanni, yaaddo nookkiha keere hee'ranno manna marte qassu; katamansano giirtu.

²⁸ Hatti gosa Sidoonanni faffe heedhannohuranna ayi ledono xaadu noonsakkihura gatisannonsahanna ha'lannonsaha mittono diafidhino. Katamuno lagaho Beeti-Rehoobi mule no. Daani manni, katama galagalche mi'ne teesso assi'ri.

²⁹ Katamano Israeeli beetti anninsa Daani su'minni woshshitu. Katamunnihu albi su'mi kayinni Layishiiti.

³⁰ Hakkiicho Daani ga're Miika misilla uminsara uurrisidhe magansidhu. Muse beetti beetti, Gershoomi ilinohu Yoonaataani qeesimmatenni soqqaminsa. Israeele qafadantu barri geeshsha isi ilama qeesimmatenni soqqantanninsa heedhu.

³¹ Kunni garinni, Maganu mini Seelo hee'reennanni Daani ga're Miika misile magansidhanni heedhino.