EJJEETTO 17 - Qullaawa Maxaafa

MIIKA SEEKKINOTI KAPHU MAGANNA

¹ Gaaraame Efireemi gobbara hee'rannohu mittu Miika yinanni manchi no.

² Isino amasira, «1,100 birri moorameennahe, moorino mancho runtanna afoommona, birru anewa no; adhoommohu aneeti» yiise. Amasino, «Beetto'ya Kaaliiqi maassi'rohe» yitusi.

³ Birrase qoliseta amasi, «Rumo beetti'yara iillitannokki gede, birra'ya daashshine misile seekkinanni gede Kaaliiqira oomma» yitu. Kunnira, «Birra daware atera oommahe» yitusi.

⁴ Isi qole birra isera uyita, amasi aaninni 200 birra haadhe birra tumannohura uyitu. Birra tumannohuno haqqa bonce aanaho birra xallinoonni misile seekki. Misileno Miika mine heedhu.

⁵ Kunni Miika yinanni manchira magansi'nanni dargi noosi. Mini magannanna gagasu uddano seekki're oososi giddonni mittu qeesicha ikke soqqamanno gede assi.

⁶ Hatte yannara Israeelete moote nookki daafira, mannu baalunku lawisi gede ikke hee'ranno.

⁷ Yihudaho Beetelihemete hee'rannohu, mittu Leewaawichu wedellichi no.

⁸ Kuni beetti hee'rannowa hasi'ranni katamunni fule ha'ri. Ha'ranni gaaraame Efireemi gobbara noohuwa Miika minira mari.

⁹ Miikano, «Maminni dayitto?» yee xa'misi. Isino daware, «Ani Yihudu gobbanni Beetelihemete kataminni dayommo Leewaawichaati. Hee'reemmowa hasi'ranni ha'ranni noommo» yii.

¹⁰ Miikano, «Anewa heedhe amaalaanchonna qeesicha ikkie; anino imaanakkinna sagalekki, diru dirunkunnino 10 kinchu birra eemmohe» yiisi.

¹¹ Leewaawichuno ledosi hee'ra baxi. Miikara ilate gede ikke hee'ri.

¹² Miikano Leewaawicha qeesicha assi're wodhi; isino qeesicha ikke minesi hee'ri.

¹³ Miika, «Leewaawicha qeesicha assi're mine'ya wodhoommo daafira, Kaaliiqi danchare assannoeta xa afoommo» yii.