EJJEETTO 14 - Qullaawa Maxaafa

SAMISONI SEENNE ADHI

¹ Samisoni Temina yinanniwa dirre, hakkiicho Filisxeemete seenni giddonni mitte beetto layi'ri.

² Galagale qae daye annisiranna amasira, «Temina mitte Filisxeemitte beetto layi'roommona haadhe"e» yiinsa.

³ Annisinna amasino, «Fiixikkinna gosakki mereero atera ikkitanno beetto dinoni? Maganiweelo gosa giddonni seenne adhate mayira halchitto?» yitusi. Samisoni kayinni annisira, «Ane ise baxisinoena isella haadhe"e» yiisi.

⁴ Hatte yannara Israeele Filisxeeme gashshite noohura, Filisxeemete ledo gibbo kalaqantanno gede Kaaliiqi afe assino coye ikkinota annisinna amasi dibuuxxino.

⁵ Hakkunni gedensaanni Samisoni annisinna amasi ledo Temina dirri. Mittu woyinete kaashshi dargira iillitanni heedheennanni, mittu aju doobbiichi ittananni dayi.

⁶ Hatte yannara Kaaliiqi Ayyaani dirre wolqa wonshisi. Isino meichote goodane assinannihu gede asse amade anga callatennni tattayisi. Assinotano annisiranna amasira dikulino.

⁷ Hakkunni gedensaanni, mare beettote ledo hasaawi; iseno lowo geeshsha baxise.

⁸ Shiima yanna gedensaanni beetto adhara galagale higi. Doobbiichu reeshsha la"ara doogote aaninni wirri yaanno woyite, reeshshu giddono diishsho eessiisse no; giddono malawu no.

⁹ Malawo anga adhe itanni annisiwanna amasiwa iilli. Insarano malawo eennansa ittu. Doobbiichu reeshshi giddonni haa'rinoha ikkinota kayinni dikulinonsa.

¹⁰ Annisino beetto la"ara mari. Samisoni seerinsa garinni hakkiicho agattote jila jili.

¹¹ Filisxeemootu iso affuti, dukkissannosire 30 wedella uyitusi.

¹² Samisonino, «Mitte hibbo xa'meemmo'ne; lamalunku jilu barri giddo hibbote tiro kultiniero, 30 shaalado fuuttu imaana maareekote uddano ledo eemmo'ne.

¹³ Hibbo tira hoogginiro kayinni, 30 shaalado fuuttu imaana maareekote uddano ledo uyitinannie» yiinsa. Insano, «Maahoyyena hanni macciishshineemmona hibbo kulinkexa» yitu.

¹⁴ Samisonino, «Itannohu giddonni intanniri fuli; jawaatu giddonnino coommannori fuli» yii. Insano 3 barri geeshsha hibbo tira didandiitino.

¹⁵ Shoolki barra Samisoni galte, «Hibbote tiro kulannonke gede hanni ayiddaannikkira coyi'rinke. Hakkuyi ka'a kayinni, ateranna annikki minira giira qanseemmo. Woshshitinoonninkehu hada mulqidhinankeraati?» yituse.

¹⁶ Samisoni galteno heqqifatte wi'litanni isiwa marte, «Halaalinta ati ane giwoottoe! Hada dibaxattoe! Gosa'ya oosora hibbo uyite tiro mayira kula giwittonsa?» yitusi. Isino daware, «Anni'yaranna ama'yara kuloommokkire atera kulohe?» yiise.

¹⁷ Lamalanka jilu barra sammi yite wi'litu. Samisoni waaddeennasi hooge lamalki barra kulise. Iseno tiro massite gosase oosora kultunsa.

¹⁸ Lamalki barra arrishsho e'ara albaanni katamu manni, «Malawo roore mayi coommanna? Doobbiicho roore mayi worbanna?» yitusi. Samisonino, «Adde'yanni hawuudha hoogginoommero, tiro diafidhinanni» yiinsa.

¹⁹ Hakkunni gedensaanni Kaaliiqi Ayyaani dirre wolqa wonshisi. Asiqeloona Katama dirre 30 manna shii. Imaanansa haa're hibbo kulturira uyinsa. Isino buwe hanqe hee're annisi minira ha'ri.

²⁰ Ayiddaamasino dukkissusiri giddonni mittoho uyini.