EJJEETTO 12 - Qullaawa Maxaafa

YOFITAHENNA EFIREEMOOTA

¹ Efireemi ga're gamba yite Tsafooni sa'e Yofitahera, «Amoonoota qasattora fulitto yannara ledokki fulleemmo gede mayira woshsha giwittonke? Ati giddo heedheennanni minikkira giira qanseemmo» yitusi.

² Yofitaheno daware, «Aninna manni'ya Amoonootu ledo lowo geeshsha giwammummo waro woshshi'reenna daggine dikaa'litinoonnie.

³ Anino daa gibbinita afe mitte'ya assi're Amoonoota qasate fuloommo. Kaaliiqi kayinni qeelle uyinoe; techo ane qassinara mayira dagginiyya?»

⁴ Hakkunni gedensaanni, Yofitahe Geleaadi manna gamba asse Efireemi ledo olami. Efireemootu Geleaadi manna, «Ki'ne Efireeminna Minaasewiinni baxxitine fultinoonnireeti» yitinonsa daafira lowo geeshsha gawajjitunsa.

⁵ Geleaadootu Efireemira sayissannota Yordaanoosi lawo baala amaddu. Xooqe fulanno Efireemichi Geleaadi manna, «Saoni?» yee xa'miro, «Ati Efireemichaho?» yite xa'mitannosi. Hakko manchino, «Dee'ni» yee dawariro,

⁶ hanni «Shiiboleeti» yii yitannosi. Su'ma garunni gana hooge, «Siiboleeti» yiiro amadde hakkawoyintenni lawote shitanno. Kunni garinni 42,000 Efireemoota shitu.

⁷ Yofitaheno Israeele 6 diro gashshihu gedensaanni reenna, Geleaadi umisi katamira madaarroonnisi.

IBITSAANI, ELOOMI, ABIDOONI

⁸ Yofitahenni aane Beetelihemennihu Ibitsaani Israeele gashshi.

⁹ Isira 30 labballinna 30 seenni noosi. Seennesi wole ga'rera ee, oososirano wole ga're seenne haa'rino. Ibitsaani Israeele 7 diro gashshi.

¹⁰ Isono reenna Beetelihemete madaarroonni.

¹¹ Isi gedensaanni Zaabiloonichu Elooni Israeele 10 diro gashshino.

¹² Eloonino reenna Zaabilooni baattora Ayalooni madaarroonni.

¹³ Elooni gedensaanni Israeele, Phiriatoonichu Hileeli beetti Abidooni gashshino.

¹⁴ Isira 40 oosonna 30 oosote ooso noosi; mittu mittunkura guluffannoti uminsa harre noonsa. Isi Israeele 8 diro gashshino.

¹⁵ Hileeli beetti Abidoonino reenna, gaaraame Amaaleqootu gobbara Efireemi baattora Phiriatooni madaarroonnisi.