EJJEETTO 10 - Qullaawa Maxaafa

TOLA

¹ Abemeleeki gedensaanni Yisaakoori ga'renni Doodo beetti Fuha ilinohu Tola Israeele gatisara kai. Isino gaaraamete Efireemi gobbara Saamiri yinanni qachira hee'ranno.

² Tola Israeele 23 diro gashshihu gedensaanni reenna, Saamiri yinanniwa madaarroonnisi.

YAIIRI

³ Tolanni aane Geleaadichu Yaiiri kaino. Isino Israeele 22 diro gashshino.

⁴ Yaiirira 30 harre guluffannori 30 ooso noosi. Oososira xaa yannara Yaiiri qachuwa yinanniti 30 katamma Geleaadi baattora noonsa.

⁵ Yaiiri reenna Qamooni yinanniwa madaarroonni.

YOFITAHE

⁶ Israeelootu xaano Kaaliiqi albaanni bunshe assitu. Beaalinna Astaarooti hattono Sooriyunnita, Sidoonata, Moaabita, Amoonitanna Filisxeemete maganna magansidhu. Xaano Israeele Kaaliiqiwiinni baxxitu; isono magansi'ra agurtu.

⁷ Kunnira, Kaaliiqi Israeelete hanqe, Filisxeemootahonna Amoonootaho sayise hirinonsa.

⁸ Insano Yordaanoosira soojjaatoonni Amooraawootu gobbara Geleaadi heedhanno Israeele gadadissanni 18 diro gashshitu.

⁹ Amoonootu Yihuda, Biiniyaaminna, Efireemi ga're qasate Yordaanoosi fultino daafira, Israeele lowo geeshsha yaaddu.

¹⁰ Kunnira Israeele, «Ate Maganonke agurre Ba"aali maganna magansi'rankenni ate aana sao assinoommo» yite Kaaliiqiwa higge woxarattu.

¹¹ Kaaliiqino daware, «Gibitsootu, Amooraawootu, Amoonootu, Filisxeemootu,

¹² Sidoonootu, Amaaleqootunna, Maoonootu shetissino'ne. Kaa'leemmo'ne gede anewa higgine woxarattineenna, angansanni digatisoommo'ne?

¹³ Ki'ne kayinni ane agurtine wole maganna magansidhinoonni. Kunni daafira kunni ka'a digatiseemmo'ne.

¹⁴ Martine doodhitinoonni magannara woxaratte. Qarru iillanno'ne yannara hanni gatissanna'ne afeemmona!» yiinsa.

¹⁵ Israeelootuno Kaaliiqa, «Cubbo loonsoommota anfoommo. Atino hasi'ritto gede assa dandaattona, ballo techolla diininke anganni gatisinke» yitusi.

¹⁶ Hakkunni gedensaanni giddonsa noota allagga maganna hooltu. Kaaliiqano magansidhu; Kaaliiqino Israeelete gadado lae cinca hoogi.

¹⁷ Amoonootu olaho qixxaabbe Geleaadi kunseentu yannara, Israeeleno Mitsipha gamba yitu.

¹⁸ Hakkiicho noori Israeelete roorrooti insa insanaawa, «Amoonoota qanseemmo woyite albisannonkehu Geleaadi manni baalunkura roorricha ikkanno» yitu.