DAANIEELI 9 - Qullaawa Maxaafa

DAANIEELI MANNISI DAAFIRA HUUCCI

¹ Ilama Medoonicha ikkinohu Arxekisiisi beetti Daariyoosi Baabilooni gobbara moohi.

² Moohihunni umi diro ani Daanieeli qullaawa maxaaffa la"anni hee're, Kaaliiqi himanaanchu Ermiyaasira kulino garinni Yerusaalame diigante keeshshitannohure 70 dirire hedoommo.

³ Xiddu uddano uddi're, buluulu aana ofolle, ita aga agure, Mooticha Magano eegame huucci'rummo.

⁴ Manni'ya assino sao daafira aagintaawanni, «Waajjinannihu gondoorokkinna bagamannokkiha baxillekki agarattohu Mooticha Magano'ya,

⁵ ninke bunshenkenninna haxawarrimmankenni cubbo loonse sao assinoommo; seerakkinna hajajokki gimboommo.

⁶ Mootoollankera, gashshaanonkera, akaakkankeranna gobbate aana noo manni baalaho su'mikkinni coyidhinori soqqamaanokki himanaano yitinore dimacciishshinoommo.

⁷ Mooticha'ya! Ati wo'manka woyite suwashsho coye assatto; ninke kayinni techo geeshsha uminke aana shollinye abbi'noommo; Yihudahonna Yerusaalamete heedhannori, mulenna xeertote noo gobba baalate billaallitanno gede assootto Israeelooti baalu aana daanno coyi konneeti. Kaimuno atera ammanama hoongoommo daafiraati.

⁸ Mooticha'ya! Cubbo loonsoommo daafira uminke, mootoollanke, gashshaanonkenna akaakkanke aana shollinye abbi'noommo.

⁹ Mooticha Maganonke! Aye geeshshano gara gimbummohero, ati maarattohonna saonkeno agurattoho.

¹⁰ Kaaliiqa Maganonke! Soqqamaanokki himanaanote widoonni oottonke seera agadhineemmo gede kuloottonke. Ninke kayinni hajajoottore diwonshinoommo.

¹¹ Israeelootu baalunku seerakki diiggino; coyi'roottore baala macciishsha gibbino; ate aana sao assinoommohura soqqamaanchikki Muse seerira borreessinoonni rumo baala ninke aanira abbootto.

¹² Ninkenna albisootinke aana jawa qoomama abbattora coyi'rootto coye wonshootto. Kunnira Yerusaalamete iillino geeshshi qorichi wole mitte gobbarano di"iillino.

¹³ Muse seerira borreessinoonni garinni konne baala qoricha ninke aana abbootto. Kaaliiqa Maganonke! Kuni baalu ikke hee'reenna cubbinkenni higatenna halaalu hoode ha'rate maarokki daafira ate dihuucci'noommo.

¹⁴ Kaaliiqa Maganonke! Ati loosattori baalu garaho; ninke kayinni hajajama gimboommohe daafira konne baala qarra abboottonke.

¹⁵ «Mooticha Maganonke! Kunni albaanni mannakki jawaata cigilekkinni Gibitsetenni fushshite su'makki techo geeshsha lowo mannira egennamanno gede assootto. Ninke kayinni cubbaataammanna sao assineemmore ikkinoommo.

¹⁶ Mooticha'ya! Kunni albaanni wonqonke ikkite assoottoha dancha coye qaagge eeggatena hanqokkinna aarakki qullaawu ilaali aana noohu katamikki Yerusaalamete aaninni hooli. Ninkenna akaakkanke assitino saonni kainohunni Yerusaalamenna mannikki wole gosa oso'litannoha ikkino.

¹⁷ Maganonke! Huuccatto'yanna eegama'ya macciishshi. Mooticha'ya! Su'mikkira yite diigaminoha Qullaawa Minekki gatamari.

¹⁸ Magano'ya! Eeggatena kawa higge huuccattonke macciishshi! Shettonkenna su'mikkinni woshshamanno katamira iillitino bao baala lai. Atewa hinge huucci'neemmohu ati shaqqado ikkootto daafiraati ikkinnina danchummanke hexxine di"ikkino.

¹⁹ Mooticha'ya! Maccakki ninke widira qoli; maarinke; macciishshinke. Kuni kataminna kuni manni atehona, keeshshittokkinni su'mikkira yite mitto coye assinke» yee huucci'roommo.

GEBIRIEELI HIMANU TIRO KULI

²⁰ Umi'yahanna gosa'ya Israeelete cubbo aagintaawanni, Qullaawa Mine gatamaranno gede Kaaliiqa Magano'ya lede huucci'roommo.

²¹ Tenne huuccatto aana hee'reenna, umi ajuujanni laummohu Gebirieeli hawarro kakkalo shiqinshanni yannara ani noommowa rahe buuwanni dayi.

²² Isino, «Daanieeli! Ani kawiira dayommohu himanunniha go'lino coye afatto gede egennonna wodancha aammoheraati.

²³ Huucci'ra hanaffanni heedheennanni Maganu huuccattokki macciishshinohe. Isi baxinohe daafira huuccattokki dawaro kulammohera dayommo. Kunnira kuleemmohe coye macciishshite ajuujate tiro buuxi.

²⁴ «7 hige 70 lamala yinannihu Maganu mannakkinna qullaawa katamakki cubbunninna bunshetewiinni keere fushshate hirqino yannaati. Hatte yannara cubbu aguramanno; hegere halaali darga amadeenna ajuujanna himanu wo'manno; Qullaawa Mineno gatamarre maassi'nanni.

²⁵ Konne coye wodana assi. Yerusaalame gatamarrara hajajo fultuhunni kayise, Buuraminohu daa geeshsha 7 hige 7 dirinna 7 hige 62 diri sa"anno. Yerusaalameno gatamarranni; doogganna qiishose baala seekkinanni. Ikkollana kuni baalu qarru diro ikkanno.

²⁶ Leyayina lame lamala wo'mituro Buuraminoha shinanni; katamanna Qullaawa Minesi mittu jawu albisi gaadisanno olanto co'o assite huntanno. Goofimarchu yanna lolahu gede hedeweelcho dagganno; Maganu qixxeessino olinna bao goofimarchu geeshsha diuurritanno.

²⁷ Hakku albisi lowo manni ledo 7 diri geeshsha jawaata gondooro eanno; 7 dirinna daratu sa"anno woyite Maganoho uyinanni kakkalonna fushshaate hoolanno. Qullaawu Mini aana baote batte uurrisanno. Kuni ikkannohu Maganu hirqino garinni hakku albisi ba"anno yanna dagga geeshshaati» yii.