DAANIEELI 8 - Qullaawa Maxaafa

DAANIEELI AJUUJATENNI AFINOTI GE'RECHUNNA MEICHU GOCCA

¹ Belshaatsaari moohihunni sayikki diro, ani Daanieeli kunni albaanni afummotenni baxxitinota wole ajuuja afoommo.

² Elaami awuraajjira kinchunni huxxinoonnihu dannawunnihura Suusa Katamira Ulayi Wayi mule uurre hee're ajuujatenni anenee afummo.

³ Hakko Wayi gama 2 seeddaanna buudda afi'rinohu mittu ge'rechu goci uurre no. Layinki buudi gede'ne fulinoho; ikkirono seendille balaxe fulinoha rooranno.

⁴ Hakku goci alba galchimira, aliyyeranna wodiidira hige buuddasinni kibbara geegganna afummo. Albisira shiqe ittisasira woy isiwiinni xooqe fulara dandaanno moyichi dino; hasi'rinore baala assanni, albinni roore wolqa lexxi.

⁵ Tenne ajuujare hedanni hee'reenna illuwasi qarrira lowo buuda afi'rinohu mittu meichu goci baatto kisikkinni iima buuwanni galchimi raginni dayi.

⁶ Isino wayi gama uurre hee'reenna afummohuwa 2 buuda afi'rino goci ge'rechunnihuwa lowo hanqinni qoqqobbise mari.

⁷ Ani la"anni hee'reenna ge'rechu gocira lowo geeshsha hanqe kibbe lamenka buudasi hiiqqaqqi; ge'rechu gocino gargadha didandiino. Kunnira ge'rechu goco uulla kare kakkadi; isiwiinni gatisasira dandiinohu dino.

⁸ Meichu goci lowo geeshsha jawaati; haxawarre hee'reenna jawu buudisi hiiqqami. Dargaho shoole lowiddaanna buudda fultu; mittu mittunku buudi addi addi raga hige no.

⁹ Tenne shoolente buudda giddo mittichu aana wolu shiimu buudi fuli; kunni shiimu buudi wolqa wodiidira soojjaatiranna dancha hexxote gobba widira higge hala'litu.

¹⁰ Gordu olantonna beeddahe iilla geeshsha jawaate lophi. Insa giddonnino gamisa dirrise baattote aana kakkadi.

¹¹ Gordu olanto Mootichano hettisi; barru barrunkunni isira shiqinshanni kakkalo gattanno gede assi. Qullaawa Mineno batteessi.

¹² Mannuno barru barrunkunni shiqinshanni kakkalo shiqisha agure cubbo loosi; halaalaancho amma'nono uulla tugantu; kunni buudira assannori baalu qiniisi.

¹³ Hakkunni gedensaanni mittu qullaawu sokkaasinchi wole sokkaasincho, «Kuni ajuujatenni leellanno coyi wo'mannohu mamooteeti? Bao abbitanno bunshenna wo'ma woyite kakkallanni darga amade keeshshannohu mageeshshi geeshshaati? Qullaawu Mininna gordu olanto kakkadantanni keeshshitanno gede Maganu wore la"annohu mamooti geeshshaati?» yee xa'manna afoommo.

¹⁴ Xa'mini sokkaasinchino, «Tenne kakkalo shiqinshikkinni 2,300 soodonna hawarro ikkanno. Hakkunni gedensaanni Qullaawu Mini keeraa'manno» yee qolanna macciishshoommo.

SOKKAASINCHU GEBIRIEELI AJUUJATE TIRO KULI

¹⁵ Ani Daanieeli ajuujate tiro maatiro hedanni hee'reenna hedeweelcho mittu manna lawannorichi daye alba'yaanni uurri.

¹⁶ Ulayimi Wayi aanaanni higge, «Gebirieeli! Kuni manchi ajuujate tiro buuxanno gede assi» yitanno huuro dagganna macciishshoommo.

¹⁷ Gebirieeli daye mule'ya uurrita mase baattote aana uwoommo. Isino, «Koo mancho! Ajuuja kalqete goofimarchire kultannota ikkitinota huwati» yiie.

¹⁸ Coyi'ri yannara uwoommowa hee'reenna goxano adhite ba'ue. Isi kayinni baattote aaninni amade kayise lekka'yanni uurreemmo gede asse,

¹⁹ «Ajuuja kalqete goofimarchire kultanno daafira, Maganu hanqinni kainohunni ikkannore kuleemmohe.

²⁰ «Lame buuda afi'rinohu ge'rechu goci Medooninna Faarisi gashshoote leellishannoho.

²¹ Meichu goci Giriikete gashshoote leellishanno. Illuwasi qarrira noohu lowo buudi qole umiha Giriikete moote leellishanno.

²² Umi buudi hiiqqameena fulturi shoole buudda hakku gashshooti shoolewa beehamannota leellishshanno. Shoolunku gashshooti umi gashshooti geeshsha jawaattinore ikkitannokkita kulanno.

²³ «Hakkuri gashshootiti bunshensa batidhanno yannara goofimarchinsa iillanno; kakkachu, kaajjadunna xagaraamu moote ka"anno.

²⁴ Kuni moote lowo geeshsha jawaata ikkanno. Ikkollana umisi wolqanni di"ikkino; lowo geeshsha busha coye assanno; assannori baalu qinaannosi. Jajjabbunna Maganu manni aana bao abbanno.

²⁵ Lowo geeshsha xagaraamo ikkinohura hanaaqunni duroo'manno; umosi baalunkura aliidiha assanno; lowo manna mittore qorophisiisikkinni shaanno; wo'munkura aliidi moote ikkinoha Magano nafa ugganno; goofimarchoho isi umisi ba"anno. Ikkollana ba"annohu mannu wolqanni di"ikkino.

²⁶ Soodonna hawarro kakkalo daafira kulloonni ajuuja wo'mitannote. Ikkirono wo'mita geeshsha lowo yanna gattanno daafira maaxxe amadde agari» yii.

²⁷ Ani Daanieeli lowo geeshsha daafuroommo daafira xisseennae lowo barra goxoommo. Hakkunni gedensaanni kae moote uyinoe looso loosummo; ajuuja lowo geeshsha yaachishshinoe daafira wodancha didandoommo.