DAANIEELI 6 - Qullaawa Maxaafa

DAANIEELI DOOBBIYU BALERA TUGAMI

¹ Daariyoosi gobba gashshitannore 120 gashshaano wori.

² Qoleno isira aante mitturino xeannosikki gede kaa'litannorenna wole gashshaano towattannore Daanieelinna woloota 2 manna doori.

³ Daanieeli afi'rinotenni addi guuntenni woloota roorinota loosisinni leellishi. Kunnira moote gashshootisi baalu aana roorricha asse worasira hedi.

⁴ Hakkunni gedensaanni ledosirinna wole gashshaano Daanieelinna isi loosanno loosi gashshootunnihu aana xe'o hasse su'ma huntasira heddu. Ikkollana Daanieeli lowo geeshsha qorophannohanna ammanaminoha ikkinohura, mitte so'ro woy sao aanasi affara didandiitino.

⁵ Kunnira insa insanaawa, «Amma'note haja widoonni anfanni so'ro heedhuro ikkinnina Daanieeli bushiinshanni doogo mitteno diafi'neemmo» yitu.

⁶ Hakkunni gedensaanni mootenniwa marte, «Moote Daariyoosi! Ati hegerera hee'ri!

⁷ Gashshootikki looso loosate doorammoommo towataasine, amaalaasinenna gobba gashshitannori baalu sumuu yinoommohu mittu coyi no. Hakkuno xaanni kayise 30 barri geeshsha ate agurranna wole magano woy wole mancho huucci'nannikki gede lallawisiisattora hasi'neemmo. Konne lallawa diigannohu hee'riro doobbiyu balera tunganni gede hajaji.

⁸ Kunnira moote, kuni lallawi Medooninna Faarisi seeri garinni ayirradonna soorramannokkiha ikkanno gede malaatisi» yitu.

⁹ Kunni garinni moote Daariyoosi lallawa borreessineenna malaatisi.

¹⁰ Daanieeli lallawa malaatinsoonnita afihu gedensaanni galanno minira iimaanni noo dargira fuli; galanno mini aana noo dargi Yerusaalamete alba higginoti fa'nantino masikootta noosiho. Alba rosinonte gede guluphe Maganosi galaxxanni barrunni 3 hige huucci'ri.

¹¹ Isira gano gantannori mitteenni marte, Daanieeli Maganosi huucci'ranna affu.

¹² Baalunku mitteenni mootenniwa marte Daanieeli lallawa diigino daafira, «Moote! 30 barri geeshsha ate agurranna wole magano woy wole mancho huucci'rannohu hee'riro doobbiyu balera tugamanno gede lallawu aana dimalaatisitto?» yitu. Mooteno, «Ee! Medooninna Faarisi seeri garinni ayirradonna soorramannokki gede asse lallawu aana malaatisoommo» yii.

¹³ Insano, «Hatto ikkiro moote, Yihudunni qafadante dagginori giddonni Daanieeli ate ayirrisa giwino; malaatisse fushshootto lallawano diige barrunni 3 hige maganosi huucci'ranni no» yitu.

¹⁴ Mooteno konne coye macciishshe lowo geeshsha dadilli. Daanieelino gatisasira hedi. Arrishsho e'a geeshsha iso gatisanno doogo baala afi'rara wo'naali.

¹⁵ Daanieeli baarigaarra mitteenni dagge, «Moote! Medooninna Faarisi seeri garinni mittu moote fushshino lallawa woy hajajo soorra dandiinannikkita afi!» yitusi.

¹⁶ Kunnira Daanieeli amande abbine doobbiyu balera tunganni gede moote hajaji. Daanieelino, «Wo'manka woyite ammanamatenni soqqamattosi Magani gatisohe!» yiisi.

¹⁷ Balete afoono kinchunni cunfi; aye manchino Daanieeli fushshe gatisara wo'naalannokki gede moote gashshootisihanna ledosi gashshaano maatama aanaho gani.

¹⁸ Mooteno mootimmasi minira ha'ri; sagaleno di"itino; hagiirsiisanno coye shiqinshannisita giwe goxanono hooge gali.

¹⁹ Soodo duu'mo saaqqanni heedheennanni moote rahe kae doobbiyu balewa mari.

²⁰ Hakkiira iille dadillaamu qaalinni, «Heeshshote Magani soqqamaancho Daanieeli! Barru baala ammanamatenni soqqamattosi Magani doobbiyu afiinni gatisahera dandiinoni?» yii.

²¹ Daanieelino daware, «Moote! Hegerera hee'ri!

²² Doobbiyu gawajjannoekki gede Maganu sokkaasincho soye afoonsa cufino. Togo assinohuno ani keeraancho ikkoommotanna ate aanano sao assoommokkita afinohuraati» yii.

²³ Mooteno lowo geeshsha hagiidhe, Daanieeli balete giddonni fushshitannosi gede hajaji. Fushshini woyite Magano addaxxinohura bisisi aana mitte madano dianfoonni.

²⁴ Hakkunni gedensaanni Daanieeli bushiishshure amande abbinanni gede moote hajaji; insa, meentonsanna oosonsa mitteenni doobbiyu balera tunganni gede assi. Balete hundira iillitukkinni doobbiyu iima amade bibbidinsa; miqqansa baalano cancani.

²⁵ Hakkunni gedensaanni moote Daariyoosi gobba baalate hee'rannohuranna addi addi afiinni coyi'ranno mannira borrotenni, «Keeru ki'nera ikko!

²⁶ Gashshooti'ya giddo hee'ranno manni baalu, Daanieeli Magano waajjanno gedenna, ayirrisanno gede lallawunni hajajoommo. Maganisi heeshshonnihonna hegerera hee'rannoho; isi hegere hegerera mootete; gashshootisirano gawalo dino.

²⁷ «Isi gatisanno; gargareno fushshanno; isi gordohonna baattote aana, dhaggenna maalale assanno. Daanieelino doobbiyu afiinni gatisino» yee sokka soyi.

²⁸ Daanieeli Daariyoosinna Faarisi moote Qiroosi gashshooti yanna baalate ayirre hee'ri.