DAANIEELI 5 - Qullaawa Maxaafa

MOOTE BELSHAATSAARI JILA

¹ Belshaatsaari moohe noo waro mitto barra kumunni kiirranni ayirraddira lowo jila jili. Insa ledono woyinete xajje agi.

² Woyinete xajje aganni hee're Belshaatsaari annisi Nabukadanatsoori Yerusaalametenni Maganu Mininni haa're abbinore woyinete xajje agate culkunninna birrunni seekkinoonni uduunne abbitanno gede soqqamaanosi hajaji. Hatto assinohuno isinna ayirraddisi, qataanyunna irkote meentisi hakkunni uduunninni agganno gede hasi'reeti.

³ Soqqamaanosino Yerusaalametenni Maganu Mininni abbinoonniha culku uduunne hakkawoyintenni haadhe shiqishshu; mootenna ayirraddisi, qataanyunna irkote meentisi hakko uduunninni woyinete xajje aggu.

⁴ Agganni heedhe culkunni, birrunni, camotenni, siwiilunni, haqqetenninna kinchunni seekkinoonni maganna galaxxitu.

⁵ Hedeweelcho mannu anga fulte caabbiyye worrannihura albaanni nootera maarrangoonnitera Qullaawu Mini xarra aana borreessa hanaffu. Anga borreessitanni heedheenna moote afi.

⁶ Hakkawoyintenni mootete albi kolossi yii. Masillu batinyinni kainohunni lekka qece qece yitusi; wolqano waa ikkitusi.

⁷ Qaalloole, masaalaanonna ayyaanto woshshinannisi gede hirrate coyi'ri. Insano daggeenna moote, «Tenne borro nabbawe tiro kulannoehu mootennita xiillitte uddano uddi'ranno; ayirrinyu malaate ikkitinota culku cagaage goowaho worrannisi; gashshooti'yarano sayikki darga amadanno» yii.

⁸ Amaalaasinesi isiwa daggu; ikkollana insa giddonni borro nabbawanna tirose kula dandiinohu mittuno dino.

⁹ Moote Belshaatsaari lowo geeshsha yaadinohura albisi lede kolishshi'ri. Ayirraddisino amaddannore hoogge gara habbu.

¹⁰ Mootitte amasi isihanna ayirraddisi canco macciishshite jilu minira e'e, «Moote! Hegerera hee'ri! Kunni coyira kageeshshi geeshsha yaadanna albikkino kolossi yaa dihasiissanno.

¹¹ Qullaawa maganna ayyaana afi'rinohu mittu manchi gashshootikki giddo no. Kuni manchi annikki gashshooti yannara magannannite gedee egenno, hayyonna wodancha wo'mitinoha ikkinota anfoonni. Kunnira annikki moote Nabukadanatsoori kiilaano, qaalloole masaalaanonna ayyaanto baalate sooreessa asse shoominosi.

¹² Isi haaqeenna hibbo tiratenna go'lino coye xawise kulate addi guunte afi'rino egennaamootinna hayyicha manchooti. Kunnira annikki Nabukadanatsoori, ‹Bilxaasoori› yee su'ma fushshinosiha Daanieeli woshshi'ri. Isi konne coye tire kulannohe» yitusi.

DAANIEELI MOOTETE GO'LITINOTA BORROTE TIRO KULISI

¹³ Hatte yannara Daanieeli mootete albira shiqi. Mooteno, «Ati Daanieeli anni'ya moote Yihudunni qafade abbinori ledohoni?

¹⁴ Magannate ayyaani noohetanna egenno, hayyonna wodancha afi'roottoha ikkoottota macciishshoommo.

¹⁵ Kuneeti egennaammunna amaalaasine'ya baalu tenne borro nabbabbe tirtannoe gede woshshineenna anewa daggino; ikkollana tirte kultaera didandiitino.

¹⁶ Ati kayinni go'linohanna qarrisino coye baala tira dandaattoha ikkoottota macciishshoommo. Kunnira tenne borro nabbabbe tiro kulittoero, mootennita xiillitte uddano uddi'ratto; ayirrinyu malaate ikkitinota culku cagaage goowaho worrannihe; gashshootiya'rano sayikki darga amadatto gede asseemmohe» yiisi.

¹⁷ Daanieelino, «Moote'ya! Afanshikki atenkalla ikko; ba'raasattoera hedoottoreno woleho uyi. Borro kayinni nabbawe tiro kuleemmohe.

¹⁸ «Moote'ya! Wo'munkura Aliidi Magani annikki Nabukadanatsoorira mootimmanna jawimma, ayirrinyenna gaacheena uyinosi.

¹⁹ Jawimmasinni kainohunni addi addi gobbara hee'rannohu addi addi afiinni coyi'ranno manni baalu iso waajje huxi'rino. Hasi'rinoha shaanna gatisa, moohisanna moofisa dandiino.

²⁰ Ikkollana boonaleessa, hettisamaanchonna kakkacha ikkita, gaacheenisi mulqameenna ayirradu barcimisi aaninni dirrino.

²¹ Mannu mereerinni fule, wodanisi soorrameenna saadate gedeeha ikkino; handu gede hayisso itanni gobba harre ledo hosannoha ikkino. Galannowa hoogeenna manninatisi aana loju dirrino. Kuni ikkinohuno Wo'munkura Aliidi Magani mannu gashshooti baalu aana roorre afi'rinotanna gashshoote hasi'rinohura aa dandaannota afa geeshshaati.

²² «Ati Belshaatsaarino isi beetto ikkakkinni konne baala affanni heedhenni umokki heeshshi assite joongille dileellishootto.

²³ Hakkiinnino sa'e gordu Mootichi aana boo'natenni umokki gotti gotti assootto. Maganu Mininni gurre abbinoonni uduunne abbisiisseenna atinna ayirraddikki, qataanyunnihunna irkote meentikki woyinete xajje agginoonni. Agginihu gedensaanni la"a woy macciishsha dandiitannokkirenna mittoreno assite affannokkire culkunni, birrunni, camotenni, siwiilunni, haqqetenninna kinchunni seekkinoonni maganna galaxxitinoonni. Shaahera woy gatisahera dandaannohanna assattore baala afannoha Heeshshote Magano kayinni diayirrisootto.

²⁴ Kunnira Maganu mannu anga soye konne coye borreessitanno gede assino.

²⁵ «Borrono, ‹Maane! Maane! Teqeli! Faareesi!› yitannote.

²⁶ Tiroseno aante noote: Maane yaa, Maganu gashshootikki diro kiire goofanno gede assino yaate.

²⁷ «Teqeli yaa, keenaasinchunni keenante, shotte leellootto yaate.

²⁸ «Faareesi yaa, gashshootikki beehame Medooninna Faarisi mannira aamamino yaate» yee kulisi.

²⁹ Hakkunni gedensaanni Belshaatsaari hakkawoyintenni Daanieelira mootennita xiillitte uddano uddisiinsannisi gede, ayirrinyu malaate ikkitinota culku cagaage goowaho worrannisi gedenna gashshootisi giddo sayikki gashshaancho ikkanno gede lallawisiisi.

³⁰ Hakko hashshanni Baabilooni moote Belshaatsaari shini.

³¹ Hatte yannara 62 dirihu Medoonichu Daariyoosi gashshootesi ragi'ri.