ASTEERI 8 - Qullaawa Maxaafa

AYIHUE DIINANSA QOLTE QASSANNO GEDE KULLINSA

¹ Moote Arxekisiisi Ayihudete diinita Haama jiro baalanta hakko barranni mootitte Asteerira uyise. Asteerino, Merdookiyoosi isera gamba yiino fiixa ikkinota mootete kultu. Hatte yannanni kayise Merdookiyoosi mootenniwa maranno gede fajjinisi.

² Mooteno maatamisi aanaho noota Haama qubbichinni fushshine abbinoonni cuuicho Merdookiyoosira uyisi. Asteerino, Merdookiyoosi Haama jiro annimmatenni amadanno gede uyitusi.

³ Hakkunni gedensaannino Asteeri mootete lekkara ubbe wi'litanni qarrase ledde ku'litu. Agaagi sircho ikkinohu Haama Ayihudete ganino gano hoolanno gede huuccidhu.

⁴ Mooteno culku siqqicho ise widira qole akeeki. Iseno gotti yite albasiinni uurrite,

⁵ «Baxattoehanna kaa'lattoeha ikkiro, qoleno yeemma coyi gara ikkironna maahoyye yaattoeha ikkiro gashshootikki giddo noo Ayihude baala co'o assine gundanni gede Agaagi sircho ikkinohu Hamadaata beetti Haama hajajino hajajo shaaranno lallawa fushshatto gede huucci'reemmahe.

⁶ Tini bao gosa'ya aana dagganna, fiixa'yano shine gundanna cince afeemmani?» yitu.

⁷ Hakkunni gedensaanni moote Arxekisiisi, mootitte Asteerinna Ayihudicha Merdookiyoosi, «Kuneeti Haama Ayihudete ganino ganora dawete aana sutisiise jirosi baalano Asteerira oommoti anfoonnite.

⁸ Ikkollana mootete maatama gannoonnihunna mootete su'minni lallamboonni lallawi disoorramanno. Ikkirono ki'ne hasidhinoonni coye Ayihudete borreesse; ane su'minni borreessitinihu gedensaanni mootimmate maatama aanaho ganne» yiinsa.

⁹ Hatte soodonni Siwaani yinannihu sayikki agani eihunni lemiina sayikki barra, Merdookiyoosi mootete borreessaano woshshe Ayihudete, Hindetenni kayise Itiyophiyu geeshsha nootera 127 gobba gashshitino roorrootiranna sooreeyyera sonkanni sokka borreessitanno gede assi. Borrote sokkano addi addi afiinni tirreenna, addi addi budinni borreessite, hattono Ayihudootu afiinnino tirreenna borronsa budi garinni borreessitanno gede assi.

¹⁰ Merdookiyoosi borrote sokka baala moote Arxekisiisi su'minni borreessiise mootimmate mini maatama aanaho gani. Borrote sokkano mootete mini gollora maddarranni farado guluffe rakke iillishshannorira sonki.

¹¹ Borrote sokka giddo borreessinoonni coyi baalunku katamira heedhanno Ayihudooti iillitannonsa gawajjo hoo'late gamba yite kaa'lantanno gede moote fajjinota kulannoho. Kunni garinni, hiitte gobbahuno woy hiitte ilamahuno ikkiro bagado adhe daye mannansa, oosonsanna meentonsa gawajjannoha ikkiro, insano qolte diinansa, diininsa meentonna oosonsa mittuno gatikkinni shite mucuqqi assite gudde jajjansa baala gudha dandiitanno.

¹² Tini mootete hajajo, Ayihude shee gudate hendoonnihura tonaa layinki agani Adaarihu eihunni tonaa sayikki barra, Faarisi moote gashshooti baalu giddo wo'mitanno gede assini.

¹³ Hajajono gobba baalate seeru gede assine lallambeenna mannu baalu afanno gede ikkitu. Kunni garinni Ayihudootu hakko barra diinansa rabbisi'rate qixxaabbu.

¹⁴ Farado guluffannorino mootete hajajo garinni harfiixa mootete farado guluffe rakke hadhu. Mootete hajajono dannawu katamira Suusa faajjete lallambe kulli.

¹⁵ Merdookiyoosi kuulaamenna waajjo mootete mini uddano uddi're, xiillicha kaabba aanaho ga'ne, xuma culku ba'latto umoho wodhe mootete mininni fuli. Mannuno hagiirrunninna ililleettetenni Suusa Katama milli assi.

¹⁶ Tini Ayihudete hagiirru, hisanyootu, harshammotenna ayirrinyu yannaati.

¹⁷ Mootete lallawa kulloonni gobbaranna katamma baalate heedhanno Ayihude hakko barra ayyaana ayirrisse hagiidhitanni ji'litu. Kunninni kainohunni lowohu wole gobba manni Ayihude waajje insa widira higi.