AMOOTSI 9 - Qullaawa Maxaafa

KAALIIQI ISRAEELETE YAANNO YOO

¹ Kaaliiqi kakkalote dargi mule uurre nooha afoommo. Isino, «Uurrinanni dargi shafamanno gede, Qullaawu Mini heelliicho gani; minu tattae mannu aana uwanno gede assi. Hakkiinni gattinore ani bagadunni gudeemmo; xooqannohu xooqe fule diafanno; xooqe fulinoha lawannosihuno digatanno.

² Bale u'mite jeennaate dirrituro nafa, ani insa hakkiinni haa're fushsheemmo; iimira gordo higge buubburo nafa, galagalche uullara dirriseemmonsa.

³ Qermeloosi Ilaali birxera marte maaxanturono, faana gane hakkiinni dirriseemmonsa; baaru giddora e'e anewiinni maaxanturono, qasanno dhudhuufa hajajeemmo.

⁴ Diinnansa qafadde haadhe hadhunsarono, shitannonsa gede qafaddinonsare hajajeemmo. Kunni garinni ani insa kaa'late ikkikkinni, hunammora kaoommo» yii.

⁵ Olantote Mootichi Kaaliiqi baatto amammadanno; iseno shiiltanno. Abbayi Wayi wo'me iima hige ka"annonte gede, baatto baala hembeelantanno; baattote aana hee'rannohu baalu wi'lanno.

⁶ Maganu hee'rannowa gordoho mi'nino; gordo baattote iimaanni qole guggushshi. Baaru waa gordu iimira fushshe, galagale baattote aana lolaasanno; konne baala assannohu Maganoho; su'misino Kaaliiqaati.

⁷ Kaaliiqi, «Israeelete manna! Ki'ne anera Itiyophiyu manni gedeere di"ikkitinoonni? Ki'ne Gibitsete gobbanni fushshummonte gede, Filisxeemete manna Kereetinni, Sooriyu mannano Qiiri gobbanni fushshoommo.

⁸ Olantote Mootichi ani Kaaliiqi, haxawarra Israeelete gashshoote illaallise laeemmo; insano gobbate aaninni huneemmo; ikkirono, Yaiqoobi sircho co'o asse digudeemmo.

⁹ «Israeelete manni giddonni tidhitinokkire bade hoolate, insa gidu gede asse meemmiisseemmo; hatto asseemmohuno dagate mereero heedhanno yannaraati.

¹⁰ ‹Mittuno bushu coyi di"iillannonke woy diamadannonke› yitanni, manni'ya giddo boo'nitanno cubbaataammi baalu olu giddo reyitanno» yii.

ISRAEELETE MANNITA GALAGALE HIGATE HEXXO

¹¹ Kaaliiqi, «Diigame uwino mini gede ikkinoha, Daawiti gashshoote galagalche uurriseemmo yanna dagganno. Huxxano dhaaweemmo; diigaminohano gatamareemmo; albi gede asse haaroonseemmo.

¹² Kunni garinni Edoomi gobbanni gattinorenna, woloota su'mi'yanni woshshantanno gosa baala ragidhanno. Konne baalankare asseemmohu ani Kaaliiqi konne coye coyi'roommo» yii.

¹³ Kaaliiqi lede, «Gide murre gundikkinni, loosi'nanni yanna dagganno; woyinete laalo huuncine gundikkinni, woyine kaansanni yanna dagganno. Hatta yannara ilaalla, coommitannota haaro woyinete xajje fushshitanno; tulluwate aanano woyinete xajje lolakkanno.

¹⁴ Manna'ya Israeele galagalche gobbansa qoleemmo; diigantino katamma galagalchite mi'nite giddonsa heedhanno. Woyineno kaasidhe woyinete xajje agganno; addi addi haqqe kaasidhe laalonsa ittanno.

¹⁵ Manna'ya Israeele oommonsa baatto aana kaaseemmo; layinkimeeshsho hakkiinni dibuqqisantanno. Konne coye coyi'roommohu ani Kaaliiqi Magano'neeti» yii.