Ucab Tzijobelil 8 - Quiché Bible

Niq'uiaj tak u banoj chic ri Salomon

¹ Oc'owinak chic juwinak junab chwi' ri u yaquic ri rachoch ri Ajawaxel rumal ri Salomon xukuje' ri kas rachoch ri cajawin wi,

² xuban c'u qui banic ri tak tinimit ri e u jachom ri Hiram che xebucoj c'ut ri aj israelib chquipam.

³ Chwi chi c'u wa' xwalijic xbe che u tokixic ri Hamat re Soba, xk'ax c'u pa u k'ab.

⁴ Xukuje' xuban u banic ri Tadmor, ri c'o chupam ri chaki'j uwo sak, xukuje' conojel ri tinimit ri quebuc'ol wi tak ri tzukbal ib, ri xebuyac pa Hamat.

⁵ Xukuje' xebuc'ojoj ri Bet-horon ri c'o ajsic xukuje' ri c'o iquim, tak tinimit ri co xecanajic, ri e c'o tak tapia chquij, oquibal tak xukuje' bolobak tak ch'ich',

⁶ xukuje' ri Baalat xukuje' ri niq'uiaj tak tinimit chic ri quebuc'olajij wi tak ri tzukbal tak ib, conojel tak ri cachoch ri e ajch'ojab ri cachoch ri carwaj que tak ch'o'j ri cachoch tak ri ajch'ojab ajquiejab xukuje' ronojel ri xraj xuyac pa Jerusalen, pa ri Libano xukuje' pa ronojel ri ulew ri c'o chuxe' ri u takanic.

⁷ E are' tak c'ut ri winak ri e aj hititib, amoreyib, hebeyib, perezeyib xukuje' jebuseyib ri xecanaj canok, ri man aj israelib taj,

⁸ ri u bixic, ri e quija'lil ri xecanaj canok pa ri ulew ri xsachisax qui wäch ri man xq'uis ta tzij paquiwi' cumal ri aj israelib, ri Salomon xebutak che u banic chac pune' man cäcaj, c'ä je c'u takem u banic chque c'ä camic.

⁹ Mawi c'u jun aj israel xucoj ta chuk'ab che chi patanijic jacha' jun lok'om pataninel pa tak ri e u chac, xane' e jacha' ajch'ojab, c'ämal tak be quinimal tak ajch'ojab re jujun tak mil xukuje' takanelab paquiwi' tak ri qui carwaj ri quech'ojinic xukuje' paquiwi' ri ajquiejab ri quech'ojinic.

¹⁰ E are tak c'ut ri e takanelab ri e c'o paquiwi' ri ajchaquib ri e c'o ruc' ri Salomon, e quieb sient cawinak lajuj (250).

¹¹ Ri Salomon xuk'axej ri u mia'l ri rajawinel ri Ejipt chupam ri u Tinimit ri David chupam ri ja re ajawibal ri xuyac ri Salomon che, rumal rech chi xuchomaj chi ri rixokil man cuya' taj cajeki' chupam ri rachoch ri David, rajawinel ri Israel, e are' tak c'ut ri c'olbal ri oquinak wi ri u caxa ri Ajawaxel e tastalic.

¹² Ri Salomon quebuchi'j che ri Ajawaxel tabal tak tok'ob ri quechajirisaxic puwi' ri porobal ri xuwoc che ri Ajawaxel chuwäch ri u rakan ja ri rachoch Dios.

¹³ Pa tak ri k'ij ri rajawaxic qui chi'xic che je jas ri cubij ri u pixab ri Moises, che u bixic, pa tak ri k'ij que uxlanem, pa tak ri nimak'ij re ri c'ac' ic' xukuje' pa ri oxib nimak'ij ri queboc'ow chujunab: ri quech ri caxlanwa ri man cäya' ta ch'am cuc', ri quech ri wukutak k'ij xukuje' ri quech tak ri Cäbal.

¹⁴ Xukuje' xebujekeba' tak ri chac ri cäbin chquiwäch, je jas ri u chomam can u banic ri David, ri u tat, rech ri e cojol tabal tok'ob quequiban ri qui patanijic e are' tak c'ut ri e aj levitib are' quebeklen ri u ya'ic k'ijilanic che ri Ajawaxel xukuje' chi quetoban cuc' ri e cojol tabal tok'ob jawije' ri c'o wi rajawaxic k'ij chk'ij. Xukuje' ri u jachic ri qui chac ri e chajil tak oquibal pa jujun tak oquibal, je c'u wa' ri takanic ri u yo'm can ri David, achi ri c'o ri Dios ruc'.

¹⁵ Je c'u ri' mawi ta ne jubik' ma ta xquitakej qui banic ri xuchomaj qui banic ri ajawinel David chque ri e cojol tabal tok'ob ri e aj levitib xukuje' ri c'olbal puak.

¹⁶ Ronojel ri rajawaxic u banic rumal ri Salomon, je xbantaj na kas pa ri k'ij aretak xecoj ri e u tac'alibal ri rachoch Dios c'ä xtz'akat na u banic. Ri rachoch ri Ajawaxel kas xtz'akatir na u banic.

¹⁷ Xbe c'ut ri Salomon pa Ezion-jeber xukuje' pa Elat, chuchi' ri plo, chupam ri rulewal ri Edom.

¹⁸ Ri Hiram, cumal tak ri e u tako'n, xebutak bic jucub rech quebajwataj che xukuje' achijab ri quechacun chquipam, ri queta'm quechacun puwi' ri plo, ri xebe junam cuc' tak ri e u tako'n ri Salomon, xebopan c'u pa Opir, ri xquimajij wi xa' co'l man oxib sient juwinak lajuj quintal (330) k'an puak xquic'am c'u ulok che ri ajawinel Salomon.