Ucab Samuel 9 - Quiché Bible

Ri David cutok'obisaj u wäch ri Mepi-boset

¹ C'o jun k'ij ri David xc'otow chi'aj, xubij: “¿La c'o jun c'asal can chque ri rachalaxic ri Saul, ri cuya' quinban utzil che, che u nataxic ri Jonatan?”

² C'o jun pataninel quech ri e re ri rachalaxic ri Saul, Sib u bi', ri xsiq'uixic rech copan chuwäch ri David. Aretak xopan ri Sib, xuta' ri ajawinel che, xubij: “¿La at ri' ri Sib?” “Che patanixic la.” Xcha' ri Sib che ri ajawinel.

³ Ri ajawinel xuc'ot u chi' xubij che: “¿La canajinak jachin jun chque ri rachalaxic ri Saul ri cuya' quinto' pa ri u bi' ri Dios?” Ri Sib xutzelej u bixic che, xubij: “C'ä c'o na can jun u c'ojol ri Jonatan, ri k'ajinak ri quieb u ch'ec.”

⁴ “¿Jawije' ri c'o wi?” xcha' ri ajawinel. “Pa Lodebar, pa ri rachoch ri Maquir u c'ojol ri Amiel” xcha' ri Sib.

⁵ Xtakan c'ut ri ajawinel David che u c'amic ulok chila';

⁶ aretak c'u ri Mepi-boset, u c'ojol ri Jonatan ri' u mam ri Saul, xopan chuwäch ri David. Xumej rib che u c'utic chi nim cäril wi. “¡Mepi-boset!” xcha' ri David. “In c'o chuxe' ri takanic la.” Xcha' ri Mepi-boset che ri ajawinel.

⁷ Xubij ri David che: “Maxe'j ba awib, ri in quenbana' na utzil chawe che u nataxic ri Jonatan ri a tat. Quinya' na takanic chi quetzelex conojel ri rulew ri a mam Saul chawe, catwa' c'u na wuc' amak'el.”

⁸ Ri Mepi-boset xumej rib xubij c'ut: “¿Jasche coc la il che we pataninel ech la ri', ri in xa in junam ruc' jun cäminak tz'i'?”

⁹ Ri ajawinel, xusiq'uij c'ut ri Sib, ri ojer pataninel rech ri Saul, xubij c'u che: “Nu jachom che ri ri' u mam ri awajaw ronojel ri rech can ri u mam xukuje' ri e rachalaxic.

¹⁰ Are c'u ri camic, ri at, quebawachilaj ri e a c'ojol xukuje' tak ri a pataninelab, catic u wäch ri ulew che ri Mepi-boset, cac'ol c'ut ri cawalijisaj chuwäch ri ulew, rech c'o caquitzukbej quib ri e rachalaxic ri awajaw, are c'u ne ri Mepi-boset ri ri' u mam ri awajaw cäwa' na wuc'.” Ri Sib, ri e c'o olajuj u c'ojol xukuje' juwinak u pataninelab,

¹¹ xutzelej u bixic che ri ajawinel: “Ronojel ri takanic ri yo'm la che we pataninel ech la ri' cäban na.” Ri Mepi-boset cäwa' amak'el pa ri u mexa ri David, jacha' jun chque ri e u c'ojol ri ajawinel.

¹² C'o c'u ne jun alaj u c'ojol Micaiy u bi', conojel c'ut ri e jekel pa ri rachoch ri Sib quepatanij che ri Mepi-boset.

¹³ Are' c'u ri Mepi-boset, ri ch'oco'j ri quieb rakan, jekel pa Jerusalen, rumal rech chi cäwa' pa ri u mexa ri ajawinel.