Ucab Samuel 8 - Quiché Bible

Ri ch'o'j ri xebuch'äc tak ri David

¹ Xch'ojin c'ut ri David cuc' ri aj pilisteyib, xebuch'äco, xecanaj chuxe' ri u takanic, xresaj c'ut ri u chuk'ab ri takanic ri c'o pa qui k'ab.

² Xukuje' xebuch'äc ri aj moabib, xuban c'u chque chi caquilemej quib cho ri ulew xeretaj c'u ruc' jun etabal c'am: e are' c'ut ri xecanaj chquipam ri cacab c'am, quec'okotaj che cämical, are' c'ut ri xecanaj chquipam jujun c'am, quec'asbax canok. Xecanaj c'u ri aj moabib chuxe' ri u takanic ri David xquitoj c'u na cuchuj pa u k'ab.

³ Ri David xukuje' xuch'äc ri Hadad-ezer, u c'ojol ri Rehob, are' c'u ajawinel wa' pa Soba, aretak benak wa' che u takexic ajawinic puwi' ri rulewal ri nima' Euprats.

⁴ Ri David xebuchap jun mil ruc' wukub sient (1700) ajch'ojab chque ri e quiejeninak chquij tak quiej, e juwinak mil (20,000) chi c'ut chque ri xak quebi'n chcakan; xebuk'ajisaj c'u ne conojel ri cakan ri quiej ri e qui jurum carwaj re ch'o'j, xuwi c'u xebuto' canok ri xebajwataj che qui jururexic jun sient (100) carwaj.

⁵ Aninak c'ut xebopan ri e aj siriyab ri e aj Damasc che u to'ic ri Hadad-ezer ajawinel aj Soba, xebuch'äc c'ut ri David ri aj siriyab, xebucämisaj juwinak quieb mil (22,000) chque.

⁶ Ri David xebucojo chajinelab pa siriyab u tz'akatil ri Damasc, ri e aj siriyab xecanaj chuxe' ri u takanic xeboc che u tojic cuchuj pa u k'ab. Je c'u ri', ri Ajawaxel cuya' ri ch'äcanic che ri David apawije' ta ne ri cabe wi.

⁷ Xerechbej c'u na ri David ri quetecak tak ch'ich' ri e re k'an puak ri xequicoj ri e qui nimakil ri e rajch'ojab ri Hadad-ezer, xebuc'am c'u u bic pa Jerusalen.

⁸ Xukuje' xuban rech che nimalaj jumulaj kan ch'ich' re Bet xukuje' re Berotay, we tinimit tak ri' e rech ri Hadad-ezer.

⁹ Aretak ri Toy, ajawinel pa Hamat, xretamaj chi ri David xebuch'äc conojel ri rajch'ojab ri Hadad-ezer,

¹⁰ xutak ulok ri Joram ri u c'ojol xebuc'am ulok jastak re sak puak, re k'an puak xukuje' re k'an ch'ich', che u ya'ic rutzil u wäch xukuje' chi caquicot ruc' ri ajawinel David chi xutij u chuk'ab ruc' ri Hadad-ezer chi xcuin c'u che u ch'äquic, amak'el c'ut ch'ojininak ruc' ri Toy.

¹¹ Ri David xebujach conojel we jastak ri' che ri Ajawaxel, xrachilaj ri k'an puak ri sak puak ri u tasom che nabe, ri e petinak pa tak ri nimak tak tinimit ri e u ch'äcom:

¹² Pa Edom, pa Moab, pa Amon, cuc' ri pilisteyib, xukuje' cuc' ri aj amalesib, xukuje' ri resam pa ri ch'o'j ruc' ri Hadad-ezer, u c'ojol ri Rehob, ajawinel aj Soba.

¹³ Ri David xnimar u k'ij. Aretak c'u xtzelej ulok che qui ch'äquic ri aj edomib, xebuch'äc wajxaklajuj mil (18,000) aj edomib pa ri Beya' re Atz'am.

¹⁴ Xebucojo c'u chajinelab pa Edom, conojel c'ut ri aj edomib xecanaj chuxe' ri u takanic ri David, ri Ajawaxel xuya' ri ch'äcanic che pa apachique ta ne c'olbal ri cabe wi.

Ri e to'l tak rech ri David

¹⁵ Ri David xajawin puwi' ronojel Israel, xucoj c'ut ri suq'uilal xukuje' ri colomal che ronojel ri u tinimit.

¹⁶ Ri qui nimal ri e rajch'ojab are' ri Joab, ral ri Sarb; are' c'u ri Josapat, ri u c'ojol ri Ahilud, are' ri rajtz'ib ri ajawinel.

¹⁷ Ri Sadoc u c'ojol ri Ahitob, ri Ahimelec, u c'ojol ri Abiatar, e cojol tabal tok'ob wa'; ri Seraiy are' tz'ibal tzijol.

¹⁸ Are' c'u ri Benaiy, ri u c'ojol ri Joiad, are' c'o che takanel paquiwi' ri chajinelab aj sereteyib xukuje' ri aj peleteyib. Ri e u c'ojol ri David e cojol tabal tok'ob.