Ucab Samuel 7 - Quiché Bible

Ri Dios cuchi'j u tewichi'xic ri David

¹ Aretak ri ajawinel David xjeki' chupam ri rachoch ajawinel, u yo'm chi c'ut ri Ajawaxel, ri jamaril che man c'o ta chi c'ulel ri e c'o ta che u nakaj ri quewalij ta na chi chrij,

² xubij c'u che ri Natan ri k'axal tzij: “Jacha' ri quil la, ri in, in c'o chupam jun wachoch re chacalte'. Are c'u ri u caxa ri Dios jekel chquixe' ch'ukubal.”

³ Ri Natan xutzelej u wäch u tzij xubij che: “Bana' la ronojel ri chomam la u banic, c'o c'ut ri u to'banic ri Ajawaxel uc' la.”

⁴ Kas c'u pa ri chak'ab ri', ri Ajawaxel xtzijon ruc' ri Natan, xubij che:

⁵ “Jät jatzijobej ri pataninel wech ri David, chaya' u bixic che chi ri in, ri Ajawaxel, nu bim: ‘Man at taj ri catyacow ta na jun wachoch rech quinc'oji' chupam.

⁶ Kas pa ri k'ij ri xebenwesaj ulok ri aj israelib pa Ejipt, c'ä pa ri k'ij camic, mawi jumul in c'olinak ta pa tak ja, xane' in bininak pa apachique tak ja ri lic'om.

⁷ Pa conojel ri k'ijol ri xinbin chquixo'l, mawi jumul xinta' ta che jun chque ri e c'amal tak be, ri xebencoj che takanelab puwi' ri nu tinimit, Israel, chi chuyaca' ta jun wachoch re chacalte'.’

⁸ Rumal c'u ri', chabij che ri David ri pataninel wech chi ri in, ri Ajawaxel ri c'o ronojel u cuinem, quinbij che: ‘In xatin wesaj ulok chquij ri chij, man xinya' ta chic chawe chi catakej qui yuk'uxic tak ri chij, rech cätux c'amal u be ri nu tinimit Israel;

⁹ at c'u wachilam apawije' ta ne ri at benak wi, nu q'uisom tzij paquiwi' conojel ri c'ulel ri xebel ulok che a cämisaxic sibalaj c'u nu nimarisam a k'ij, jacha' ri u nimarisaxic qui k'ij ri achijab ri nimak na qui k'ij ri e c'o cho ri uwächulew.

¹⁰ Nu suc'uman c'u jun u c'olbal ri nu tinimit Israel, chila' c'u e nu yo'm wi' rech quejeki' pa jun qui c'olbal ri quech, ri man c'o ta chi jachin ta cäyo'w ta chi latz' chque mawi cäban ta chi c'ax chque cumal ri e banal tak etzelal jacha' ri banom ulok chque nabe,

¹¹ aretak xebencoj c'amal tak be ri chetakan puwi' ri nu tinimit Israel. Ri in quinban na chi man c'o ta chi c'ax cäpe pawi' cumal ri caquiban qui c'ulel chawe. Quinya' c'u retamaxic chawe chi quebenya' na awija'lil,

¹² aretak c'u chopan ri u q'uisbalil ri a c'aslemal catcäm c'ut, in quinwalijisaj na jun chque ri e awija'lil, quinjekeba' c'u na chupam ri ajawibal.

¹³ Are' cäyacow na jun wachoch, quinjekeba' c'u na ri rajawinic chbe k'ij sak.

¹⁴ Quinux c'u na jun tataxel che, are c'u ri are' cux na jun c'ojalaxel chwe. Aretak chuban jun macunic, quinc'äjisaj na u wäch quinrapuj c'u na jacha' cuban ronojel tataxel che ri u c'ojol,

¹⁵ man quinnajtajisaj ta c'u na ri rutzil wanima' che jas ri xinban che u najtajisaxic che ri Saul, ri xinwesaj xatincoj c'u at pa ri u c'olbal.

¹⁶ Ri awija'lil xukuje' ri awajawinic quecanaj jic chuxe' ri nu to'banic, xukuje' ri a tem re ajawibal cäjekebax can chbe k'ij sak.’ ”

¹⁷ Ri Natan xutzijoj wa' che ri David, ruc' tz'akatil jacha' ri xrilo xukuje' ri xuto.

¹⁸ Xoc c'ut ri ajawinel David che tzijonem chuwäch ri Ajawaxel, xubij c'ut: “Ajawaxel, ¿in jachinok xukuje' jas c'u qui banic ri wachalaxic chi banom la chwe chi in opaninak c'ä waral?

¹⁹ ¡Man nim ta c'u wa' chwäch la, Ajawaxel, c'a yo'm c'u ne la u bixic ri cäpe na puwi' ri rija'lil ri pataninel ech la! ¡Man c'o ta jun achi je cubano jas ri cäban la Ajawaxel!

²⁰ ¿Jas ta chic ri quincuin ta chi che u bixic che la, Ajawaxel, ri lal cäch'ob la u wäch we pataninel ech la ri'?

²¹ Conojel tak we mayibal ri' lal lal banowinak, jas ri xchi'j la xukuje' ri xaj la, rech quebenwetamaj,

²² rumal ri', Wajaw Dios. ¡Sibalaj ba' nim ri banic la! Man c'o ta chi c'u jun jacha' ri lal, mawi c'o chic jun dios we ta ma ta xak xuwi ri lal, jas ri u cholajil ronojel ri ka tom cuc' ri ka xiquin.

²³ Are c'u ri Israel, ri tinimit la, ¡man c'o ta chi jun jacha' ta ri are', xa c'u jun we nim tinimit ri' cho ri uwächulew! Lal, Oh Dios, xto'tajisaj la rech cux tinimit la, xban c'u la che chi xux nim u k'ij, xeban c'u la nimak xukuje' mayibalalaj tak jastak che u banic utzil che. Ri lal xeq'uiak la bic chuwäch ri tinimit la ri xtor la ulok pa Ejipt, ri niq'uiaj nimak tak tinimit chic e cachil tak ri e qui diosib,

²⁴ xa c'u jumul chomam la chi ri Israel cux tinimit la re chbe k'ij sak, are c'u ri lal, Ajawaxel cux na la u Dios.

²⁵ Je ba' ri', Ajawaxel xukuje' Dios, mäsach pa jolom la ri xch'ij la che ri pataninel ech la xukuje' ri rija'lil, tz'akatisaj ba' la ri bim la.

²⁶ ¡Chi ri bi' la amak'el, chnimarisaxok, chbix ta c'ut chi ri Ajawaxel ri c'o ronojel u cuinem are' ri u Dios ri Israel! ¡Chi ri rija'lil ri David, ri pataninel ech la, chi co chcanaj rumal ri to'banic la!

²⁷ Lal, Wajaw ri c'o ronojel cuinem la, yo'm la retamaxic chwe chi cajekeba' la ri wija'lil; rumal ri' ri in, pune' xa in pataninel ech la, quinchajij anima' che u banic we bochi'nic ri' che la.

²⁸ Lal, Ajawaxel, lal Dios, ri e tzij la kas e kastzij, chi'm c'u la che ri pataninel ech la q'ui qui wäch tak utzil;

²⁹ chpet ba', pa anima' la, ri u tewichi'xic ri rija'lil ri pataninel ech la rech cajeki' amak'el chbe k'ij sak chuxe' ri to'banic la. Lal, Ajawaxel, chi'm la u banic, ruc' c'ut ri tewichibal la ri rija'lil ri pataninel ech la tewichital na amak'el chbe k'ij sak.”