Ucab Samuel 6 - Quiché Bible

Ri David cutijtobej u q'uexic u c'olbal ri u caxa ri Ajawaxel

¹ Ri David xebumulij chi jumul conojel ri ajch'ojab ri e cha'om chquixo'l ri aj Israel, ri e juwinak lajuj mil (30,000),

² xel c'u bic ri David, xbe pa Baala u tz'akatil ri Juda, xerachilaj bic conojel ri ajch'ojab ri e teren chrij, che u k'axexic ri u caxa ri Dios ri cänatax wi ri u bi' ri Ajawaxel puwi', ri c'o ronojel u cuinem, ri c'o ri u tem re ajawibal paquiwi' ri aj cajalaj tak to'banelab ri e c'o qui xic'.

^3-4 Xquesaj c'u ulok ri u caxa ri Dios pa ri rachoch ri Abinadab ri c'o chutza'm jun juyub, xquiya' c'u pa jun c'ac' caret xquic'am bic. Ri Uza xukuje' ri Ahio, e u c'ojol ri Abinadab, e are' c'amal u be ri caret ri qui c'amom wi bic ri u caxa ri Dios, ri Ahio are nabejinak chuwäch ri caxa.

⁵ Are c'u ri David xukuje' conojel ri aj israelib e benak chuwäch ri Dios quebixonic quexojow ruc' ronojel ri qui chuk'ab, jas ri cok'ibal ri alaj arp ri nimalaj arp ri tzojtzoj, ri k'ojom que quetecak tak che' xukuje' tak ri quetecak tak k'an ch'ich'.

⁶ Aretak c'u xebopan pa ri c'olbal ri etamatalic chi chi' cuyak' wi u trico ri Nacon, ri Uza xuyuk ri u k'ab che u suq'uil ri u caxa ri Dios che u tok'exic, xemejmob c'u ri wacax ri e u c'aninak ri caxa.

⁷ Xpe c'u royowal ri Ajawaxel che ri Uza rumal ri u nimic rib kas chila' c'ut xresaj wi ri u c'aslemal, ri Uza xcämic xtzak pa u xc'ut ri u caxa' ri Dios.

⁸ Sibalaj c'u c'ax xbe pa ranima' ri David chi ri Ajawaxel xresaj ri u c'aslemal ri Uza, rumal c'u ri' xucoj Perez-uz che u bi' we c'olbal ri', c'ä je c'u cäbix che camic.

⁹ Kas c'u pa ri k'ij ri' ri David sibalaj xuxe'j rib chuwäch ri Ajawaxel, co c'ut xurak u chi', xubij: “¡Mawi minchomaj u c'amic bic ri u caxa ri Ajawaxel!”

¹⁰ Rumal c'u rech chi man xraj ta chic xuc'am ta bic ri u caxa ri Ajawaxel pa ri u tinimit ri David, xuya' takanic chi chc'am bic pa ri rachoch ri Obed-edom jun achi aj Gat.

¹¹ Ri u caxa ri Ajawaxel xcanaj can oxib ic' pa ri rachoch ri Obed-edom, xtewichi'x c'ut rumal ri Ajawaxel xukuje' conojel ri e rachalaxic.

Ri David cuk'axej ri u caxa ri Ajawaxel pa Jerusalen

¹² Xya' c'u u bixic che ri ajawinel David chi rumal rech ri u caxa, ri Ajawaxel e tewichi'm ri e rachalaxic ri Obed-edom xukuje' conojel ri e c'o cuc', ri David xbe ruc' nimalaj quicotemal xuc'ama' ulok ri u caxa ri Dios ri c'o chupam ri rachoch ri Obed-edom che u c'amic bic chupam ri tinimit aj David,

¹³ aretak c'ut ri e uc'aninak ri u caxa ri Ajawaxel qui yo'm chic wakib u xo'l cakan, ri David xupil jun ama' wacax xukuje' jun ama' chij che tabal tok'ob.

¹⁴ Ri David u cojom bic jun atz'iak nim u k'ij re lino, cäxojow c'u ruc' ronojel ri u chuk'ab,

¹⁵ ri are' xukuje' conojel ri aj israelib cuc'am bic ri u caxa ri Ajawaxel cuc' rakoj tak chi'aj re jajatem xukuje' cok'ibal tak trompet.

¹⁶ Aretak xopan ri u caxa ri Ajawaxel chupam ri tinimit aj David, ri Mical, ri u mia'l ri Saul, xca'y ulok chupam ri wenta'n; aretak c'u xrilo chi ri ajawinel David cäch'opinic xukuje' cäxojow chuwäch ri Ajawaxel, sibalaj xretzelaj u wäch.

¹⁷ Ri u caxa ri Ajawaxel xc'am bic xeyok chupam ri u c'olbal, chupam jun cäbal ri lic'om re binem ri are' u patan wa' xuban ri David. Xebuchi'j c'u ri David tabal tak tok'ob ri quechajirisaxic xukuje' tabal tak tok'ob re utzirisan ib chuwäch ri Ajawaxel,

¹⁸ aretak xuq'uis qui chi'xic xutewichi'j ri winak pa ri u bi' ri Ajawaxel ri c'o ronojel u cuinem,

¹⁹ conojel c'ut ri aj israelib ri e c'o chila' chi achijab chi ixokib, xuya' jun qui caxlanwa, jun caxlanwa re qui wäch tut xukuje' jun chic re pasa. Xuwi c'u xbantaj wa' conojel xetzelej cho tak cachoch.

²⁰ Xbe c'u ri David cho rachoch che qui tewichi'xic ri e c'o cho rachoch; are c'u ri Mical ri u mia'l ri Saul, xel ulok che u c'ulaxic xubij c'u che: “¡Camic sibalaj utz canajinak ri ajawinel ri c'o pa Israel, xuc'ut rib chquiwäch ri ixokib ri e lok'om tak pataninelab, jacha' jun apachique winak ri man c'o ta u q'uixbal chupalaj!”

²¹ Ri David xutzelej u bixic che: “Kastzij in xojowinak chuwäch c'ut ri Ajawaxel nu banom wi, ri xinucha' che u q'uexwäch ri a tat xukuje' che qui q'uexwäch ri e awachalaxic rech quinux c'amal u be ri Israel ri u tinimit. Rumal ri' quinxojow chuwäch.

²² Quinmach'irisaj chi c'u ne na wib chuwäch ri xiban camic; quinkasaj chi c'u ne na nu k'ij, je jas ri a chomanic, cäya' c'u ne na nu k'ij cumal we ixokib ri e lok'om pataninelab ri quebabij.”

²³ Ri Mical man xec'oji' ta chi ral pa ronojel ri u c'aslemal.