Ucab Samuel 20 - Quiché Bible

Cuwalijisaj rib ri Seba

¹ Jun itzel achi aj ramak' ri Benjamin, ri Seba u bi' u c'ojol c'ut ri Bicri, c'o apan pa Jilgal. Xucoj qui c'u'x ri aj israelib xubij chque chi chquiwalijisaj quib chrij ri David, je xubij wa': “¡Ri uj man c'o ta ke mawi kechbal ruc' ri David, ri u c'ojol ri Isayi! ¡Israelib jix iwonojel cho tak iwachoch!”

² Conojel ri achijab re Israel xquitzak can ri David che u ternexic ri Seba, ri u c'ojol ri Bicri. Man je ta c'u xquiban ri achijab ri e re Juda kas chuchi' ri Jordan xeteri wi ulok chrij ri David c'a xopan na pa Jerusalen, man xquitas ta quib chrij ri cajawinel.

³ Aretak xtzelej ri David pa ri rachoch ri c'o pa Jerusalen, xebuc'am ri e lajuj man kas ta e rixokil ri e u yo'm can che u chajixic ri rachoch xebunim c'u pa jun ja, xcoj chajil quech. Xutakej c'u quilixic chila'. Man c'u xwar ta chi cuc'. Xak c'u e tz'apil chila', e jacha' malca'nib, xejeki' chila' c'a xecäm na.

⁴ Xuya' c'u takanic ri ajawinel che ri Amas, xubij che: “Chebasiq'uij ri achijab ri e c'o pa Juda, pa oxib k'ij c'ut chateltac'al chnuwäch.”

⁵ Xbeytaj c'ut ri Amas man je ta xel ri k'ij ri xch'ic che.

⁶ Xubij c'ut ri David che ri Abisay: “Ri Seba nim na ri c'ax ri cubana' na chke chuwäch ri xuban ri Absalon. Chatnabej ba' chquiwäch ri wajch'ojab; chaterenej pa rakan, moc ne chquipam tak ri tinimit ri e kasan pa pimak tak tapia ma ta c'u ne cujcuin ta chi che u rikic.”

⁷ Ri rachijab ri Joab, xecachilaj ri aj sereteyib xukuje' ri aj peleteyib ri e chajil tak rech ri ajawinel, xukuje' ri ajch'ojab ri sibalaj c'o na qui chuk'ab, xebel bic pa Jerusalen xc'am qui be rumal ri Abisay, che u rikic ri Seba.

⁸ Aretak e c'o chunakaj ri nimalaj abaj ri c'o pa Gabaon. Ri Amas xel ulok che qui c'ulaxic, ri Joab u cojom bic ri ratz'iak re ch'o'j, ximital ri u xe' u pam tzayal c'u bic jun ch'ich' re ch'o'j xe' u pam ri c'o chupam ri rij ri xa ruc' jubik' c'äjic' iquim cajusjubic.

⁹ Ri Joab xuchab ri Amas che ri u cacate' ruc' ri riquiak'ab che u tz'umaxic, xuc'ot u chi': “¿La utz at elinak, wachalal?”

¹⁰ Ri Amas man xuchajij ta rib che ri ch'ich' ri xuchap ri Joab. Ruc' aninakil xujulupij ri ch'ich' re ch'o'j chupam, ronojel ri rixco'l xmuli cho wi ulew. Xcämic man xajwataj taj xq'uis u cämisaxic rumal ri Joab. Ri Joab ruc' ri Abisay ri cachalal quib xquitakej u rikic ri Seba, u c'ojol ri Bicri.

¹¹ Jun c'ut chque ri rajch'ojab ri Joab xuya' rib chuxcut ri u cuerp ri Amas, xubij c'ut: “¡Jachin ri c'o ruc' ri Joab xukuje' ruc' ri David, chteren chrij ri Joab!”

¹² Are' c'u ri Amas u takem u wolkotixic rib niq'uiaj be chupam ri u quiq'uel; xril c'u ri rajch'o'j ri Joab chi conojel ri winak quecanaj che u ca'yexic, xuresaj ri Amas pa ri be xuq'uiak jun atz'iak chrij, xril c'ut chi conojel ri quebopan chila' quetaq'ui' can ruc'.

¹³ Aretak c'u xesetaj pa ri be, jicom queboc'ow conojel ri e tereninak ri Joab che u rikic ri Seba.

¹⁴ Ri Seba xoc'ow pa conojel tak ri ramak' ri Israel xopan na c'a pa Abel-bet-maac, conojel c'ut ri e rija'lil ri Bicri xquimulij quib xeboc bic ruc' pa ri tinimit.

¹⁵ Aretak ri rachijab ri Joab xebopan pa Abel-bet-maac, xquiban jun ak'anibal chrij ri nimalaj tapia rech quebopan puwi' rech caquiban c'ax che ri tinimit conojel c'ut xeboc che u t'akixic ri nimalaj tapia.

¹⁶ Xuc'ut rib jun ixok puwi' ri nimalaj u tapia ri tinimit, xurak u chi', xubij: “¡Chinitatabej! ¡Chinitatabej, chibana' tok'ob! ¡Chibij che ri Joab ri quinbij chiwe chi chkeb ulok, are quinwaj quinch'aw ruc'!”

¹⁷ Aretak xkeb ri Joab, ri ixok xuc'ot u chi', xubij che: “¿A lal ri' ri Joab?” “In ri' ri Joab,” xcha' ri are'. Xubij c'ut ri ixok: “Chetatabej la ri cubij we pataninel ech la ri', quinbochi'n che la,” xcha' ri ixok. “Catintatabej,” xcha' ri Joab.

¹⁸ Xuchaplej c'u u bixic ri ixok: “Cäbix ojer ‘Jachin ri craj cach'obonic, ch'obon pa Abel.’ Jeri' quel ri jasach chi sak.

¹⁹ Ri ka tinimit sibalaj aj jamaril na ri sibalaj jic chquixo'l ri aj Israel, ¡jun chque ri sibalaj nim u k'ij! Are c'u ri lal, cätajin catij la u tuquixic. ¿Jasche caj la catuquij la ri rech ri Ajawaxel?”

²⁰ Ri Joab xutzelej u bixic che: “¡Mawi c'u ne cachomax jubik' wa'! Man are ta nu chomanic ri u tuquixic mawi ri retzelaxic.

²¹ Man are ta wa' ri quinwaj u banic, xane' c'o jun achi ri quel pa tak ri juyub pa Eprain, ri Seba u bi', u walijisam rib chrij ri ajawinel David. U tuquiel chajacha' chwe, quinya' c'u can ri tinimit.” “Cakaq'uiak na bic ri u jolom puwi' ri pimalaj tapia chwäch la,” xcha' ri ixok che ri Joab.

²² Xbe c'u ri ixok che qui ch'äquic conojel ri winak ri e c'o pa ri tinimit ruc' ri u nawibal, xquesaj ri u jolom ri Seba xquiq'uiak ulok chuwäch ri Joab. Ri Joab xtakan che rok'isaxic ri trompet che qui k'ilic ri ajch'ojab, xquiya' c'u can ri tinimit, chquijujunal xebe cho tak cachoch, are c'u ri Joab xtzelej pa Jerusalen che u tzijobexic ri ajawinel.

Ri e qui nimal tak ri e rajch'ojab ri David

²³ Ri Joab are xcanaj che takanel paquiwi' conojel ri ajch'ojab aj Israel, are c'u ri Benaiy, ri u c'ojol ri Joiad, are cätakan paquiwi' ri chajinelab aj sereteyib xukuje' ri aj peleteyib.

²⁴ Ri Adoram are catakan paquiwi' ri winak ri quetak che qui banic tak ri chac, ri rajtz'ib ri ajawinel are' ri Josapat, ri u c'ojol ri Ahilud.

²⁵ Ri Seb are quetz'iban ri jastak ri quec'ulmatajic, ri Sadoc xukuje' ri Abiatar e cojol tabal tok'ob.

²⁶ Ri Ira ri aj tinimit Jair, are' u cojol tabal tok'ob ri David.