Ucab Samuel 17 - Quiché Bible

Ri Husay cuyojij ri u chomanic ri Ahitopel

¹ Xubij chi c'ut ri Ahitopel che ri Absalon: “Chaya' chwe chi quebencha' cablajuj mil achijab, kas pa we chak'ab ri' quinbe c'u che rokataxic ri David.

² Aretak c'u cosinak chic xukuje' tukarinak chic, quinbe chrij quinnojisaj c'u che xe'n ib, conojel c'ut ri winak ri e c'o ruc', quebanimaj na, man c'o ta jachin quincämisaj xak xuwi ri ajawinel,

³ quinban c'u na chi conojel ri winak quebutzir awuc' jacha' ri cuban ri ali ri c'äte xc'uli'c ri cutzir ruc' ri rachajil. Ri catzucuj are ri u cämical jun achi; conojel c'ut ri winak quecanaj pa jamaril.”

⁴ Ri chomanic xkaj pa u jolom ri Absalon xukuje' pa qui jolom conojel ri aj Israel ri e ya'l tak u no'j.

⁵ Ri Absalon xutak u siq'uixic ri Husay ri aj arquit, rech caquito jas cubij.

⁶ Aretak xopan ri Husay chuwäch ri Absalon, ri Absalon xubij che: “Ri u no'j ri Ahitopel are wa'. ¿La cakabano jas ri cubij o man cakabantaj? ¿Jas ri cabij at?”

⁷ Ri Husay xutzelej u bixic che, xubij: “Ri no'j ri u yo'm ri Ahitopel camic man takal ta u banic.

⁸ Ri lal eta'm la chi ri tat la xukuje' ri e rachil sibalaj e cowilaj tak achijab, e ch'ujarinak c'u camic jacha' jun juyubal ati't os ri e tokim ri ral. Xak c'u u wi' chic, ri tat la nak'atal che u banic ch'o'j man caroc'owisaj ta ri ak'ab chquixo'l tak ri e rajch'ojab.

⁹ Kas camic u c'u'm rib ri' pa jun pec o pa apachique c'ubal ib chic. Jun jasach chic, xuwi quel jubik' u tzijol chi pa ri nabe ch'ojinic ri cäbanic quekaj jujun chque ri ajch'ojab la, chanim quel u bixic chi e ch'äctajinak ri ajch'ojab la,

¹⁰ xukuje' c'u ne ri cowilaj achi na, xukuje' c'u ne ri sibalaj c'a'n na jacha' jun c'oj, cätuktub na cäpe na ranima'; conojel c'ut ri aj Israel queta'm chi ri tat la xukuje' ri e benak ruc' e cowilaj tak achijab.

¹¹ Are c'u ri camic, ri in quiya' no'j la chi chemulij la conojel ri aj israelib uc' la ri e c'o c'ä pa Dan cäjela' pa Beerseb, ri man quebajilataj taj e jacha' ri u bak'wäch tak ri sanyeb ri e c'o chu chi' ri plo, kas ta c'u lal cäc'amow la qui be che u banic ri ch'o'j.

¹² Cäkaj c'u na ri tat la pa ka k'ab pa apachique c'olbal ri c'o wi. Cujkaj c'u na puwi' jacha' ri räxk'ab ri cakaj puwi' ri uwächulew, man cac'asi' ta c'u canok ri are' mawi jun chque ri rachijab.

¹³ We c'u ne cuto' rib pa jun tinimit, konojel ri uj aj israelib quekac'am bic ka colob, pa jujunal c'ut ri abaj quebe kujuruj bic ri tinimit quekaq'uiaka' can cäjela' pa ri alaj nima', mawi c'u ne jun abaj cacanaj ta na can chila'.”

¹⁴ Ri Absalon xukuje' conojel ri aj israelib xquibij chi are utz na ri no'j ri xuya' ri Husay chuwäch ri xuya' ri Ahitopel. (Are c'u ri Ajawaxel xchoman u yojixic ri jicalaj no'j ri xuya' ri Ahitopel rech cuc'am ulok ri etzelal puwi' ri Absalon.)

¹⁵ Xubij c'u ri Husay chque ri e cojol tabal tok'ob ri Sadoc xukuje' ri Abiatar ri yo'w no'j ri u yo'm ri Ahitopel che ri Absalon xukuje' chque ri nimak tak tatayib re Israel, xukuje' ri yo'w no'j ri xuya' ri kas are'.

¹⁶ Rech quebixtax aninak che ri David, chyok c'u u bixic che chi maroc'owisaj ri ak'ab ri' pa tak ri lianic ri c'o pa ri chaki'j uwo sak, xane' chk'ax ch'käp che ri Jordan rech man cacämisaxtaj mawi ri achijab ri e c'o ruc'.

¹⁷ C'o c'ut ri Jonatan xukuje' ri Ahimaas pa En-rojel, man cäcaj ta c'ut caquic'ut quib pa ri tinimit, rech man cäpe ta u q'ueyomal paquiwi', jun pataninel ixok xbe che u bixic chque, chanim c'ut xebel bic che u bixic che ri ajawinel David.

¹⁸ Xebilitaj c'u rumal jun ala, xbe c'u che u bixic che ri Absalon. Xquichuk'ubej c'ut xebopan cho rachoch jun achi pa Bahurim, xquinim quib pa jun c'ua' ri c'o cho ri ja.

¹⁹ Chanim c'ut ri rixokil we achi ri' xuyaxtaj jun tz'alam puwi' ri c'ua' xulic c'u trico puwi'. Man c'o ta c'u jachin jun xetaman wa'.

²⁰ Aretak c'u xebopan ri terenel tak rech ri Absalon, xquic'ot u chi' ri ixok, xquibij che: “¿Jawije' c'o wi ri Ahimaas rachil ri Jonatan?” “Xeboc'ow waral, e benak che u suq'uil ri nima'” Xcha' ri ixok chque. Xebe c'ut ri e terenel tak rech ri Absalon che qui tzucuxic, aretak c'u xquilo chi man xequirik taj xetzelej pa Jerusalen.

²¹ Aretak c'u e tzelejinak chi bic ri tzucunelab, xel ulok ri Ahimaas pa ri c'ua' rachil ri Jonatan xexiq'uin che u bixic che ri David; xquibij che chi chwalij chanim chk'ax ch'käp che ri Jordan, rumal rech chi ri Ahitopel xuya' qui no'j chi chepet che i ch'äquic.

²² Ri David xukuje' conojel ri winak ri e achilaninak aninak xewalijic xek'ax ch'käp che ri Jordan. Aretak c'u xsakar ri ucab k'ij, man c'o ta jun ri ma ta k'axenak ch'käp.

²³ Aretak c'u xril ri Ahitopel chi man xbantaj ri xubij xuquiejej ri u bur xbe cho rachoch, pa ri u tinimit, aretak c'u xesuc'umataj conojel ri jastak rech cho rachoch, xujitz'aj rib. Je u cämic wa', xmuk c'u chupam ri xmuk wi ri u tat.

Ri David pa Mahanaim

²⁴ Xopan ri David pa Mahanaim pa ri jok'otaj aretak xk'ax ri Absalon pa ri nima' Jordan e rachil conojel ri aj israelib.

²⁵ Ri Absalon are xucoj ri Amas che c'amal qui be ri ajch'ojab, che u q'uexwäch ri Joab. Ri Amas u c'ojol jun aj ismael ri Itra u bi' ri xuch'abej na ri Abigail, u mia'l ri Nahas ri xukuje' rachalal ri Sarb u nan ri Joab.

²⁶ Ri Absalon e rachil ri aj israelib xekaj pa ri ulew Galaad,

²⁷ aretak c'u xopan ri David pa Mahanaim, xel ulok ri Sob che u c'ulaxic, u c'ojol ri Nahas, ri quel pa Raba ri c'o pa Amon; ri Maquir, u c'ojol ri Amiel, ri quel pa Lodebar; xukuje' ri Barzilay, ri quel pa Rojelim ri c'o pa Galaad.

²⁸ Xequic'am bic ch'at chque, tzima t'uy, xukuje' trico, sebad, c'äj, pol, caxlanquinak', k'an quinak',

²⁹ juyubal räx cab, mantequiy, quexu re wacax, xukuje' re chij, rech cutij ri David xukuje' ri winak ri e achilaninak; xul c'u pa qui jolom, chi we e petinak pa ri chaki'j uwo sak, e cosinak, quenum ri' xukuje' cächaki'j qui chi' ri'.