Ucab Samuel 13 - Quiché Bible

Ri Amnon cäresaj u q'uixbal ri Tamar

¹ Ri Absalon, ri u c'ojol ri David, c'o jun rana'b sibalaj je'lic, Tamar u bi'. Xc'ulmataj c'ut chi ri Amnon, ri xukuje' u c'ojol ri David, xbe ranima' che ri ali,

² xujal c'u jun yabil che rumal ri u bisoxic, rumal c'u rech chi man c'o ta achi oc'owinak ta ruc' ri Tamar, rumal ri' man cuya' taj c'o jas cuban che.

³ C'o c'u jun ala ri sibalaj utz ruc' ri Amnon ri sibalaj subunel, Jonadab u bi', u c'ojol ri Simey, ratz ri David.

⁴ C'o jun k'ij xuc'ot u chi' ri Amnon, xubij che: “¿Jas ri xac'ulmaj u c'ojol ajawinel? ¿Jasche sibalaj cätajin catbakiric? ¿La ma ta catzijoj chwe?” Ri Amnon xutzelej u bixic che: “Xa benak wanima' che ri Tamar ri rana'b ri watz Absalon.”

⁵ Xcoj c'u u c'u'x rumal ri Jonadab: “Chanima' awib pa ri ch'at chajaluj a yab. Aretak c'u chopan ri a tat che awilic, chabij che, chi chubana' tok'ob chutaka' ulok ri awana'b ri Tamar rech cäpe che u banic ri a wa ri catijo chusuc'umaj jun riquil chi', ri cawil u banic rech catij c'ut ri cuya' chawe.”

⁶ Xunim c'u rib ri Amnon pa ri ch'at xuban c'u rib chi yawab. Aretak c'u xopan ri ajawinel che rilic ri Amnon xubij che: “¡Bana' la jun tok'ob! Chpet ri wana'b Tamar chpet che u banic quieb nu caxlanwa are' c'u checojow chnuwäch.”

⁷ Ri David xutak ri Tamar cho rachoch, xubij che: “Chabana' jun tok'ob, jät cho rachoch ri a xibal Amnon, jasuc'umaj ri u wa ri cutijo.”

⁸ Ri Tamar xbe cho rachoch ri u xibal ri Amnon, ri k'oyol pa ri u ch'at. Xuc'am c'u ri c'äj, chila' xebusuc'umaj wi ri caxlanwa xebuchak'ajisaj c'ut;

⁹ xeresaj c'ut pa ri xarten xebucoj chuwäch ri Amnon, man xraj ta c'ut ri Amnon xutijo, xuya' c'u takanic chi chebel bic conojel ri e c'o chi'.

¹⁰ Aretak c'u e elinak chi bic conojel, ri Amnon xubij che ri Tamar: “Chac'ama' ulok ri wa pa ri nu warabal. Kas at c'u chatcojow chnuwäch.” Ri Tamar xebuc'am ri caxlanwa ri xebubano xebuc'am c'u bic che ri Amnon ri u xibal chupam ri u warabal.

¹¹ Aretak c'u xebukebisaj chuwäch rech cäwa'ic, xranej u mich'exix xubij c'u che: “Tasaj wana'b, chatk'oyol wuc'.”

¹² Ri ali xutzelej u bixic che: “Jayi' nu xibal, minawetzelaj, man caban ta c'u wa' pa Israel. ¡Maban we etzelal ri'!

¹³ ¿Jawije' ta lo ri quinbe ta wi na ruc' ri nu q'uixbal? Are c'u ri yok'bal awe at ri cäbix na pa Israel chi xa at jun ri man c'o ta u no'j. Catinbochi'j chi chinatz'onoj che ri ajawinel, ri are' man cak'ilon taj chi quink'ax pa a k'ab.”

¹⁴ Ri Amnon man xunimaj taj ri xbix che rumal ri ali, c'o c'u na u chuk'ab chuwäch ri Tamar xucoj u chuk'ab che xk'oyi' c'u ruc'.

¹⁵ Sibalaj c'u nim ri retzelaxic u wäch ri xq'uiy pa ri ranima' ri Amnon, chi c'o na ri retzelaxic u wäch rumal chuwäch ri u lok'ok'exic rumal. Xubij c'u che: “Chayaca' awib chatel bic.”

¹⁶ Ri Tamar xutzelej u bixic che: “¡Jayi', nu xibal, are c'u ri wesaxic bic camic waral cux na jun nimalaj etzelal chi wa' chwe chuwäch ri a banom chwe!” Ri Amnon man xunimaj taj ri xbix che rumal ri ali;

¹⁷ xane' xusiq'uij ri u pataninel xubij che: “¡Chawesaj bic we ixok ri' chrij ri uchi'be utz c'u u tz'apixic ri uchi'be chabana' chuwäch!”

¹⁸ Ri pataninel xresaj bic ri ali chrij ri uchi'be xutz'apij c'ut ri uchi'be chuwäch. Are c'u ri Tamar, ri u cojom jun je'licalaj ratz'iak, atz'iak ri caquinak'atisaj u cojic ri e qui mia'l tak ri ajawinelab ri e k'apojib,

¹⁹ xuya' chaj pa u jolom, xujis ri ratz'iak ri u cojom, xebuya' ri quieb u k'ab pa u jolom, cok'ic xbec pa ri be.

²⁰ Xc'ot c'u u chi' rumal ri Absalon ri u xibal: “¿La are' ba' ri a xibal Amnon xbanow wa' chawe? C'o ba jas mabij, wana'b, a xibal c'ut. Sibalaj c'u matoc il che we c'ulmatajic ri'.” Xcanaj c'u ri Tamar pa bis cho rachoch ri Absalon ri u xibal.

²¹ Aretak xretamaj ri ajawinel David ronojel ri xc'ulmatajic, sibalaj xoyowaric; man c'u xuyaj taj ri u c'ojol rumal rech chi, are' ri u c'ojol ri nabeal, sibalaj c'u u lok'.

²² Ri Absalon, man c'o ta jas xuch'a' che ri Amnon xak ta pa re wi, caretzelaj c'u u wäch rumal rech chi xuban il che ri Tamar ri rana'b.

Ri Absalon cuya' rajil q'uexel che ri Amnon

²³ Quieb junab oc'owinak chi wa', ri e rajchaquib ri Absalon cätajin caquisocaj quij ri e u chij pa Baal-hazor, chunakaj ri tinimit Eprain, ri Absalon xerula'j conojel ri e u c'ojol ri ajawinel.

²⁴ Xbe c'u ne che rilic ri ajawinel, xubij c'u che: “Camic ri cätajin casocax quij ri nu chij cumal ri wajchaquib, sibalaj quinwaj chi ri lal xukuje' ri nimak qui k'ij ri e ach tak k'atal tzij la chelya' ta alak u k'ij we pataninel ech la ri' ruc' ri qui c'olem.”

²⁵ Ri ajawinel xutzelej u bixic che: “Jayi', nu c'ojol, man cuya' taj cujbe konojel uj, rech man nim taj ri casacho.” Pune' c'u sibalaj xucoj u chuk'ab ri Absalon, ri ajawinel man xraj taj xbec, xuya' c'u bic ri u tewichibal puwi'.

²⁶ Xubij c'ut ri Absalon: “We ba' man cuya' wa', nimaj ba' la chi chujrachilaj ri watz Amnon.” “¿Jasche cawaj chi catrachilaj ri Amnon?” Xcha' ri ajawinel che.

²⁷ Sibalaj c'u xucoj u chuk'ab ri Absalon, rumal c'u ri' xunimaj ri ajawinel chi cabe ri Amnon xukuje' ri niq'uiaj e u c'ojol chic ruc'.

²⁸ Ri Absalon xusuc'umaj jun wa'im jas ri cacoj chuwäch jun ajawinel, u yo'm c'u qui takquil ri u pataninelab, xubij chque: “Kas utz rilic chibana' aretak pakalinak chic ri u wa'l uva pa u jolom ri Amnon, aretak c'u chinbij chiwe chi chicämisaj. Mixe'j iwib che u banic, in c'ut, ri yowinak ri takanic. Chi chajij ba' anima' chc'ol ri i chuk'ab.”

²⁹ Che c'ut, u nimaxic ri u takanic ri Absalon, ri u pataninelab xquicämisaj ri Amnon. Conojel c'ut ri e u c'ojol ri ajawinel xewalijic, xequiquiejela' tak ri qui quiej xebanimajic.

³⁰ C'a majok c'u quebopanok xeyok u tzijol che ri David chi ri Absalon e u cämisam conojel ri u c'ojol, man c'o ta c'u jun chque xc'asi' ta canok.

³¹ Xwalij c'u ri ajawinel xujis ri ratz'iak che u c'utic ri k'oxomal xuq'uiak rib cho ri ulew. Conojel ri e rach k'atal tak tzij ri e c'o apan ruc' xukuje' xequijisila' ri catz'iak;

³² are c'u ri Jonadab, ri u c'ojol ri Simey, ratz ri David, xch'awic xubij: “Mächomaj la chi xecämisax conojel ri c'ojol la, xuwi xcämisax ri Amnon, je c'u xuchomaj u banic ri Absalon kas pa ri k'ij aretak ri Amnon xunak ri Tamar ri rana'b.

³³ Rumal ri', mäcoj c'u la chi conojel ri c'ojol la e cäminak. Xuwi ri Amnon cäminak.”

³⁴ Xanimaj c'u ne ri Absalon, ri ala ri cojom che yuxlenel xca'y apan chinaj xeril c'u jumulaj winak ri e kajinak ulok pa ri be ri c'o pa Horonaim, pa ri u tzalanem ri juyub. Xbe c'u ri yuxlenel che u bixic che ri ajawinel chi xeril winak ri cätajin quekaj ulok pa ri be ri c'o pa Horonaim.

³⁵ Xubij c'ut ri Jonadab che ri ajawinel: “Xepe ri c'ojol la, jas ri xuchomaj we pataninel ech la ri'.”

³⁶ Xak c'u alicha' u q'uisom tzijonem aretak xebopan tak ri e u c'ojol ri ajawinel xquichaplej c'u ok'ej co xquirak qui chi'. Are jun ri ajawinel xukuje' conojel ri e rach k'atal tak tzij xquiq'uis quib che ok'ej.

^37-38 Ri Absalon pa re wi, xanimajic xbe ruc' ri Talmay, u c'ojol ri Amihud, ajawinel pa Jesur, oxib junab c'ut xcanaj chila'. Ri David ronojel k'ij xrok'ej ri u cämical ri Amnon,

³⁹ aretak c'u xoc'ow ri u bisoxic ri cäminak, xpe jun nimalaj rayinic pa ri ranima' che rilic u wäch ri Absalon.