Ucab Samuel 12 - Quiché Bible

Ri Natan cuk'alajisaj ri u mac ri David

¹ Ri Ajawaxel Dios xutak ri Natan che u solixic ri David. Aretak xtaq'ui' ri Natan chuwäch, xubij che: “Pa jun tinimit e c'o quieb achijab. Ri jun k'inom ri jun chic meba'.

² Ri k'inom man quebajilataj taj ri u chij ri e c'olic xukuje' ri e u wacax,

³ are c'u ri meba' xa jun alaj u chij c'olic ri u lok'om. Are' c'u xq'uiyisanic, ri alaj chij xq'uiy pa ri rachoch junam cuc' ri ralc'ual; cuwe'j ri kas u wa, xa jun qui lak cäcuq'uiaj wi ri cuq'uia', cäwar c'u cho u c'u'x. ¡Ri achi ri' sibalaj lok' ri u chij chuwäch jacha' u mia'l u banom che!

⁴ Xpe c'u jun k'ij, xopan jun ula' che u solixic ri achi ri k'inom; man xraj ta c'u wa' xupil ta jun u chij o jun u wacax che u cojic chuwäch ri solil rech, xane' are xutokij ri alaj u chij ri meba' xupilo xusuc'umaj xucoj c'u chuwäch ri winak ri xopan che u solixic.”

⁵ Ri David sibalaj xpe royowal chrij we achi ri', xubij c'u che ri Natan: “¡Quinban na ri chi'nic ri kas cäban na pa ri u bi' ri Dios chi jachin ri xbanow we jasach ri' takal che chi cäcämisaxic!

⁶ ¡Rajawaxic c'ut cucajmulij u tojic ri alaj chij, mawi c'u jubik' xel ranima' che ri xubano!”

⁷ Xubij c'ut ri Natan che ri David: “¡Lal ri' we achi ri'! Are c'u wa' ri u yo'm u bixic ri Ajawaxel, ri u Dios ri Israel: ‘Ri in xatincha' rech cätux ajawinel puwi' ri Israel, xatinto' c'u pa u k'ab ri Saul;

⁸ xinya' ri rachoch chawe xukuje' ri e rixokil ri awajaw xebenjach pa ak'ab, xukuje' c'u ne ri ajawinic puwi' ri Israel xukuje' puwi' ri Juda. We ta c'u ma ta cubana' wa', xebentik ta chi na qui ya'ic q'ui' jastak chawe.

⁹ ¿Jasche man nim ta xawil wi ri nu tzij, xaban c'ut ri man cakaj ta chi nu wäch? A cämisam c'ut ri Uriy ri aj hitit, are c'u xebacoj ri aj amonib che u cämisixic, awechbem c'ut ri rixokil.

¹⁰ Xawetzelaj c'u nu wäch aretak xatokij ri rixokil ri Uriy ri aj hitit rech xaban awixokil che, mawi c'u jubik' cätastaj ri u banic ri etzelal pa ri awachoch.

¹¹ In, ri Ajawaxel, quink'alajisaj: Quinban na chi pa ri awachoch caq'uiy wi na ulok ri etzelal ri cakajbej, chawäch c'ut quebenc'am na ri awixokil quebenjach c'u na pa u k'ab jun chque ri e awalaxic, ri cak'oyi' na cuc' aretak c'a canicow ri k'ij.

¹² We ri at xac'u' awib che u banic ri xabano, ri in quenbana' chi cäban chuwäch ronojel Israel aretak c'ä canicow ri k'ij.’ ”

¹³ Ri David xucoj rib chupam ri u mac chuwäch ri Natan. “In macuninak chuwäch ri Ajawaxel.” Xutzelej c'u u bixic ri Natan che: “Ri Ajawaxel man cuc'äjisaj ta wäch la che ri mac la ri bano la, man quecäm ta c'u na la.

¹⁴ Rumal c'u rech chi sibalaj nim ri macaj ri banom la chuwäch ri Ajawaxel, ri c'ojol la ri c'äte xalaxic cäcäm na.”

¹⁵ Aretak c'u xtzelej ri Natan cho rachoch, ri Ajawaxel xubano chi xpe jun nimalaj yabil puwi' ri ac'al ri xralaj ri rixokil ri Uriy rumal ri David.

¹⁶ Ri David xubochi'j ri Dios puwi' ri ac'al, man xwa' ta c'ut xeroc'owisaj c'ut ri chak'ab cho ri ulew.

¹⁷ Ri nimak tak tatayib ri e jekel ruc' pa ri rachoch ri ajawinel quebe che u bochi'xic chi chwalij cho ri ulew, man c'u xraj taj xubano, mawi c'u xraj xwa' ta cuc'.

¹⁸ Oc'owinak chi wukub k'ij xcäm ri ac'al, ri e pataninel tak rech ri David caquixe'j quib che u bixic che, xquibij c'ut: “We c'u aretak c'a c'asal ri ac'al man xraj taj xunimaj jas ri xkabij che, ¿jas ta c'u cakaban che u bixic che chi xcäm ri ac'al? ¡We ne c'o jas cuc'ulmaj!”

¹⁹ Aretak c'u xril ri David chi cätajin quejasjat ri e pataninel tak rech chquixo'l, xuc'ot c'u qui chi', xubij chque: “¿La xcäm ri ac'al?” “Je', xcämic.” Xecha'.

²⁰ Xwalij c'u ri David cho ri ulew, xatinic, xuc'oc'arisaj rib xebuq'uex ri ratz'iak, xoc pa ri rachoch Dios che u k'ijilaxic ri Ajawaxel. Aretak xbantaj wa' rumal xtzelej cho ri rachoch, xak xopanic xutz'onoj u wa xwa' c'ut.

²¹ Xc'ot c'u u chi' cumal ri e pataninel tak rech, xquibij che: “¿Jas ri cätajin cäban la? Man xwa' ta la; xukuje' xok'ej la ri ac'al; are c'u ri camic chi xcäm ri ac'al, ¡ri lal xchap la wa'im!”

²² Xutzelej u bixic: “Aretak c'asal ri ac'al man xinwa' taj xukuje' xinok'ic are pa nu c'u'x chi craj ne quel u c'u'x ri Ajawaxel chwe cuc'asba' c'u canok ri ac'al.

²³ Are c'u ri camic chi cäminak chic ri ac'al, ¿jas chi u patan chi man quinwa' taj we man quincuinic quinbano chi cätzelej ta ulok cäc'asi' ta chi c'ut? ¡In quinbe na che u rikic wib ruc', are c'u ri are' man cäpe ta chi che u rikic rib wuc'!”

Ri ralaxic ri Salomon

²⁴ Ri David xucu'bisaj u c'u'x ri Betsabe, ri rixokil. Xbe che u solixic xurik c'u rib ruc', xralaj c'ut jun ral ala ri xcoj Salomon che u bi' rumal ri David. Ri Ajawaxel lok' xril we ac'al ri'.

²⁵ Je c'u retamaxic wa' xuya' che ri David rumal ri Natan ri k'axal tzij. Are c'u ri David, utz xuta' ri xubij ri Ajawaxel, xucoj Jedidiy che u bi' ri ac'al.

Ri David cuch'äc ri Raba

²⁶ Xbe c'u ri Joab che u banic ch'o'j cuc' ri aj amonib ri e aj Raba, aretak c'u xaco'l man cacuin che u ch'äquic ri tinimit re ri ajawibal,

²⁷ xutak u bixic we takquil ri' che ri David: “In cätajin quincoj nu chuk'ab che u ch'äquic ri Raba, xch'äcataj c'ut ri alaj tinimit ri e c'o ja' chrij.

²⁸ Rumal ri' chemulij la ri ajch'ojab ri e canajinak canok che ch'ojin ruc' ri tinimit quich'äca' c'ut, rech man in taj ri quinbanowic chcoj ta c'u ri nu bi' chrij.”

²⁹ Xebumulij c'u ri David conojel ri e ajch'ojab xbe chrij ri Raba xech'ojin na ruc' xuch'äc c'ut.

³⁰ Xresaj c'ut ri u corona ri ajawinel ri re k'an puak ri c'oche ri u jolom ri e c'o abaj che ri sibalaj pakal cajil ri capajan oxc'al oxlajuj (73) libra, xcoj c'u pa u jolom ri David. Xukuje' xebuc'am ri David q'ui tak jastak ri sibalaj nim cajil,

³¹ e are' c'u ri winak ri c'ä e c'o na canok pa ri tinimit xebucoj chquij k'atbal che', chquij icäj, xebucoj che qui banic porom xan. Junam xuban chque conojel ri qui tinimit tak ri aj amonib, aretak c'u xbantaj wa' rumal xtzelej pa Jerusalen e rachil conojel ri e rajch'ojab.