Ucab Samuel 11 - Quiché Bible

Ri David xukuje' ri Betsabe

¹ Pa jun k'ijol c'ut pa ri nabe tak ic' re ri junab aretak quebel bic ri ajawinelab che u banic ch'o'j jas ri qui nak'atisabal, ri David xutak bic ri Joab e rachil ri e qui nimal ajch'ojab, xukuje' conojel ri ajch'ojab aj israelib, xquisachisaj qui wäch ri e aj Amon xquik'atij c'u rij ri tinimit Raba. Xcanaj c'u can ri David, pa Jerusalen.

² Jun benak k'ij', aretak xwalij ri David che ri u waram re pa k'ij xuchap wacatem puwi' ri rachoch, xtaki' c'u apan u wäch che jun je'licalaj ixok ri cätajin catinic.

³ Xuya' takanic ri David chi chetamaxok jachin we ixok ri', xbix c'u che chi we ixok ri' are' ri Betsabe u mia'l ri Eliam rixokil c'ut ri Uriy aj hitit.

⁴ Ri David xebutak u bic jujun tako'n che u c'amic ulok xk'oyi' c'u ruc', xtzelej c'ut ri ixok cho rachoch. We ixok ri' c'äte u xujosk'ij rib che ri u yabilal chi ic'.

⁵ Ri ixok xcanaj yawab winak, rumal c'u rech chi je xuc'ulmaj wa' xutak u bixic che ri David.

⁶ Ri David xutak bic jun tako'n ruc' ri Joab, che u bixic che chi chutaka' ulok ri Uriy ri aj hitit, xtak c'u ulok rumal ri Joab.

⁷ Aretak c'u xoc ri Uriy chuwäch ri David, wa' xuta' che jacha' u banom ri Joab xukuje' conojel ri ajch'ojab, xukuje' jas u banom ri ch'o'j.

⁸ Xubij c'u che chi oj cho rachoch juch'aja' ri rakan chuxlanok. Xuwi c'u xel ulok ri Uriy pa ri rachoch ri ajawinel, ri ajawinel xutak u sipaxic je'lalaj u wa jas ri cutij ri ajawinel;

⁹ ri Uriy, che u q'uexwäch ri xbe ta cho rachoch, xroc'owisaj ri ak'ab chuchi' ri rachoch ri ajawinel, cuc' ri ajch'ojab ri quechajin chi'.

¹⁰ Aretak xbix che ri David chi man benak taj ri Uriy cho rachoch, ri David xuc'ot u chi', xubij che: “¿Jasche man xatbe ta cho awachoch chwi ri binem ri a banom?”

¹¹ Ri Uriy xutzelej u bixic che: “Ri tastalicalaj caxa jacha' xukuje' ri ajch'ojab aj Israel xukuje' ri aj juda quewar pa tak cäbal re qui k'ab tak che'; ri Joab ri in c'o chuxe' ri u takanic, xukuje' ri e ajch'ojab la, quewar cho ri räxk'ab; are c'u ri in, ¿La quinoc ta chupam ri wachoch rech quinewokok quineuq'uianok quinek'oyol ta c'u ruc' ri wixokil? ¡Kas chwäch la ri in man cuyataj quinban we jasach ri'!”

¹² Xuya' c'u takanic ri David che: “Chatcanaj chi na can camic, chwek c'ut catintak bic.” Rumal c'u ri' xcanaj can ri Uriy pa Jerusalen c'ä che ri u cab k'ij.

¹³ Xutak u siq'uixic rech quewokok xukuje' quebuq'uian ruc', xuk'abarisaj c'ut. Oquinak chi c'ut ri ak'ab aretak xel bic ri Uriy chuwäch ri David xewar cuc' ri ajch'ojab ri cätajin quechajin chuchi' ri rachoch ri ajawinel, man xbe ta c'u cho ri rachoch.

¹⁴ Chucab k'ij, ri David xutz'ibaj bic jun wuj che ri Joab, are c'u xc'amow bic ri Uriy.

¹⁵ Ri cubij ri wuj: “Are chi nabejisaj ri Uriy chquiwäch ri banal tak ch'o'j, jawije' ri nimatajinak wi ri ch'o'j, chiya' can u tuquiel rech cäsoquic cäcäm c'ut.”

¹⁶ Je c'u wa' xbanic, aretak ri Joab xusutij rij ri tinimit che u ch'äquic, xucoj ri Uriy pa ri c'olbal ri reta'm chi chila' e c'o wi ri cowilaj tak cajch'ojab ri e c'ulel,

¹⁷ pa jun jok'otaj c'ut xebel ulok ri e to'l tak u wi' ri tinimit che u tijic qui chuk'ab ruc' ri Joab, xecämisax c'u jujun chque ri e qui nimal rajch'ojab ri David, are c'u jun ri Uriy chquixo'l.

¹⁸ Ri Joab xutak bic jun tako'n ruc' ri David che u bixic che jas ri u banom ri ch'o'j,

¹⁹ je c'u wa' xubij bic che ri tako'n: “Aretak caq'uis u bixic ronojel ri c'ulmatajinak pa ri ch'o'j che ri ajawinel,

²⁰ we c'u ne cäpe royowal ri ajawinel cuc'ot c'u a chi', cubij c'u chawe: ‘¿Jas c'u che sibalaj xixkeb chuchi' ri tinimit che u banic ri ch'o'j ruc'? ¿La ma ta pa u iweta'm chi we winak ri' quequiq'uiak ulok alalaj tak jastak piwi',

²¹ junam jas ri xban pa Tebes xa jun ixok xcämisam ri Abimelec, ri u c'ojol ri Jerobaal, xuq'uiak' c'u ulok jun ca' kas puwi' ri u tapia ri tinimit? ¿Jas c'u che sibalaj xixkeb chuxe' ri tapia we cächa' chawe?’ Catzelej c'u u bixic che: ‘Xukuje' xcäm ri Uriy ri aj hitit, ri qui nimal ri e ajch'ojab la catcha' che.’ ”

²² Xbe c'ut ri tako'n, aretak c'u xopanic xutzijoj che ri David ronojel ri u bim bic ri Joab che chi cubij. Ri David, kas c'u xpe nimalaj royowal chrij ri Joab, xubij c'u che ri tako'n: “¿Jasche sibalaj xiya' iwib chuxe' ri nimalaj tapia che u banic ri ch'o'j ruc' ri tinimit? ¿La ma ta iweta'm chi ri winak quequiq'uiak ulok alalaj tak jastak piwi', junam jas ri xban pa Tebes xa jun ixok xcämisam ri Abimelec ri u c'ojol ri Jerobaal, xuq'uiak c'u ulok jun ca' kas puwi' ri u tapia ri tinimit? ¿Jas c'u che sibalaj xixkeb chuxe' ri tapia?”

²³ Xutzelej c'u u bixic ri tako'n che: “Ri ajch'ojab ri xebel ulok che u banic ch'o'j kuc' chrij ri tinimit c'o na qui chuk'ab chkawäch, xujcuin c'ut xekatzelej chquij c'ä xeboc na bic pa ri qui tinimit.

²⁴ Chi' c'ut ri aj q'uiakbal ch'ab xequiq'uiak ulok tak ri qui ch'ab paquiwi' ri e ajch'ojab la, xecäm c'u jujun chque ri e qui nimal ri ajch'ojab are c'u jun ri Uriy ri aj hitit.”

²⁵ Xutzelej c'ut u bixic ri David che ri tako'n: “Chabij che ri Joab chi moc il che we c'ulmatajic ri', amak'el je quec'ulmataj wa'. Chucojo' c'u u chuk'ab che u ch'äquic ri tinimit, c'ä chusachisaj na u wäch. Are c'u ri at chaya' chajin anima' che.”

²⁶ Aretak xretamaj ri rixokil ri Uriy chi xcäm ri rachajil, xuchap bis xebucoj ratz'iak re bis;

²⁷ aretak c'u xoc'ow ri u bis, xtakan ri David che u c'amic ulok xuc'am c'u pa ri rachoch xuban rixokil che, xralaj c'u jun u c'ojol. Man xkaj ta c'u chuwäch ri Ajawaxel ri xuban ri David.