Ucab Ajawinelab 23 - Quiché Bible

Ri ajawinel xurak u chi' che u siq'uixic ronojel ri cubij ri wuj

¹ Are' c'u ri ajawinel xutak qui siq'uixic conojel ri nimak tak tatayib ri e c'o pa Juda xukuje' ri e c'o pa Jerusalen, rech caquimulij quib ruc'.

² Ri ajawinel xukuje' conojel ri achijab aj Juda, conojel ri aj Jerusalen, ri e cojol tabal tok'ob, ri e k'axal tzij xukuje' ri winak chnimalaj conojel, kas ruc' ri sibalaj ch'utin c'ä ruc' ri sibalaj nim na, xebe chupam ri rachoch ri Ajawaxel. Chila' ri ajawinel co xurak u chi' che u siq'uixic ronojel ri cubij ri wuj re ri c'ulwächinic ri xrik chupam ri rachoch ri Ajawaxel.

³ Xutac'aba' c'u rib ri ajawinel chuxcut ri rakan ja, xuya' c'u u tzij chuwäch ri Ajawaxel chi caniman che, cuban c'ut ri cubij ruc' tz'akatil, man ruc' ta quieb u c'u'x cutakej qui banic ri e u takomal, ri e u takanic xukuje' tak ri pixab, xukuje' ri qui tz'akatisaxic ri u cholajil ri c'ulwächinic ri e tz'ibatal chupam ri wuj. Ronojel c'ut ri tinimit xuya' u tzij che u banic.

Ri colomanic ri xuban Josiy

⁴ Are' c'u ri ajawinel xutak ri Hilsiy, qui nimal ri e cojol tabal tok'ob, xukuje' ri ucab cojol tabal tok'ob xukuje' ri e chajil tak oquibal, chi chequesaj ulok chupam ri rachoch ri Ajawaxel conojel ri jastak ri xecoj che u ya'ic k'ijilanic che ri Baal xukuje' che ri Asera xukuje' ri xecoj che u ya'ic k'ijilanic chque ri ch'imil ri e c'o cho ri caj, xebuporoj c'u chrij ri Jerusalen, pa tak ri ulew re ri Sedron, xebuc'am c'u bic ri qui chajil pa Betel.

⁵ Xeresaj ri e cojol tabal tok'ob pa ri qui chac ri e cojom can cumal tak ri ajawinelab re Juda che qui poroxic c'oc' tak k'ol pa tak ri k'ijilabal ri quek'ijilax wi ri diosib ri e c'o pa tak ri tinimit pa Juda xukuje' tak ri e c'o chrij ri Jerusalen, xukuje' ri e cojol tabal tok'ob ri quequiporoj coc' tak k'ol chuwäch ri Baal, chuwäch ri k'ij, chuwäch ri ic', chquiwäch ri nimak tak ch'imil xukuje' chquiwäch ri alaj tak ch'imil ri e c'o cho ri caj.

⁶ Xresaj bic chrij ri Jerusalen ri u wächbal ri Asera ri c'o chupam ri rachoch ri Ajawaxel, xuporoj chuchi' ri nima' Sedron c'ä xchajir na xujopij c'ut chupam ri siwan ri tixbal u mes ri tinimit.

⁷ Xukuje' xebutuquij tak ri ja ri queban macun wi ri achijab cuc' cach achijab jacha ri cuban ri quech ri nim ch'utin, ri cäquiban che u ya'ic jun k'ijilanic chupam ri rachoch ri Ajawaxel, ri quequiquemej wi tak ri atz'iak ri ixokib ri quecoj chrij ri ixok dios Asera.

⁸ Xutak c'u qui siq'uixic conojel ri e cojol tabal tok'ob ri e c'o pa tak ri tinimit pa Juda, xebuc'äjij c'ut conojel tak ri e k'ijilabal ri quek'ijilax wi diosib, kas pa Jeb c'ä pa Beerseb, ri qui porom wi c'oc' tak k'ol we e cojol tabal tok'ob ri', xebut'akij tak ri porobal ri quech tak ri itzel tak uxlabal ri e c'o chuchi' ri roquibal ri Josue, ri k'atal tzij puwi' ri nimalaj tinimit, ri e c'o chuchi' ri oquibal pa ri tinimit, pa ri mox k'ab.

⁹ E are tak c'ut ri e cojol tabal tok'ob ri quepatanij pa tak ri k'ijilabal ri que k'ijilax wi diosib man quebopan ta ruc' ri porobal ri rech ri Ajawaxel ri c'o pa Jerusalen, caquitij c'u ri caxlanwa ri man yo'm ta ch'am ruc' cuc' ri cach tak e cojol tabal tok'ob.

¹⁰ Ri Josiy xukuje' xuc'äjij ri porobal ri c'o pa ri beya' re Ben-inom, rech man c'o ta jachin jun cuporoj ta ri u c'ojol mawi ri u mia'l jacha' che tabal tok'ob che ri Moloc.

¹¹ Xeresaj tak ri quiej ri xequicoj tak ri ajawinelab re Juda che u ya'ic u k'ij ri k'ij, ri e c'o chuchi' ri oquibal chupam ri rachoch ri Ajawaxel, qui rikom quib ruc' ri rachoch ri Natan-melec, ri cätakan paquiwi' tak ri ja ri ulew, xukuje' xuporoj ri u carwaj ri k'ij.

¹² Xebutuquij c'u xukuje' tak ri porobal ri xequiyac tak ri ajawinelab re Juda puwi' ri nimalaj rachoch ri Acaz, xukuje' tak ri e u porobal ri Manases ri xebuyac cho tak ri uwo ja re ri rachoch ri Ajawaxel; xebumuchu xebuq'uiaka' c'ut ri qui ch'akatil chupam ri nima' Sedron.

¹³ Ri ajawinel xukuje' xebuc'äjij tak ri k'ijilabal ri quek'ijilax wi diosib ri e c'o pa ri elebal k'ij che ri Jerusalen, pa ri u mox ri elebal k'ij che ri u Juyubal u Che'al Aseitun, ri e u yacom can ri Salomon, ajawinel re Israel, che ri Astarte, ixok dios ri quetzelax u wäch quech ri aj sidonib; che ri Quemos, dios ri quetzelex u wäch quech ri aj Moab, xukuje' che ri Milcom, ri dios ri quetzelex u wäch quech ri aj amonib.

¹⁴ Xukuje' xebumuch tak ri abaj xukuje' tak ri tastalic tak cuta'm, xebubalij c'u qui bakil cäminakib chquipam tak ri c'olbal ri e c'olinak wi canok.

¹⁵ Are c'u ri porobal xukuje' ri k'ijilabal ri c'o pa Betel ri quek'ijilax wi diosib, ri xebuyac can ri Jeroboam, u c'ojol ri Nabat, ri xbanowic chi xemacun ri aj israelib, ri Josiy xebumuchu c'ä xebuc'äjij na, xut'ik c'u k'ak' chque xukuje' xut'ik c'u k'ak' che ri u wächbal ri Asera.

¹⁶ Aretak xtzelej ulok ri Josiy xtake c'u u wäch chque tak ri mukbal ri e c'o kas puwi' we juyub ri', xtakanic chi chebesax ulok ri bak ri e c'o chquipam, xebuporoj c'ut puwi' ri porobal, je quitz'ilobexic wa' xubano. Jewa' xban che u tz'akatisaxic ri u tzij ri Ajawaxel ri xuya' u bixic ri k'axal tzij.

¹⁷ Ri ajawinel xubij: “¿Jas wa' chi tac'atic mukbal ri quinwil apan jela'?” Ri achijab aj tinimit xquitzelej u bixic che: “Chi' mukutal wi ri k'axal tzij ri u petic pa Juda ri xuya' c'u u bixic ri banom la che ri porobal ri c'o pa Betel.”

¹⁸ Xuya' c'u takanic ri Josiy: “Chiya' canok jas u banom. C'o jun machapow ri u bakil.” Jeri' nim xil wi ri e u bakil ri k'axal tzij ri xpe pa Juda xukuje' ri e rech ri k'axal tzij ri xjeki' pa Samar.

¹⁹ E are tak c'ut conojel ri ja ri quek'ijilax wi tak ri diosib ri e c'o pa Samar, ri e yacom tak cumal ri ajawinelab re Israel ri xequiyacbej royowal ri Ajawaxel, xchupisax qui wäch rumal ri Josiy junam xuban chque jas ri xuban pa Betel.

²⁰ Xebucämisaj c'u ne na paquiwi' ri porobal conojel ri quecojow tabal tok'ob paquiwi' ri k'ijilabal ri quek'ijilax wi ri diosib, xebuporoj c'u ri qui bakil ri cäminakib paquiwi'. Xtzelej c'ut ri ajawinel pa Jerusalen.

Ri Josiy caroc'owisaj ri oc'owem

²¹ Ri ajawinel xuya' takanic chi ronojel ri tinimit chroc'owisaj ri Oc'owem che u ya'ic u k'ij ri Ajawaxel ri u Dios, je jas ri tz'ibatal chupam ri wuj rech ri c'ulwächinic.

²² Mawi jumul oc'owisam ta jun Oc'owem ri junam ta ruc' wa' kas pa ri qui k'ijol ri c'amal tak be ri xetakan puwi' ri Israel, mawi pa ronojel ri qui k'ijol ri ajawinelab re Israel xukuje' ri e rech ri Juda.

²³ Pa ri uwajxaklajuj (18) junab re ri rajawinic ri Josiy aretak xoc'owisax we Oc'owem ri' pa Jerusalen che u ya'ic u k'ij ri Ajawaxel.

Ri u rilinic ri Josiy

²⁴ Ri Josiy xukuje' xusachisaj qui wäch ri ajk'ijab xukuje' ri ch'obonelab, ri e diosib ri e c'o pa tak ri cachoch ri winak xukuje' niq'uiaj e diosib chic, xukuje' conojel ri xojibalalaj tak jastak ri xecoj che k'ijilanic ri quilitaj cuc' ri winak pa Juda xukuje' pa Jerusalen. Xuban wa' che u tz'akatisaxic ri cubij ri pixab ri tz'ibatal chupam ri wuj ri u rikom ri Hilsiy ri cojol tabal tok'ob chupam ri rachoch ri Ajawaxel.

²⁵ Man c'o ta jun ajawinel ri xc'oji' ta nabe chuwäch mawi c'ä te' ta xpe chrij are', ri jacha' ta ri are' ri xtzelej ta ruc' ri Ajawaxel ri ruc' ta ronojel ri ranima' xukuje' ruc' ta ronojel ri u c'aslibal xukuje' cuc' ta conojel ri u chuk'ab, je jas ta ri u cholajil ri u pixab ri Moises.

²⁶ Pune' c'u ruc' ronojel wa', ri Ajawaxel xutakej oyowaric, c'ä c'o na ri royowal chrij ri Juda cumal conojel ri etzelal ri xyacbex royowal rumal ri Manases.

²⁷ Rumal ri' xubij ri Ajawaxel chi curesaj ri Juda chuwäch, jacha' ri xuban che resaxic ri Israel, cuxutuj c'u can ri Jerusalen ri u cha'om, xukuje' ri rachoch ri u bim wi chi chila' cajeki' wi ri u bi'.

Ri u cämical ri Josiy

²⁸ Ri u tz'akatil ri u tzijobelil ri Josiy xukuje' ronojel ri xubano, tz'ibatal chupam ri wuj rech ri qui tzijobelil tak ri ajawinelab pa Juda.

²⁹ Pa ri u k'ijol, ri paraon Necao, ajawinel re Ejipt, xutakej u be xbe che u suq'uil ri Euprats che u to'ic ri ajawinel re Asiriy. Ri ajawinel Josiy xel bic che u c'ulaxic; pa Meguid c'ut, xuwi c'u xilitaj rumal ri Necao, xucämisaj.

³⁰ Xyac bic cumal ri rach k'atal tak tzij xya' bic chupam jun carwaj xquic'am bic kas pa Meguid c'ä pa Jerusalen, xmuk c'u chila' chupam ri u mukubal. Ri e aj tinimit xquic'am c'ut ri Joacaz, u c'ojol ri Josiy, xquitaso jacha' che ajawinel xquicoj c'u che u q'uexwäch ri u tat.

Ri rajawinic ri Joacaz pa Juda

³¹ Juwinak oxib u junab ri Joacaz aretak xuchaplej ajawinic, oxib ic' c'ut xajawin pa Jerusalen. Hamutal u bi' ri u nan, u mia'l ri Jeremiy, aj Libna.

³² Ri e u banoj man e utz ta xeril ri Ajawaxel, xak junam cuc' ri e u mam.

³³ Ri ajawinel Necao xutz'apij pa che' pa Ribla, chupam ri ulew re ri Hamat, rech ma ta cajawin pa Jerusalen xucoj c'u chuk'ab che ri winak pa Juda chi rajawaxic cutoj oxc'al oxlajuj (73) quintal sak puak xukuje' oxib arob k'an puak.

³⁴ Ri ajawinel Necao are' xucoj na ri Eliaquim che ajawinel u c'ojol ri Josiy, che u q'uexwäch ri u tat, xuq'uex c'ut ri u bi' xucoj Joasim chrij, xumajij c'ut ri Joacaz xuc'am bic pa Ejipt, chila' c'u xcäm wi.

³⁵ Ri Joasim xujach che ri Necao ri sak puak xukuje' ri k'an puak ri cutok'ij wa', che c'u u tojic xutok'ij na jun cuchuj chque conojel ri winak ri e c'o pa ri ulew. Chquijujunal c'ut xquitoj ri alcabal ri xtok'ix chque ruc' ri sak puak xukuje' ruc' k'an puak ri alcabal ri xk'at chquij, rech cäjach che ri paraon Necao.

Ri rajawinic ri Joasim pa Juda

³⁶ Juwinak job (25) u junab ri Joasim aretak xuchaplej ajawinic, julajuj (11) junab c'ut xajawin pa Jerusalen. Zebud u bi' ri u nan, u mia'l ri Pedaiy, aj Rum c'ut.

³⁷ Ri e u banoj itzel xeril ri Ajawaxel, junam jas ri xquiban ri e u mam.