Ucab Ajawinelab 10 - Quiché Bible

Ri Jehu cuq'uistzij paquiwi' conojel ri e rija'lil ri Acab

¹ Ri Acab e c'o oxc'al lajuj (70) u c'ojol pa Samar, jeri' ri Jehu xebutz'ibaj bic wuj chque tak ri k'atal tak tzij rech ri tinimit, chque ri nimak tak tatayib xukuje' chque ri e chajil tak quech ri e u c'ojol ri Acab, ri xubij wi bic chque:

² “E c'o c'u ya' ri e u c'ojol ri iwajaw iwuc', xukuje' tak ri e u quiej xukuje' tak ri e u carwaj rech ch'o'j ri cowilaj u c'olbal xukuje' tak ri e u ch'ojibal, aretak c'u chopan we wuj pa i k'ab,

³ chicha' ri utz na ri c'o na u no'j chquixo'l ri e u c'ojol ri iwajaw, chi t'uyuba' puwi' ri u tem re rajawibal ri u tat chicojo' c'u i chuk'ab chito' ri rachoch ri iwajaw.”

⁴ Xuya' c'u nimalaj xe'n ib wa' chque, xquibij c'ut: “We e quieb ajawinelab man xecuin taj co ta xetaq'ui' chuwäch, ¿jas ta ri cujcuin wi cakatac'aba' ta kib uj chuwäch?”

⁵ Are' c'u ri takanel pa ri rachoch ri ajawinel, ri k'atal tzij ri cätakan puwi' ri tinimit, ri nimak tak tatayib ri e chajil tak quech ri e u c'ojol ri Acab xquitak u bixic che ri Jehu: “Uj uj c'o chuxe' ri a takanic, cakaban c'u na ronojel ri cujatak wi, man cakacoj ta jachin jun che ajawinel. Chabana' ri cäkaj chawäch.”

⁶ Ri Jehu xebutz'ibaj chi bic chucamul je xubij bic wa': “We ri ix junam i wäch wuc' we c'u qui nimaj tak ri e nu takanic, chebic'ama' ulok ri qui jolom ri e u c'ojol ri iwajaw, je tak c'u wa' chwek chixpet che wilic pa Jezreel.” Ri oxc'al lajuj u c'ojol ri ajawinel e jachom chquixo'l ri winak ri nimak qui k'ij ri e c'o pa ri tinimit, ri e qui q'uiyisam,

⁷ we winak ri' aretak xquic'am ri wuj, xequic'am ri oxc'al lajuj alabom xequicämisala'; xequiya' c'ut ri qui jolom chquipam jujun tak chicäch xequitak c'u bic pa Jezreel.

⁸ Aretak xopan ri tako'n xubij che ri Jehu: “E c'amom ulok ri qui jolom ri e u c'ojol ri ajawinel.” Xuya' takanic ri Jehu: “Chibana' camulaj chque chuchi' ri oquibal chupam ri tinimit, chebiya' c'u can chila' c'ä che re ri u sakaribal.”

⁹ Chucab k'ij xel ulok ri Jehu, xutac'aba' rib xubij chque conojel ri winak: “Ix man c'o ta i mac. In ri' ri xinwalijisaj wib chrij ri wajaw xincämisaj c'ut; ¿jachin c'u xecämisan conojel wa'?

¹⁰ Kas ba' chiwetamaj chi man c'o ta ri u bim ri Ajawaxel chrij ri Acab ri ma ta catz'akatic. Kas are' ri Ajawaxel banowinak ri xuya' u bixic rumal ri Eliy, ri pataninel rech.”

¹¹ Ri Jehu xebucämisaj pa Jezreel ri niq'uiaj rija'lil chic ri Acab, conojel ri rachijab ri nimak qui k'ij xukuje' ri e rachil ri canima' quib ruc', xukuje' tak ri e u cojol tabal tok'ob. Man c'o ta jun ri xuc'asba' ta canok.

¹² Xbe c'ut pa Samar, benak c'u pa ri be c'o chunakaj ri Bet-equed quech ri aj yuk'ab,

¹³ chila' c'u xeburik wi ri e rachalal ri Ocoziy, ajawinel re Juda. Ri Jehu xuc'ot qui chi': “¿Ix jachin tak ix?” Ri e are' xquitzelej u bixic che: “Uj rachalal ri Ocoziy, uj petinak che u ya'ic rutzil qui wäch ri e u c'ojol ri ajawinel xukuje' ri e ral ri ajawinel ixok'.”

¹⁴ Ri Jehu xuya' takanic chque ri e petinak ruc': “E c'asc'oj chebichapa'.” E c'asc'oj xechap cumal ri e petinak ruc', xquik'at c'ut ri qui kul chuxcut ri c'ua' re Bet-equed quech ri aj yuk'ab, e cawinak quieb (42) chi achijab, man c'o ta c'u jun xquic'asba' ta canok.

¹⁵ Aretak ri Jehu xel bic chila', xuc'ulaj ri Jonadab, u c'ojol ri Recab, ri benak che rilic. Ri Jehu xuya' rutzil u wäch xubij c'u che: “¿La e utz ri a chomanic chwij, e je jas ri wech in chawe at?” “Jewa',” xcha' ri Jonadab. “We jeri', chaya' ri a k'ab chwe,” xcha' ri Jehu. Ri Jonadab xuya' ri u k'ab che, ri Jehu xupakaba' chupam ri u carwaj,

¹⁶ xubij c'u che: “Chinawachilaj cawil na ri nu rayinic che u patanixic ri Ajawaxel.” Xuc'am c'u bic chupam ri u carwaj.

¹⁷ Aretak c'u xoc pa Samar ri Jehu xebucämisaj conojel ri e rija'lil ri Acab ri c'ä e c'aslic. Xuq'uisisej tzij paquiwi', je jas ri xuya' u bixic ri Ajawaxel che ri Eliy.

Ri Jehu cusachisaj u wäch ri u k'ijilaxic ri Baal

¹⁸ Xumulij c'ut ri Jehu ronojel ri tinimit, xubij c'u chque: “Ri Acab xa' jubik' ri k'ijilanic ri xuya' che ri Baal, ri in nimalaj k'ijilanic quenya' che.

¹⁹ Rumal ri' chebisiq'uij conojel ri k'axal u tzij ri Baal, ri e k'ijilanelab xukuje' e u cojol tabal tok'ob ri Baal, ri ma ta c'o jun quel canok, nu suc'umam c'ut jun nimalaj tabal tok'ob che u ya'ic u k'ij ri Baal. Ri man copan taj cac'okox na.” Ri Jehu xuchomaj c'ut u banic we subunic ri' che u sachisaxic qui wäch ri e k'ijilal rech ri Baal;

²⁰ rumal ri' xuya' takanic chi cäban jun nimalaj nimak'ij che ri Baal, je c'u xbanic.

²¹ Xebutak c'u bic tako'n pa ronojel Israel, conojel c'ut ri e k'ijilanelab che ri Baal xebopan pa ri rachoch ri Baal. Man c'o ta jun ri ma ta xopanic, xnoj c'ut ri rachoch ri Baal.

²² Xubij c'u ri Jehu che ri c'olol atz'iak chi cheresaj ulok tak ri atz'iak re patan chque conojel ri e k'ijilal che ri Baal, are' c'u ri c'olol atz'iak je xubano,

²³ xoc c'u bic ri Jehu xukuje' ri Jonadab chupam ri rachoch ri Baal, xubij c'ut ri Jehu chque ri e k'ijilal ri Baal: “Miya' c'olbal chi c'o jachin jun chque ri quek'ijilan ri Ajawaxel c'o chixo'l, xane' xak xuwi ri quek'ijilan ri Baal.”

²⁴ Ri e k'ijilal ri Baal xeboc chupam ri rachoch ri Baal che qui chi'xic tabal tok'ob xukuje' tak tabal tok'ob ri quechajirisaxic. Are' c'u ri Jehu, xebucoj jumuch' achijab chuwäch ri rachoch ri Baal, xuya' c'u qui takquil: “Jachin jun chiwe cutzokopij bic jun chque ri achijab ri e nu jachom pa i k'ab, cutoj na ruc' ri u c'aslemal.”

²⁵ Aretak ri Jehu xuq'uis u chi'xic ri tabal tok'ob ri cachajirisaxic, xuya' takanic chque ri ajch'ojab xukuje' ri qui nimakil tak ri ajch'ojab: “¡Chixoc ulok chebicämisala' c'ut! ¡C'o jun manimajic!” Ri e rachijab ri Jehu xequicämisala' ruc' ch'ich' re ch'o'j, xequesaj c'u ulok chila' xequirokila' ulok xeboc c'ut chupam ri k'ijilabal rech ri rachoch ri Baal,

²⁶ xequesaj tak ulok tak ri tastalic tak cuta'm xequiporoj c'ut.

²⁷ Xquic'äjij ri porobal xukuje' ri rachoch ri Baal, xquiban jun tixbal mes che, ri c'ä je u banom camic.

²⁸ Jeri' ri Jehu xusachisaj u wäch ri Baal pa Israel.

²⁹ Man c'u ne xutas ta rib che qui banic ri macaj, ri xtzakibex quech ri e aj Israel rumal ri Jeroboam ri u c'ojol ri Nabat, xubano chi xemacun ri aj israelib, xutakej c'u u ya'ic k'ijilanic chque ri alaj tak ama'ib wacax re k'an puak ri c'o pa Dan xukuje' pa Betel.

³⁰ Ri Ajawaxel xubij che ri Jehu: “Utz c'u ya' ri e a banom chnuwäch xukuje' tak ri e a banoj ri e a banom e suc' chnuwäch, a banom c'u che ri rija'lil ri Acab ronojel ri nu chomam u banic, ri e awachalaxic quet'uyi' na puwi' ri tem re ajawibal ri c'o pa Israel c'ä chucaj ri ija'lil.”

³¹ Pune' c'u je xbix wa' che, ri Jehu man xoc ta il che ri kas u tz'akatisaxic ri u pixab ri Ajawaxel, ri u Dios ri Israel, man xutas ta c'u rib chquij ri macaj ri xemacun wi ri aj israelib rumal ri Jeroboam.

³² Pa ri k'ijol ri' ri Ajawaxel Dios xuchaplej u copixic ri rulew ri Israel. Ri Hazael xuchaplej u banic ch'o'j cuc' ri aj israelib pa conojel ri e u c'ulbatil:

³³ kas pa ri elebal k'ij che ri Jordan, pa ronojel ri ulew re Galaad, Gad, ri Ruben xukuje' ri Manases, xchaptaj c'u pa Aroer, ri c'o chuxcut ri nima' Arnon, cumajij c'ut ri Galaad xukuje' ri Basan.

³⁴ Ri u tz'akatil ri u tzijobelil ri Jehu xukuje' ronojel ri xubano, xukuje' tak ri e u mayibalil, tz'ibatal chupam ri wuj rech ri qui tzijobelil tak ri ajawinelab re Israel.

³⁵ Aretak xcämic xmuk pa Samar, ri xajawin c'ut pa ri u c'olbal are' ri u c'ojol, ri Joacaz u bi'.

³⁶ Ri Jehu juwinak job junab xajawin puwi' ri Israel, chupam ri tinimit Samar.