Santiago 5 - Quiché Bible

Caya' u bixic chque ri k'inomab

¹ ¡Chitatabej ba' wa', ix ri ix k'inomab! ¡Chixok'ok ruc' nimalaj bis, chiwok'ej ri c'axc'olil ri quepe na piwi'!

² K'ayinak ri i k'inomal, ri iwatz'iak e chicopirinak chic.

³ Ri i k'an puak xukuje' ri i sak puak qui chulum chi quib. Ri qui pusil cuk'alajisaj na jas ri i banom, cusach c'u na i wäch jacha' ri k'ak'. I mulin i k'inomal chque ri q'uisbal tak k'ij.

⁴ Chiwilampe', ri puak, ri man tz'akat taj ri i yo'm chque ri ajchaquib ri xeyicow qui wäch ri e iwulew. We puak ri' cätajin quixuc'okoj; are' c'u ri Ajawaxel ri c'o ronojel u cuinem u tom ri qui tzujunic we ajchaquib ri'.

⁵ Ix c'olinak pa k'inomal cho ri uwächulew, i jachom iwib pa tak quicotemal. I k'obisam ri i c'u'x je jas che ri k'ij re cämisanic.

⁶ I k'atom tzij paquiwi' xukuje' e i cämisam ri e suc'ab. Ri e are' c'ut man xquiya' ta u q'uexel ri c'ax chiwe.

Chiweyej na c'ä cäpe na ri Ajawaxel

⁷ Are c'u ri ix wachalal, chiweyej na c'ä cäpe na ri Ajawaxel. Je jas ri ajchac cäreyej na ri u wächinic ri u tico'n. Cäreyej na c'ä cäpe na ri nabe tak jäb xukuje' ri q'uisbal tak jäb.

⁸ Xukuje' ri ix chiweyej na. Co chicanajisaj ri iwanima'. Cäpe c'u na ri k'ij aretak cäpe ri Ajawaxel.

⁹ Wachalal, mixch'ach'atalob chixo'l rech man cäk'at ta tzij piwi'. Are ri Dios, ri k'atal tzij, tac'al chi' ri uchi'ja.

¹⁰ Wachalal, ri k'axal tak u tzij ri Dios ri xetzijon pa ri u bi' ri Ajawaxel xquirik c'ax, xqueyej c'ä xoc'ow na ri c'axc'olil. Chebic'ama' che c'utbal, chibana' iwe jas ri xquiban ri e are'.

¹¹ Ri uj c'ut cäkabij chi tewichital ri winak ri cäquich'ij ri c'ax. I tom ri u ch'ijonic ri Job, iwilom jas xuban ri Ajawaxel che aretak xoc'ow ri u c'axc'olil. Iwilom chi ri Ajawaxel cutok'obisaj qui wäch ri winak, quel u c'u'x chque.

¹² Ri sibalaj rajawaxic, wachalal, micoj ri caj o micoj ri ulew pa i tzij che u bixic ri chi'nic ri kas cäban na. Micoj apachique jasach pa i tzij che u bixic ri chi'nic ri kas cäban na. Xane' aretak quibij “je'”, xuwi “je'” chibij. Aretak quibij “man je taj”, xuwi “man je taj” chibij. Chibana' wa' rech man cäk'at ta tzij piwi'.

Chibana' ch'awem ruc' Dios

¹³ ¿La c'o jun chixo'l curik c'ax? Rajawaxic cuban ch'awem ruc' Dios. ¿La c'o jun cäquicotic? Chubixoj bix che u nimarisaxic u k'ij ri Dios.

¹⁴ ¿La c'o jun yawab chixo'l? Chebusiq'uij ri tatayib ri quetakan paquiwi' ri comon cojonelab, chquibana' ch'awem ruc' Dios puwi', chquicojo' aseit puwi' pa ri u bi' ri Ajawaxel.

¹⁵ Are ri ch'awem ruc' Dios ruc' cojonic querutzirisaj na ri yawab, ri Ajawaxel cuwalijisaj c'u na. We c'o mac u banom, quesachtaj na ri u mac.

¹⁶ Chik'alajisala' ri i mac chiwäch. Chibanala' ch'awem ruc' Dios piwi', rech quixcunatajic. Sibalaj nim na u cuinem ri u bochi'nic jun suc'alaj winak.

¹⁷ Ri k'axal tzij Eliy are jun achi junam u banic kuc' uj. Ri are' xuban ch'awem ruc' Dios, xutz'onoj chi man cäpe ta jäb. Man xpe ta c'u ri jäb puwi' ri uwächulew oxib junab ruc' wakib ic'.

¹⁸ Xch'aw chi jumul ruc' Dios, ri caj xuya' ulok ri jäb xukuje' ri ulew xuya' u wächinic.

¹⁹ Wachalal, we c'o jun chixo'l u yo'm can ri kastzij, c'o chi c'u jun cabanow che chi catzelej pa ri utzalaj be,

²⁰ chich'obo' chi ri jun ri cäresaj ri ajmac pa ri be jawije' ri sachinak wi, cuto' na ri ranima' wa' chuwäch ri cämical, xukuje' cubano chi quesachtaj ri q'ui mac.