Salmib 73 - Quiché Bible

Ri rutzil ri Dios

¹ ¡Ri Dios sibalaj utz ruc' ri Israel, cuc' ri ch'ajch'oj canima'!

² Jubik' ta chic, xintzak ta ri; xejilijob jubik' ri wakan.

³ Xinna' quiäk rayinic aretak xinwilo jas caquiban ri banal tak nimal xukuje' ri e banal tak etzelal quek'inomaric.

⁴ Ri e are' man c'o ta cubij qui c'u'x che ri cämical, catiltit cakan qui k'ab;

⁵ man qui rikom ta ri c'axc'ol jas ri cäquirik ri winak mawi e elinak ch'u'j jas ri niq'uiaj chic.

⁶ Rumal ri' ri banoj nimal are' qui chachal, ri tokinic are' catz'iak;

⁷ che ri abajalaj canima' cäpe wi ri macaj, man cajilataj ta c'u ri itzel tak qui chomanic.

⁸ Ruc' etz'ben wächaj, banoj nimal, man c'o ta q'uixbal caquicoj xib che u banic etzelal xukuje' tokinic;

⁹ c'ax quech'aw che ri caj ruc' ri qui chi', cäquibinibej ri uwächulew ruc' ri cak'.

¹⁰ Rumal ri' cäya' qui k'ij cumal ri winak, man c'o ta c'u jun il cäquirik ta chquij.

¹¹ Quec'otow chi'aj: “¿La cäretamaj ta puch ri Dios? ¿La xa puch coc ta lo pa u jolom ri aj chicaj?”

¹² ¡Chixca'y chque we banal tak etzelal ri'! Man c'o ta c'ax cäquirik che u mulixic ri qui k'inomal.

¹³ ¡Man c'o ta cupatanij chwe chi josk'ital ri wanima', xukuje' chi queben josk'ij ri nu k'ab che ronojel etzelal!

¹⁴ Pa conojel c'u jok'otaj quepe ch'ayiquil panuwi', ronojel c'u ak'abil cäc'äjisax nu wäch.

¹⁵ We ta je xinchomanic jacha' ri e are', xinux ta jachinelab quieb qui wäch ri' xebenjach ta ri' ri awalc'ual.

¹⁶ Xintijtobej u ch'obic wa' xinwil c'ut chi sibalaj c'ax.

¹⁷ Xuwi aretak xinoc chupam ri cak'ijilax wi ri Dios c'äte ri' xinch'obo jawije' quebetakal wi na:

¹⁸ E u tac'abam pa jun c'olbal ri cäjililic, quebuch'icmij c'u na bic pa ri siwan.

¹⁹ ¡Xa' pa jok'otaj cäsach qui wäch! ¡Ri xe'n ib caq'uisow na tzij paquiwi'!

²⁰ Aretak ri lal, Ajawaxel, cäwalij la, jacha' ri aretak cac'astaj jun che jun waram, cäxutuj c'u la ri subunelalaj u wächbal.

²¹ Ri in xinnoj che c'ayil, xinna' nimalaj k'oxom pa ri wanima',

²² rumal c'u rech chi in man c'o ta nu no'j, man quinch'obon taj; ¡xinjunamataj ruc' jun awaj chwäch la!

²³ Amak'el c'ut in c'olinak uc' la. In yukem la che ri nu wiquiak'ab,

²⁴ c'amom la nu be cuc' tak ri pixbenic la, chuq'uisbalil quinc'ulaj na la ruc' quicotemal.

²⁵ ¿Jachin ta ri quinrik pa ri caj? Xuwi ri lal. Aretak in c'o chi uc' la man quinrayij ta chic ri c'o cho ri uwächulew.

²⁶ Ronojel ri nu cuerp cämem cubano, ri Dios c'ut are' junalic wechbal are' cäyo'w u chuk'ab ri wanima'.

²⁷ Ri cäquinajtajisaj quib che la quecäm na; cäsach na la u wäch ri man jic ta cäbin chwäch la.

²⁸ Ri in c'ut quinkeb ruc' ri Dios, are wa' ri utz na chwe in. Lal, Ajawaxel xukuje' nu Dios, lal nu panibal, quinwesaj na u tzijol ronojel ri banom la.