Salmib 72 - Quiché Bible

Ch'awem ruc' Dios puwi' ri ajawinel

¹ Ya' la, oh Dios, che ri ajawinel, ri kas suq'uilal la xukuje' colomal,

² rech ruc' colomal xukuje' suq'uilal cajawin puwi' ri tinimit la xukuje' paquiwi' ri mebayib la.

³ Ri c'ache'laj xukuje' ri nimak tak juyub che quich'ij jamaril xukuje' colomal che ri tinimit.

⁴ ¡Chubana' suq'uilal ri ajawinel chque ri mebayib! ¡Chebuto'tajisaj ri calc'ual ri c'o qui rajawaxic, chebuxak'alej c'ut ri e banal tak c'ax!

⁵ ¡Chuna' rib ri ajawinel amak'el chwäch la, joropa' k'ijol cabeytaj ri k'ij xukuje' ri ic'!

⁶ Chux junam ruc' ri jäb xukuje' ri räxk'ab, ri cäquijaj ri ulew xukuje' ri k'ayes.

⁷ ¡Chtelechi'n ri jamaril xukuje' ri colomal pa tak ri k'ij ri cäk'atan tzij, c'ä cäsach na u wäch ri ic'!

⁸ ¡Chajawin chuchi' ri jun plo c'ä chuchi' ri jun plo chic, cächapletaj bic ruc' ri nima' Euprats c'ä pa ri q'uisbal u jutz' ri uwächulew!

⁹ ¡Chi ri e u c'ulel, ri e jekel pa ri chaki'j uwo sak, chquijacha' quib pa u k'ab e mach'amoj!

¹⁰ ¡Chec'am tak ulok sipanic che xukuje' tak cuchuj cumal ri ajawinelab aj Tarsis xukuje' cumal ri tak ri tinimit ri e c'o chupam ri plo, ri ajawinelab re Saba xukuje' ri e rech Seba!

¹¹ ¡Chi conojel c'ut ri ajawinelab chexucul chuwäch! ¡Chi conojel c'ut ri nimak tak tinimit chepatanin che!

¹² Are' c'u cäyo'w na ri to'banic che ri meba' ri cätz'ononic, xukuje' ri c'o u rajawaxic ri man c'o ta jachin cabanow tok'ob che u to'ic.

¹³ Cutok'obisaj na qui wäch ri man nim ta queilic. Cuto'tajisaj c'ut ri qui c'aslemal ri mebayib.

¹⁴ Queresaj pa ri latz' xukuje' pa ri rikoj c'ax, sibalaj c'u pakal ri rajil ri qui c'aslemal chuwäch.

¹⁵ ¡Nim u k'ij ri ajawinel! ¡Chyo'k ri k'an puak che re Saba! ¡Amak'el chban tz'ononic che ri Dios puwi'!

¹⁶ ¡Mat chq'uis ri trico pa ri ulew; sibalaj ta chwächin paquiwi' tak ri juyub! ¡Chwächin ri ija' jacha' ri u wächinic ri Libano, chec'ol q'ui qui jolom trico jacha' ri k'ayes pa ri juyub!

¹⁷ ¡Chjekel ri u bi' ri ajawinel amak'el; chbeytaj ri utzalaj u tzijol jacha' ri u beytajic ri k'ij! ¡Conojel ri nimak tak tinimit ri e c'o cho ri uwächulew, chquirika' tewichibal rumal are'! ¡Chi conojel ri nimak tak tinimit chquibij chi tewichitalic!

¹⁸ Tewichital ri Dios, ri Ajawaxel, ri u Dios ri Israel, xuwi' c'u ri are' cuban nimak tak jastak;

¹⁹ tewichital ri u bi' ri nim u k'ij. ¡Ronojel ri uwächulew chnoj che ri u juluwem! ¡Je che'lok!

²⁰ Waral cäq'uis wi tak ri e u ch'awem ri David, ri u c'ojol ri Isayi.