Salmib 70 - Quiché Bible

Pet la chanim che nu to'ic

¹ Nu Dios, ¡chinesaj la pa ri c'ax! Ajawaxel, ¡saj la chanim che nu to'ic!

² ¡Chtze'x qui wäch ri cäquitzucuj nu cämisaxic! ¡Chebanimaj rumal q'uixbal ri cäcaj cäquiban c'ax chwe!

³ ¡Chebanimaj ruc' q'uixbal ri cäquitze'j nu wäch!

⁴ Conojel c'ut ri quetzucun che la chenoj ta che quicotemal; e are' tak c'ut ri caquirayij ri to'tajisanic la chquibij amak'el: “¡Nim u k'ij ri Dios!”

⁵ Are' c'u ri in ri in meba' xukuje' in ch'ibatajinak, nu Dios, ¡saj la chanim che nu to'ic! Lal ri' ri lal to'l wech quintor c'u la; ¡mäbey ib la, Ajawaxel!