Salmib 34 - Quiché Bible

U nimarisaxic u k'ij ri rutzil ri Ajawaxel

¹ Quintewichi'j na ri Ajawaxel pa conojel jok'otaj, ri nu chi' amak'el cäk'ijilan na che.

² Pa ri Ajawaxel quinnimarisaj wi na nu k'ij; ¡chitampe', chixquicot c'ut, winak ri man nimak ta i k'ij!

³ Ka k'ijilaj junam xa pa jun ch'abal ri u nimalil ri u bi' ri Ajawaxel.

⁴ Xintz'onon che ri Ajawaxel, ri are' xutzelej u wäch ri xintz'onoj che, xinresaj c'u pa conojel ri nu xibriquil.

⁵ Ri queca'y che ri Ajawaxel cäjuluw na ri qui palaj rumal quicotemal, mawi jubik' quet'orix ta na.

⁶ We meba' ri' xurak u chi', xtataj c'u rumal ri Ajawaxel xresaj c'u chquipam conojel ri e u c'axc'olil.

⁷ Ri u tako'n ri Ajawaxel quebuch'uku xukuje' quebuto'tajisaj ri nim caquil wi ri Ajawaxel.

⁸ Chixtijtobenok, chiwila' c'ut chi utz ri Ajawaxel. ¡Utz re ri winak ri cucu'ba' u c'u'x chrij ri are'!

⁹ Nim chiwila' wi ri Ajawaxel, ri i tasom iwib che, man c'o ta c'u cajwataj na chque ri nim caquil wi.

¹⁰ Ri k'inomab quebux mebayib, caquicoch' c'u na wi'jal, e are tak c'ut ri quitzucum ri Ajawaxel mawi jubik' queq'uetet ta che jun utzil.

¹¹ Chixpetok, nu c'ojol, chinitatabej: quenc'utu' c'ut chiwäch ri u ya'ic u k'ij ri Ajawaxel.

¹² ¿La cawaj naj catc'asi'c? ¿La cawaj cawoc'owisaj ri a c'aslemal ruc' quicotemal?

¹³ Chajic'a' ri awak' che u bixic etzelal; mawi c'u jumul maquibij banoj tak tzij ri e a chi'.

¹⁴ Chatasa' awib chrij ri etzelal, chabana' c'u ri utz; chatzucuj u banic ri jamaril, chatakej c'ut.

¹⁵ Ri Ajawaxel quebuchajij ri winak ri utz canima', cutatabej ri qui rakoj chi'aj.

¹⁶ Ri Ajawaxel quebuc'ulelaj ri e banal tak etzelal, che u chupisaxic u wäch ri natabal quech cho ri uwächulew.

¹⁷ Ri Ajawaxel coc il che ri cok'ej ri winak ri utz canima', queresaj c'u chquipam tak ri qui c'axc'olil.

¹⁸ Ri Ajawaxel nakaj c'o wi che quito'tajisaxic ri u banom ch'akatak ri canima', qui tzakom c'ut ri eyebal c'uxaj.

¹⁹ Ri utzalaj winak ri' coc'ow pa q'ui tak c'axc'olil, are' c'u ri Ajawaxel quesan na chquipam conojel wa'.

²⁰ Ri are quebuch'uk conojel ri u bakil, mawi ta ne xa jun cäk'ajisax ta na.

²¹ Ri e banal tak etzelal quecämisax rumal ri kas quetzelal; ri cäquetzelaj u wäch ri utzalaj winak cäc'äjisax na qui wäch.

²² Are c'u ri Ajawaxel cuto'tajisaj u wi' ri qui c'aslemal ri pataninel tak rech; man cäc'äjisax ta qui wäch ri qui cuban qui c'u'x chrij.