Salmib 108 - Quiché Bible

Ri wanima' suc'umatalic

¹ Ri wanima' suc'umatalic, nu Dios, ¡suc'umatal che qui bixoxic bix che la! Chatc'astajok nu c'aslibal;

² chixc'astajok, arp xukuje' nimalaj arp; ¡quinc'astaj na pa ri u sakaric!

³ Quinya' na k'ij la cuc' tak bix, Ajawaxel, pa alaj tak tinimit xukuje' pa nimak tak tinimit.

⁴ Ri lok'ok'ebal c'u'x la c'o na u nimal chquiwäch ri caj. ¡Ri jicomal la copan c'ä cho ri räxalaj caj!

⁵ ¡Nu Dios, ri lal lal c'o puwi' ri caj; ri juluwem la u nojisam ronojel ri uwächulew!

⁶ Chujcolo' la ruc' ri cuinem la, rech quetorotaj ri e lok' umal la. ¡Chya' la ri cakatz'onoj che la!

⁷ Ri Dios xch'aw ulok kas chupam ri cak'ijilax wi: “¡Ruc' quicotemal quinjach na ri Siquem, xukuje' quinjach na ri beya' re Sucot!

⁸ Ri Galaad xukuje' ri Manases e wech; ri Eprain are to'bal nu jolom; ri Juda are nu ch'ämiy re takanic;

⁹ ri Moab are tzima ch'ajbal nu k'ab; puwi' ri Edom quinq'uiak wi na ri nu peraj xajäb; ¡quinbixoj na ch'äcanic paquiwi' ri aj pilisteyib!”

¹⁰ ¿Jachin ta quinc'amow bic pa ri tinimit ri c'o tapia chrij? ¿Jachin ta cäc'amow bic nu be c'ä pa Edom?

¹¹ Ri lal c'ut, nu Dios uj xutum la; ¡man cäbe ta chi la cuc' ri kajch'ojab pa ri ch'o'j!

¹² Chujto' la che u ch'äquic ri c'ulel, man c'o ta c'u u patan ri u to'banic ri winak.

¹³ Ruc' ri u to'banic ri Dios quekaban na nimak tak mayibal; ¡are' quebuxak'alej na ri e ka c'ulel!