Salmib 107 - Quiché Bible

Ri lok'ok'ebal u c'u'x ri Ajawaxel ri man c'o ta u q'uisic

¹ Chiya' maltioxinic che ri Ajawaxel, utz c'ut ri are', junalic c'ut ri lok'ok'ebal u c'u'x.

² Chquibij ri e colotajinak rumal ri Ajawaxel, ri xeresaj pa u k'ab ri c'ulel,

³ ri xebumulij ri xeresaj chquixo'l tak ri ulew aj iquiak'ab, aj mox k'ab, aj elebal k'ij, aj kajebal k'ij.

⁴ Quebinicatic e sachinak chupam ri chaki'j uwo sak ri nojinak che sanyeb, man cäquirik ta ri be ri cäbe ta pa jun tinimit ri quejeki' ta wi;

⁵ ¡c'o qui numic xukuje' qui chaki'j chi', camem cäquibano!

⁶ Pa ri qui bis c'ut xquita' ri u to'banic ri Ajawaxel, chupam c'ut ri qui c'axc'olil xquitz'onoj tok'ob che ri Ajawaxel,

⁷ xebuya' c'u chupam jun colomalaj be ri cäbe chupam jun tinimit ri cuya' quejeki' wi.

⁸ Chebiya' maltioxinic che ri Ajawaxel rumal ri u lok'ok'ebal c'u'x, ¡rumal ri cuban che qui to'ic ri winak!

⁹ Ri are' cuchupisaj ri u chaki'j chi' ri cachaki'j u chi' cutz'ebej c'u u tzukic ri c'o pa numic.

¹⁰ E jekel chupam räxcanacojalaj k'ekumalil, e ximital rumal ri bis xukuje' cumal tikom tak ch'ich',

¹¹ u mac ri qui c'ulelaxic ri e u takanic ri Ajawaxel, u mac ri retzelaxic u wäch ri e u chomanic ri Dios aj chicaj.

¹² Ri Dios xebucoj chuxe' c'axalaj tak chac; xepajlobic, man c'o ta c'u jun xeto'wic.

¹³ Pa ri qui bis c'ut xquitz'onoj ri u to'banic ri Ajawaxel, xeresaj c'u pa ri c'ax ri xeriktaj wi;

¹⁴ xeresaj pa ri tzatzalaj k'ekumalil ri e c'o wi, xebuquir ri tikom tak ch'ich' ri ximibem quech.

¹⁵ Chiya' maltioxinic che ri Ajawaxel rumal ri lok'ok'ebal u c'u'x, ¡rumal ri cuban che qui to'ic ri winak!

¹⁶ ¡Xebuban ch'akatak chque tak oquibal re k'an ch'ich'! ¡Xebuban ch'akatak chque tak ri balul re räx ch'ich'!

¹⁷ Ri man caquicoj ta ri qui no'j quirikom c'u c'ax rumal ri kas quetzelal xukuje' macaj,

¹⁸ ronojel ri cäquitijo xa cuban chi c'ax chque; ¡e c'o chi chuchi' ri oquibal re ri cämical!

¹⁹ Pa ri qui bis c'ut xquitz'onoj ri u to'banic ri Ajawaxel, xeresaj c'u pa ri c'ax ri xeriktaj wi;

²⁰ xutak ulok ri u tzij xebucunaj c'ut; ¡xebuto'tajisaj man xebe ta chupam ri mukubal!

²¹ Chiya' maltioxinic che ri Ajawaxel rumal ri u lok'ok'ebal c'u'x, ¡rumal ri cuban che qui to'ic ri winak!

²² Chebiya' tabal tak tok'ob chuwäch re maltioxinic, chebitzijoj tak ri u mayibal ruc' quicotemal.

²³ Xebe tak ri ajc'ayib puwi' ri plo, quexulic quepaki' ri qui jucub puwi' ri plo,

²⁴ chila' c'ut puwi' ri nimalaj plo xquil wi ri mayibalalaj u q'uiyisanic ri Ajawaxel.

²⁵ Rumal c'ut ri u ch'abal ri Ajawaxel xwalij jun nimalaj quiakik' ri xuwalijisaj u wäch ri ja';

²⁶ e q'uiakom c'ä cho ri caj, xebik'taj c'ä chuxe' ri plo; ¡xpe c'u canima' chuwäch ri xak quieb cubij paquiwi'!

²⁷ Xak que pajalob chic je ta ne k'abarelab; ¡man c'o ta xupatanij ri qui nawibal!

²⁸ Chupam c'ut ri qui c'axc'ol xquitz'onoj ri u to'banic ri Ajawaxel, xeresaj c'u pa ri c'ax ri xeriktaj wi;

²⁹ xuq'uex ri nimalaj quiakik' pa musmul jäb, ri u wäch ri ja' xjamaric.

³⁰ Aretak xquilo chi xkaj ri u wäch ri plo, xequicotic, xec'am c'u bic rumal ri Dios c'ä pa ri oquibal ri rayim.

³¹ Chiya' maltioxinic che ri Ajawaxel rumal ri u lok'ok'ebal c'u'x, ¡rumal ri cuban che qui to'ic ri winak!

³² ¡Chitz'onoj tok'ob che aretak cumulij rib ri tinimit! ¡Chik'ijilaj aretak caquimulij quib ri nimak tak tatayib!

³³ Ri Ajawaxel quebuq'uex tak ri nima' xukuje' ri e u q'uiyibal tak ja' pa chaki'j tak uwo sak xukuje' pa chaki'j tak ulew;

³⁴ ri ulew ri cäwächinic cuq'uex pa rulewal atz'am rumal ri quetzelal ri winak ri e c'o chila';

³⁵ cuq'uex ri chaki'j uwo sak pa cho, ri chaki'j ulew pa u q'uiyibal ja';

³⁶ chila' quebujekeba' wi ri quenumic, quequiyac c'u tak qui tinimit.

³⁷ Quequitic u wäch tak ri ulew, quequitic tak uva, quequiyac c'u q'ui u wächinic ri qui tico'n.

³⁸ Ri Ajawaxel quebutewichi'j, quebupok'isaj, xukuje' quebupok'isaj ri cawaj.

³⁹ We c'u quecämic, xak c'u e quieb oxib ri quecanajic rumal ri c'axc'olil, rumal ri quiäkasakil xukuje' ri k'oxomal.

⁴⁰ Ri Dios cäretzelaj qui wäch ri e banal tak c'ax, quebusachisaj chquipam tak ri chaki'j tak uwo sak jawije' man c'o ta wi be.

⁴¹ Ri Dios queresaj ri mebayib pa ri qui bis; ¡quebuq'uiyirisaj ri cachalaxic jacha' ri chij!

⁴² Aretak cäquil wa' ri winak ri utz canima', quequicot na, are c'u ri e banal tak etzelal cäquitz'apij na u pa qui chi'.

⁴³ Jachin ri c'o u no'j, chucojo' retal wa' chuch'obo' c'u ri lok'ok'ebal u c'u'x ri Ajawaxel.