Ri Tit 2 - Quiché Bible

Ri utzalaj tijonic ri man c'o ta etzelal che

¹ Ri at c'ut, chatzijoj jastak ri takal che ri utzalaj tijonic ri man c'o ta etzelal che:

² chi ri nimak tatayib meyojcoric, chquirika' ri'jobic, utz chechomanok, chi c'o qui chuk'ab pa qui cojonic, pa ri lok'ok'ebal c'uxaj, pa ri ch'ijonic.

³ Junam ri chuchuyib ri e nimak tak winak chquirika' ri'jobic, mebux banal tak tzijtal, mawi quek'abaric. Rajawaxic caquiya' utzalaj c'utbal,

⁴ cäquic'am qui be ri alitomab che qui lok'ok'exic ri cachajil xukuje' ri cal,

⁵ utz qui chomanic, e ch'ajch'oj pa ri qui c'aslemal, cäquiban ri qui chac cho tak cachoch, e utz, qui yo'm quib pa takic chque ri cachajilal, rech man cäyok' ta ri u tzij ri Dios.

⁶ Chebapixbej xukuje' ri c'ä e alabom na rech utz quechoman pa ronojel.

⁷ Kas at chatyo'w jun utzalaj c'utbal chquiwäch pa conojel ri jastak. Aretak chebatijoj, chabana' ruc' ronojel ch'ajch'ojil xukuje' ruc' ri'jobic.

⁸ Utz chabana' che ri a tzijonic, rech man c'o ta etzelal cäriktaj chawij. Jeri' queq'uix ri i c'ulel, man quecuin taj cäquibij jun etzelal chkij.

⁹ Chebapixbej ri pataninelab rech cäquiya' quib pa takic chque ri cajaw pa ronojel, chekaj chquiwäch, mec'ulelanic,

¹⁰ c'o mebeläk' chque, cäquic'utu chi e jic pa ronojel, rech pa ronojel cäquic'utu chi sibalaj je'lic ri u tijonic ri Dios ri ka Colonel.

¹¹ Rumal rech chi ri Dios u c'utum ri u tok'ob chquiwäch conojel ri winak rech quecolotajic.

¹² Cujutijoj chi cäkatas kib chrij ri rayibal aj uwächulew xukuje' ri jastak ri man cäquiya' ta u k'ij ri Dios. Cujutijoj chi utz ri ka chomanic cäkabano, cäkaban ri suc', xukuje' cujniman che ri Dios pa ri ka c'aslemal waral cho ri uwächulew,

¹³ chi cäkeyej na ri juluwemalaj u petic ri nimalaj ka Dios xukuje' ri ka Colonel Jesucrist, nim u k'ij cäpetic. Are wa' ri ka quicotemal xukuje' ri cu'lbal ka c'u'x.

¹⁴ Ri Jesucrist xuya' ri u c'aslemal rumal kech, che kesaxic pa u k'ab ronojel etzelal xukuje' che ka josk'ixic, rech cujux rech are' xukuje' cäkacoj ka chuk'ab che u banic utzalaj tak chac.

¹⁵ Chatzijoj we jastak ri'. Chebapixbej ri winak, chak'alajisaj chquiwäch jas ri man utz taj ri cäquibano. Chabana' wa' ruc' ronojel takanic, c'o c'u jun metzelan a wäch.