Ri Josue 23 - Quiché Bible

Ri Josue cuch'abej ri tinimit

¹ Najtininak chi c'ut, u yo'm chi jamaril ri Ajawaxel chque ri aj israelib cuc' tak ri e qui c'ulel, ri'jobinak chi c'ut ri Josue,

² ri Josue xutak qui siq'uixic conojel ri aj israelib, e cachil tak ri e qui rija'l, c'amal tak be, k'atal tak tzij cach k'atal tak tzij, xubij c'u chque: “In in ri'j chic, e c'o chic ri nu junab.

³ Ix iwilom ronojel ri xuban ri Ajawaxel chque conojel tak we tinimit ri' ri co xquitac'aba' quib chuwäch, are' c'ut ri ch'ojinak che i q'uexwäch.

⁴ Ri in rumal taklebenic xinjach tak we ulew ri' chquiwäch tak ri amak'. Man xuwi ta xinjach tak ri ulew ri e ch'äctajinak, xane' xukuje' ri xak queyem chic ri qui ch'äctajic, cachaptaj ulok ruc' ri nima' Jordan pa ri elebal k'ij quetakal c'ä chuchi' ri Plo Mediteran pa ri u kajebal k'ij.

⁵ Ri Ajawaxel queresaj na bic ri winak ri e jekel pa tak we ulew ri', quebimajij c'u na je jacha' ri chi'nic ri u banom ri Ajawaxel ri i Dios.

⁶ Chicojo' ba' i chuk'ab che u tz'akatisaxic ronojel ri cubij ri wuj re ri u pixab ri Moises; je u tz'akatisaxic chibana' jas ri tz'ibatalic.

⁷ Man quiyuj ta iwib cuc' ri jule' tak winak chic ri c'ä e jekel waral chixo'l. Man quebik'ijilaj ta ri e qui diosib, mawi mebinimaj mawi ne mebinataj man quebinataj ta ri qui bi' tak we diosib ri', mawi miban jun chi'nic ri kas cäban na pa ri qui bi'.

⁸ Amak'el chixteren chrij ri Dios ri Iwajaw, jacha' ri i banom c'ä camic.

⁹ Ri Ajawaxel e u q'uiakom bic chiwäch, cowilaj tak tinimit ri jawije' e c'o wi q'uialaj winak, c'ä je c'u ne camic man c'o ta jun ri cuininaktaj ri u tac'abam ta rib chiwäch.

¹⁰ Xa jun chiwe cacuinic cubano chi quebanimaj jun mil winak chuwäch, rumal rech chi are' ri Ajawaxel ri u Dios cach'ojin che u q'uexwäch, jacha' ri xuchi'j u banic.

¹¹ Kas ba', chichajij iwib ix, chilok'ok'ej c'ut ri Ajawaxel ri i Dios.

^12-13 Rumal rech chi quinwaj quiwetamaj wa': chi we quixutuj can ri Dios quiyuj c'u iwib cuc' tak we winak ri' ri e canajinak chixo'l, ri Ajawaxel ri i Dios man quebuq'uiak ta na bic tak we tinimit ri' chiwäch, xane' quebucoj na jacha' c'at xukuje' jacha' c'amibal rech quixtzakic, e jacha' rapubal cho tak iwachak xukuje' e jacha' q'uix chquipam tak ri i bak'wäch, c'ä man c'o ta jun chiwe cacanaj ta na pa we ulew ri' ri sibalaj utz ri u yo'm ri Ajawaxel ri i Dios chiwe.

¹⁴ In chanim quinecämok, are' c'u ri quinwaj chi ri ix quich'ob canok ruc' ronojel iwanima' xukuje' ruc' i c'aslibal chi e tz'akatinak conojel ri utzalaj tak jastak ri xebuchi'j ri Ajawaxel chiwe. Mawi ta ne xa jun chque tak ri xebuchi'j xcanaj ta canok ri ma ta xtz'akatic.

¹⁵ Je c'ut, chi xtz'akat ronojel ri utz ri xuchi'j ri Ajawaxel chiwe, jeri' xukuje' ri are' cuc'am na ulok piwi' ronojel qui wäch etzelal, c'ä man c'o ta jun chiwe cacanaj ta can pa we utzalaj ulew ri' ri xuya' chiwe,

¹⁶ we man quitz'akatisaj ri c'ulwächinic ri xuban ri Ajawaxel iwuc'. We quebik'ijilaj c'u tak diosib, quebimeja' ta c'u iwib chquiwäch, ri Ajawaxel coyowar na chiwe, sibalaj c'u chanimquixyubquen na pa we utzalaj ulew ri' ri u yo'm chiwe.”