Ri Josue 17 - Quiché Bible

Culew tak ri e ramak' ri Manases

¹ Are' ulew wa' ri xutaklebej ri ramak' ri Manases, ri nabeal u c'ojol ri Jose. Che ri Maquir, achi ri ch'ojinel, are' wa' ri nabeal u c'ojol ri Manases u tat c'ut ri Galaad, xutaklebej ri ulew re Galaad xukuje' ri rech ri Basan pa ri elebal k'ij che ri Jordan.

² Xukuje' xeyuj tak ri ulew ri quequitaklebej na, je jas ri cajilabal ri e u k'ab cachalaxic, ri e niq'uiaj u c'ojol chic ri Manases: ri Abiezer, ri Helec, ri Asriel, ri Siquem, ri Heper xukuje' ri Semid, e u c'ojol c'ut ri Manases xukuje' ri e ri' tak u mam c'ut ri Jose.

³ Are' c'u ri Zelopehad, u c'ojol ri Heper xukuje' ri' u mam ri Galaad, u c'ojol ri Maquir ri' u mam c'ut ri Manases, man e c'o ta u c'ojol, xak xuwi job u mia'l, e are wa' ri Maal, ri Noa, ri Hogla, ri Milca xukuje' ri Tirs.

⁴ Xebe wa' che rilic ri cojol tabal tok'ob Eleazar xukuje' ri Josue, xukuje' ri e c'amal tak u be ri tinimit, xquibij chque: “Ri Ajawaxel xutak ri Moises chi chebuya' kulew, junam je jas ri xban chque ri kachalaxic.” Xuya' c'ut ri Josue ri culew jacha' ri xuban chque ri rachalaxic ri qui tat, jacha' ri takanic ri u yo'm ri Ajawaxel.

⁵ Rumal c'u rech wa' ri ramak' ri Manases xuc'am lajuj ch'akatak ulew, e c'o wi tak ri' ri ulew re Galaad xukuje' re Basan, ri e c'o pa ri elebal k'ij che ri Jordan,

⁶ rumal rech chi ri e u mia'l ri Manases xeya' tak culew jas ri xeya' chque tak ri achijab. Ri ulew re Galaad are' xcanaj cuc' ri niq'uiaj rija'lil chic ri Manases.

⁷ Ri rulew ri ramak' ri Manases copan c'ä pa Aser xukuje' pa Micmetat, ri c'o chuwäch ri Siquem, cataken c'u pa ri u mox elebal k'ij copan c'ä cuc' ri winak ri e jek'el pa Tapu.

⁸ Pune' ri ulew re Tapu rech can ri ramak' ri Manases, ri kas tinimit re Tapu, ri c'o chunakaj ri u c'ulbatil ri rulew ri Manases rech ri ramak' ri Eprain.

⁹ Ri c'ulbat cakaj chusuq'uil ri u mox elebal k'ij copan c'ä chuchi' ri nima' ri c'o pa Cana, jeri' chi we tak u tinimit ri Eprain ri' e c'o chquixo'l tak ri e u tinimit ri Manases, pune' c'u ne ri c'ulbat aj riquiak'ab elebal k'ij che ri nima' rech ri Manases, cärachilaj rib ruc' ri oquibal pa ri plo.

¹⁰ Ri Eprain cacanaj pa ri u mox elebal k'ij che ri nima', are' c'u ri Manases pa ri riquiak'ab elebal k'ij, are' c'u qui c'ulbatil ri u chi' ri Plo Mediteran, are' chi c'u ri ramak' ri Aser pa ri riquiak'ab elebal k'ij e are' chi c'u ri aj Isacar pa elebal k'ij.

¹¹ Xukuje' xquitaklebej ri Manases we tak tinimit ri' chquijujunal e cachil tak ri e qui k'ab tak qui tinimit pa ri culew ri aj Isacar xukuje' Aser, ri e c'o chquinakaj: ri Bet-sean, ri Ibleam, ri Dor, ri Endor, ri Taanac xukuje' Meguid, xukuje' ri oxib u wi' tak juyub.

¹² E are' c'ut ri e aj ramak' ri Manases man xecuin taj xequechbej we tinimit tak ri', rumal rech chi ri aj cananeyib co xquitac'aba' quib xecanaj c'u can chila'.

¹³ C'ä chumatam chi c'ut aretak ri aj israelib xc'oji' qui chuk'ab, xquicoj c'u qui chuk'ab chque ri aj cananeyib che u ya'ic tojonic, man xequesaj ta c'u bic chila'.

Ri e rija'lil ri Jose xequimajij tak ri c'ache'laj

¹⁴ Ri e rija'lil ri Jose xquibij che ri Josue: “¿Jasche xa jubik' ri ulew ri xya' la chke pa taklebenic, ri uj sibalaj c'u ne uj q'ui, uj u tewichi'm c'u ne ri Ajawaxel?”

¹⁵ Ri Josue xutzelej u bixic chque: “Sibalaj c'u ya' quixbuchcaric man cubana' ta chi c'u ne ri juyub re Eprain chiwe, jix jebikasaj ri c'ache'laj ri e c'o pa ri culew ri perezeyib xukuje' ri repaitab.”

¹⁶ We winak ri' je xquibij wa: “Kastzij chi we ulew ri' man cubana' ta chke. Ri cananeyib ri e jekel pa ri lianic e c'o tak qui carwaj re ch'ich', xukuje' c'ut ri e jekel pa Bet-sean xukuje' ri e jekel pa ri u k'ab tak qui tinimit cuc' ri e jekel pa ri beya' re Jezreel.”

¹⁷ Ri Josue je u tzelexic u wäch qui tzij wa' ri e rija'lil ri Jose ri u bixic wa, chque ri aj ramak' ri Eprain xukuje' ri Manases: “Ri ix sibalaj quixbuchuwic sibalaj c'o i cuinem, man c'u ya'tal ta chi xa' ta jubik' ri ulew ri i taklebem,

¹⁸ chiwechbej ba' we juyub ri' ri e nojinak che' chuwäch, quebajwataj c'u ri che' chiwe ri e c'o chuwäch. E are' c'ut ri aj cananeyib, ri ix quebiwesaj na bic chila', pune' sibalaj c'o qui chuk'ab pune' c'u e c'o qui carwaj e re tak ch'ich'.”