Ri Josue 16 - Quiché Bible

Culew tak ri Eprain xukuje' ri Manases e rija'lil ri Jose

¹ Ri ulew ri xquitaklebej ri rija'lil ri Jose cächaptaj bic pa ri elebal k'ij, chuchi' ri nima' Jordan, ajsic chque ri bulbux tak ja' re ri Jerico, culic' c'u bic rib pa ri chaki'j uwo sak, cutakej ri qui rabic ri c'ache'laj ri quechapletaj bic pa Jerico queq'uis c'ä pa Betel.

² Quel bic pa Betel, che u bixic, Luz, coc'ow pa ri culew ri arquitab quetakal pa Atarot;

³ culic' chi c'u rib pa ri u kajebal k'ij coc'ow pa ri culew ri aj japletitib, quetakal c'ä pa ri c'ulbat ruc' ri Bet-horon ri c'o iquim, c'ä pa Jezer. Quel bic chila' quetakal chuchi' ri Plo Mediteran.

⁴ Ri echbal tak ri xquic'am ri amak' ri Manases xukuje' ri Eprain, ri e rija'lil ri Jose, e are' tak wa' ri quetakenic:

Ri e rulew ri ramak' ri Eprain

⁵ Ri copan wi ri culew ri e u k'ab rachalaxic ri ramak' ri Eprain culic' rib pa ri elebal k'ij, quel bic pa Atarot-adar copan c'ä pa Bet-horon ri c'o ajsic.

⁶ Culic chi c'u bic rib chila' copan c'ä chuchi' ri Plo Mediteran. Ri u c'ulbatil ri culew pa ri riquiak'ab ri elebal k'ij are' ri Micmetat, quel bic chila' ri c'ulbatil cataken pa ri elebal k'ij, copan pa Taanat-sil, coc'ow c'ut pa Jano.

⁷ Cakaj c'u pa Atarot xukuje' pa Naarat, c'ä cunak na ri Jerico copan c'u chuchi' ri nima' Jordan.

⁸ Kas pa Tapu, ri c'ulbat cataken pa ri u kajebal k'ij quetakal c'ä chuchi' ri nima' pa Cana xukuje' chuchi' ri Plo Mediteran. Are' ulew wa' ri xutaklebej ri ramak' ri Eprain, ri xejach chquixo'l tak ri u k'ab rachalaxic.

⁹ E c'o c'u ne jujun tak tinimit xukuje' e u k'ab tak tinimit pa ri rulew ri ramak' ri Manases, ri xquitaklebej ri aj Eprain.

¹⁰ E are' c'ut ri e aj ramak' ri Eprain man xquesaj ta bic ri Jezer ri e aj cananeyib ri e jekel chila', xane' xequic'asba' can chquixo'l, xetojon c'u pa qui k'ab. C'ä e jekel c'u ne ri aj cananeyib chila' camic.