Ri Ester 9 - Quiché Bible

Ri qui ch'äcanic ri aj judeyib

¹ Chupam ri oxlajuj (13) rajilabal ri ucablajuj ic' re cabinax Adar, are k'ij wa' ri cätz'akatisax u banic ri u takanic ri ajawinel, are c'u k'ij wa' xukuje' queyem ri qui c'ulel ri aj judeyib che u banic c'ax chque; man je ta c'u xel wi na, xane' are xech'äcan ri aj judeyib paquiwi'.

² Pa conojel ri u tz'akatil ri rajawibal ri ajawinel Asuer, xquimulij quib chquipam tak ri tinimit jawije' tak ri e jekel wi, che u to'ic quib pa qui k'ab ri cäcaj caquiban c'ax chque. Man c'o ta c'u jachin xch'ojin cuc', xemaj c'u conojel tak ri tinimit rumal ri xe'n ib.

³ Conojel ri k'atal tak tzij ri e c'o pa ri u tz'akatil ri ajawibal, ri takanelab paquiwi' pa tak ri culewal ri takanelab paquiwi' tz'akatil, ri nimak tak tinimit, xukuje' ri e c'o nimak tak quekle'n pa ri k'atbal tzij xequito' tak ri aj judeyib rumal xe'n ib chuwäch ri Mardoquey,

⁴ sibalaj c'u nim chic u k'ij chupam ri rachoch ri ajawinel xjabun c'ut u tzijol pa conojel ri u tz'akatil ri ajawibal, k'ij c'ut chi k'ij xnimar ri u cuinem.

⁵ Ri aj judeyib cuc' ch'ich' re ch'o'j xequicämisabej tak quech ri e qui c'ulel c'ä xequiq'uis na tzij paquiwi' xquiban c'u chque jachique tak ri xcaj.

⁶ Xak c'u ne xuwi pa ri tinimit Sus xequicämisaj Job sient (500) achijab;

⁷ xequicämisaj c'ut ri Parsandat, Dalpon, Aspat,

⁸ Porat, Adaliy, Aridat,

⁹ Parmast, Arisay, Ariday xukuje' ri Baizat,

¹⁰ e are' c'u wa' ri e lajuj (10) u c'ojol ri Aman, ri qui c'ulel ri aj judeyib; man c'u xequichaptaj ri jastak quech.

¹¹ Kas pa ri k'ij ri', aretak xretamaj ri ajawinel ri cajilabal ri cäminakib ri e c'o pa ri tinimit Sus.

¹² Xubij che ri ixok ajawinel Ester: “Ri aj judeyib e qui cämisam job sient achijab xukuje' ri e lajuj (10) u c'ojol ri Aman chupam ri tinimit re Sus. ¿Jas c'u lo ri bantajinak cumal chquipam tak ri niq'uiaj nimak tinimit chic pa ri u tz'akatil ri ajawibal? ¡Chabij chwe jas ri cawaj chic quinya' c'u na chawe!”

¹³ Xutzelej c'ut u bixic ri Ester: “We ri ajawinel utz che, chyok chque ri aj judeyib ri e c'o pa Sus che u banic chwek junam ruc' ri qui banom jacha' ri pixab ri tz'ibatalic, xukuje' chi chexequebax puwi' ri jitz'abal ri lajuj qui cuerp ri e u c'ojol ri Aman.”

¹⁴ Ri ajawinel xuya' takanic chi je chbanok. Ri takanic xjabux u bixic pa Sus, xetzayabax c'ut ri lajuj u c'ojol ri Aman.

¹⁵ Ri aj judeyib ri e jekel pa Sus xquimulij chi quib jumul chupam ri ucajlajuj rajilabal ri ic' Adar, xebequicämisaj chi c'u na oxib sient (300) achijab; man xequichap ta c'ut ri jastak quech.

^16-17 Ri aj judeyib ri e jekel pa ri niq'uiaj chic u tz'akil ri ajawibal xquimulij quib, pa ri roxlajuj rajilabal ri ic' ri e c'olic, che u to'ic ri qui c'aslemal xukuje' che qui sachisaxic qui wäch ri e qui c'ulel; xebequicämisaj c'u oxc'al olajuj mil (75,000) chque, man xequichap ta c'ut ri jastak quech. Pa ri cajlajuj k'ij xebuxlanic xcoc'owisaj c'ut cuc' tak wa'im xukuje' quicotemal.

¹⁸ E are' c'ut ri aj judeyib ri e c'o pa Sus xquimulij quib pa tak ri k'ij oxlajuj cajlajuj, xebuxlan c'u chupam ri olajuj k'ij, xcoc'owisaj c'ut cuc' tak wa'im, xukuje' quicotemal.

¹⁹ E are' tak c'ut ri aj judeyib ri e jekel pa tak tinimit xukuje' pa ri qui k'ab tak tinimit ri man e c'o ta nimak tak tapia chquij, e are' xcoc'owisaj ri cajlajuj rajilabal ri ic' Adar ruc' quicotemal xukuje' tak nimak'ij, xequibanala' c'u tak sipanic chquixo'l.

Ri nimak'ij re Purim

²⁰ Ri Mardoquey xebutz'ibaj tak we c'ulmatajic ri', xebutak c'u wuj chque conojel ri aj judeyib ri e c'o pa ri u tz'akatil ri rajawibal ri Asuer, ri e c'o nakaj jacha' xukuje' ri e c'o naj.

²¹ Xuya' c'u takanic chque chi chujunab checoc'owisaj tak ri k'ij cajlajuj (14) xukuje' olajuj (15) rajilabal ri ic' Adar

²² are tak k'ij wa' aretak ri aj judeyib xequisachisaj qui wäch tak ri qui c'ulel, are ic' wa' aretak ri bis xukuje' ri rakoj tak chi'aj re c'axc'olil xeq'uextaj chque pa quicotemal xukuje' nimak'ij. Pa tak we k'ij ri' rajawaxic caban nimak'ij cuc' tak wa'im xukuje' ruc' quicotemal, chibanala' c'u tak sipanic chbil tak iwib xukuje' c'o chibisipaj chque ri mebayib.

²³ Ri aj judeyib xquinak'atisaj quib che roc'owisaxic we c'ulmatajic ri' xukuje' ri xutz'ibaj ri Mardoquey chque.

²⁴ Are' c'u ri Aman, ri xuban u c'ulel chque conojel ri aj judeyib, xuchomaj c'ut u sachisaxic qui wäch xebuq'uiak c'u ri taklebenic che qui cämisaxic xukuje' u sachisaxic qui wäch;

²⁵ aretak c'u xoc ri Ester chuwäch ri ajawinel, wa' xuya' takanic chi chitz'ibaxok chi ronojel ri etzelal ri xuchomaj u banic ri Aman chque ri aj judeyib chkaj puwi' ri are'. Jeri' ri Aman xukuje' tak ri e u c'ojol xexequebax puwi' ri jitz'abal.

²⁶ Rumal c'u rech wa' xebinax purim chque tak we k'ij ri', ri quel cubij ri are u q'uiyal ri pur. Jeri', jas ri u cholajil ri wuj ri xutz'ibaj ri Mardoquey xukuje' che ri quilom xukuje' ri xquic'ulmaj pa ri qui c'aslemal,

²⁷ ri aj judeyib xquijekeba' we nak'atisabal ri' chque ri are', chque ri quija'lil, xukuje' chque conojel ri quebux aj judeyib: kas c'u choc'owisax wa' chujunab, matanabax u banic, we quieb k'ij ri' pa ri ajilabal ri c'utum, jas ri u cholajil ri yo'm u bixic;

²⁸ chenatax tak c'ut we k'ij ri' xukuje' chban ri nimak'ij cumal ija'lil chi ija'lil, chquijujunal tak ri jujun tak ja winak, u tz'akatil ri ajawibal xukuje' tak tinimit, rech mawi jubik' casach ri roc'owisaxic ri k'ij Purim chquixo'l ri aj judeyib xukuje' tak ri quija'lil.

²⁹ Ri ixok ajawinel Ester, u mia'l ri Abihail, xukuje' ri Mardoquey ri aj judey, xquitz'ibaj ruc' ronojel ri u chuk'ab ri takanic jun ucab wuj che ri nimak'ij re ri Purim, che u ya'ic u chuk'ab ri nabe,

³⁰ xquitak c'u bic chque conojel ri aj judeyib ri e c'o chquipam tak ri jun sient juwinak wukub (127) nimak tak tinimit pa ri u tz'akatil ri rajawibal ri Asuer, cuc' ch'uch'ujalaj tak tzij ri xukuje' e re ri'jobalil,

³¹ xya' c'u takanic chi chban ri nimak'ij re Purim pa ri ajilabal ri c'utum, je jacha' ri takanic ri qui yo'm ri Mardoquey xukuje' ri ixok ajawinel Ester chque xukuje' chque ri quija'lil. Xetik chi c'ut ri qui cholajil ri qui banic tak ri man c'o ta wa'im xukuje' ri u banic ok'ej,

³² are' c'u ri u takanic ri Ester xyo'w u chuk'ab ri cholajil ri rajawaxic u takexic che u banic ri nimak'ij re ri Purim. Ronojel wa' xtz'ibataj can chupam jun wuj.