Ri Ester 4 - Quiché Bible

Quebison ri aj judeyib rumal ri takanic

¹ Aretak xretamaj ri Mardoquey ronojel ri c'ulmatajinak, xujix ri ratz'iak chrij che u c'utic ri u bis, xebucoj wakwoj tak atz'iak chrij, xuya' chaj pa u jolom xuchaplej c'u u binibexic ronojel ri tinimit curak u chi' nojinak che c'ayilaj bis.

² Je u banom wa' xopan c'ä chuchi' ri rachoch ri ajawinel, man cäya' ta c'u c'olbal chi c'o jachin coquic we je ratz'iak wa' u cojom.

³ Xukuje' pa conojel ri u tz'akatil ri ajawibal ri copan wi ri takanic ri xtz'ibax rumal ri ajawinel, xwalij nimalaj bis chquixo'l ri aj judeyib, ri xquic'ut ri qui bis ruc' ok'ej, ruc' rakoj chi'aj xukuje' man xewa' taj, e q'ui c'ut chque xek'oyi' pa ri chaj, xequicoj c'u wakwoj tak atz'iak.

Ri u to'banic ri Ester

⁴ Ri alitomab ri e c'o che u patanixic ri ixok ajawinel Ester xukuje' ri achijab ri e chajil tak re, xquiya' u bixic che ri cätajin cäc'ulmatajic. Ri ixok ajawinel xnoj che c'axc'olil xutak bic atz'iak che ri Mardoquey rech cuq'uex ri wakwoj atz'iak ri u cojom, man xraj ta c'ut xuc'amo.

⁵ Ri Ester xusiq'uij c'ut ri Hatac, ri qui nimal ri ajch'ojab ri echajinelab, xutako chi oj che rilic ri Mardoquey chuta' c'u che jas ri cätajin cac'ulmatajic xukuje' jasche cätajin cuban ronojel we jasach ri'.

⁶ Ri Hatac xetzijon ruc' ri Mardoquey, ri c'o cho ri c'ayibal ri c'o pa ri tinimit, chuwäch ri oquibal chupam ri rachoch ri ajawinel

⁷ ri Mardoquey xuya' u bixic che ri Hatac ri cätajin cac'ulmatajic xukuje' ri u q'uiyal ri sak puak ri xuchi'j ri Aman cucoj pa ri u k'inomal ri ajawinel che u q'uexwäch ri u sachisaxic qui wäch ri aj judeyib.

⁸ Xukuje' xujach bic jun wuj che ri tz'ibatal wi ri takanic che u sachisaxic qui wäch ri aj judeyib, ri xya' u bixic chque conojel ri winak ri e c'o pa Sus, rech cäya' che ri Ester je c'u ri' cacuinic cäretamaj ronojel. Xukuje' xutak u bixic che ri Ester chi ch'aw ri are' chwinakil ruc' ri ajawinel chutz'onoj c'u tok'ob che chi chch'aw puwi ri u tinimit.

⁹ Xtzelej ri Hatac xutzijoj c'u che ri Ester ri u bim ulok ri Mardoquey che.

¹⁰ Ri Ester xutak chi c'u bic jumul ri Hatac che u bixic wa' che ri Mardoquey:

¹¹ “Conojel ri quepatanij che ri ajawinel, xukuje' conojel ri winak ri e c'o pa conojel ri e u tz'akatil ri ajawibal, queta'm chi c'o jun pixab ri cuc'okoj che cämical apachique achi o ixok ri coc chuwäch ri ucab uwo ja ri c'o chuwäch ri rachoch ri ajawinel, che rilic ri ajawinel we man siq'uim rumal, xuwi c'u we ri ajawinel culic' ri u bara' re k'an puak che we winak ri' che u c'utic chi cutok'obisaj u wäch, cuto'tajisaj c'ut ri u c'aslemal. Are c'u ri chwe in, juwinak lajuj (30) k'ij chi wa' camic man in u siq'uim ta ri ajawinel.”

¹² Aretak xtataj rumal ri Mardoquey ri xutak ulok u bixic ri Ester,

¹³ xutak chi u bixic che: “Machomaj at, chi rumal ta rech chi at c'o at chupam ri rachoch ri ajawinel, chi xuwi ta ri at aj judey cäto'taj ri a c'aslemal.

¹⁴ We catz'apij ri u pa a chi' camic man c'o ta c'u jas cabij, ri quito'ic ri aj judeyib cäpe chi na pa jun c'olbal chic, are c'u ri at xukuje' ri e rachalaxic ri a tat quixcäm na. ¡Craj ne ri at, at uxinak ixok ajawinel xa rech cujato' cujawesaj c'ut chupam we c'ax ri'!”

¹⁵ Are' c'u ri Ester je xutak u bixic wa' che ri Mardoquey:

¹⁶ “Choj la chemulij la conojel ri aj judeyib ri e c'o pa Sus, rech man quewa' taj che nu to'ic. Mewa'ic xukuje' mebuq'uianic oxib k'ij xukuje' oxib ak'ab. Ri nu pataninel tak we xukuje' ri in junam quekaban na ke, xuwi c'u cabantaj wa' quinbe che rilic ri ajawinel, pune' c'u man cätajin ta quinnimaj ri pixab. We c'u quincämisaxic, chincämisax ka wi.”

¹⁷ Xbe c'ut ri Mardoquey xutz'akatisaj qui banic ri xbix che rumal ri Ester.