Ri Esdras 7 - Quiché Bible

Ri Esdras xukuje' tak ri e rachil quebopan pa Jerusalen

¹ E oc'owinak chi c'ut we c'ulmatajic ri', aretak cätajin cajawin ri Artajers, ajawinel re Pers, c'o jun achi Esdras u bi', rija'lil ri Seraiy, ri Azariy, ri Hilsiy,

² ri Salum, ri Sadoc, ri Ahitob,

³ ri Amariy, ri Azariy, ri Meraiot,

⁴ ri Seraiy, ri Uz, ri Buqui,

⁵ ri Abisu, ri Pinees, ri Eleazar xukuje' ri Aaron, ri nabe cojol tabal tok'ob.

⁶ We Esdras ri' are' jun ajtij ri sibalaj u tijom rib chupam ri u pixab ri Ajawaxel, ri u Dios ri Israel, ri yo'm rumal ri Moises, c'o c'ut ri u to'banic ri Ajawaxel ruc', jeri' ri ajawinel Artajers xuya' che ronojel ri xutz'onoj. Rumal c'u ri', ri Esdras xuya' can ri Babilon.

⁷ Xtzelej pa Jerusalen xerachilaj bic juk'at aj israelib ri e cojol tabal tok'ob, aj levitib, bixonelab, chajil tak uchi'ja xukuje' tak ri pataninelab re ri Rachoch Dios, chupam ri uwuk junab re ri rajawinic ri Artajers.

^8-9 Rumal c'u re chi c'o ri utzalaj u to'banic ri Dios ruc' ri Esdras, pa ri nabe rajilabal ri nabe ic' re ri uwuk junab re ri rajawinic ri Artajers xuya' can ri Babilon, xopan c'u pa Jerusalen chupam ri nabe rajilabal ri ro' ic' re ri junab ri'.

¹⁰ Ri Esdras c'o ri chomanic ruc' che u ch'obic xukuje' che u banic ri cubij ri u pixab ri Ajawaxel, xukuje' che u c'utic chquiwäch ri aj israelib ri e u pixab xukuje' tak ri e u takanic.

¹¹ Ri wuj ri xujach ri Artajers pa u k'ab ri Esdras, ri cojol tabal tok'ob xukuje' ajtij ri u tijom rib chque conojel ri takomal xukuje' tak ri u pixab ri Ajawaxel ri e yo'm che ri Israel:

¹² “Ri k'atal tzij Artajers cuya' rutzil u wäch ri Esdras, cojol tabal tok'ob xukuje' ajtij ri u tijom rib che ri u pixab ri Dios aj caj.

¹³ Nu yo'm takanic chi ronojel aj israel ri c'o pa ri wajawibal we c'u ne craj cabe pa Jerusalen awuc', cuya' cäbec kas c'u are na we aj levi we cojol tabal tok'ob.

¹⁴ Are' c'u ri ajawinel xukuje' ri wukub ya'l tak u no'j catquitak bic che rilic ri u banom ri Juda xukuje' ri Jerusalen, jas ri u cholajil ri u pixab ri a Dios ri c'o pa a k'ab.

¹⁵ Chac'ama' bic awuc' ri sak puak ri k'an puak ri cuchi'j ri ajawinel xukuje' ri e ya'l tak u no'j pa que wi che ri u Dios ri Israel, ri jekel pa Jerusalen,

¹⁶ xukuje' ronojel ri sak puak xukuje' ri k'an puak ri catcuin che u rikic pa ronojel ri ajawibal re Babilon, e c'o chi c'u wi na ri' ri e u sipanic ri tinimit, xukuje' ri caquichi'j na ri e cojol tabal tok'ob pa que wi che ri Rachoch Dios pa Jerusalen.

¹⁷ Ruc' we puak ri' rajawaxic quebalok' na alaj tak ama'ib wacax, ama'ib tak chij, junam cuc' tak ri sipanic que c'äj xukuje' u wa'l uva, che qui chi'xic puwi' ri porobal re ri Rachoch ri i Dios ix, pa Jerusalen.

¹⁸ Are c'u ri k'an puak xukuje' ri sak puak ri cäto'tajic, chibana', ri at xukuje' tak ri e wachil jachique ri quiwilo chi utz na, je jas ri u rayibal ri Dios.

¹⁹ E are tak c'u ri chaconisan ri e jachom pa a k'ab che ri k'ijilanic chupam ri Rachoch ri a Dios, kas at chatjachow che ri u Dios ri Jerusalen.

²⁰ Ronojel ri cawilo chi cajwataj che ri rachoch ri a Dios, ri rajawaxic u ya'ic awumal cärik na, chquipam tak ri i u c'olbal tak jastak re ri ajawibal.

²¹ Are c'u ri in, ri ajawinel Artajers, quinya' takanic chque conojel ri c'olol tak puak ri c'o pa ri u kajebal k'ij che ri nima' Euprats chi, melquik'ij, chquijacha' ronojel ri cutz'onoj che ri Esdras, ri cojol tabal tok'ob xukuje' ajtij ri u tijom rib chupam ri u pixab ri Dios aj caj:

²² c'ä oxc'al oxlajuj (73) quintal sak puak, quiejeb sient oxlajuj (413) quintal trico, lajuj tonel u wa'l uva, lajuj tonel aseit xukuje' ronojel ri atz'am ri cutz'onoj.

²³ Ronojel ri cutz'onoj ri Dios aj caj che ri rachoch, chanim cäjachaxtaxic, rech man c'o ta jun c'äjisabal wäch ri cäpe ta paquiwi' ri e u c'ojol ri ajawinel xukuje' puwi' ri quebajawin wi.

²⁴ Rajawaxic xukuje' chi chquetamaj chi man ya'tal taj quetak che u ya'ic cuchuj, apachique tojonic chque ri e cojol tabal tok'ob, ri aj levitib, ri aj bixab, ri ajchajil tak uchi'ja, ri pataninelab chupam ri Rachoch Dios xukuje' apachique winak ri cäpatanij chupam ri Rachoch Dios.

²⁵ Are c'u ri at, Esdras, je, jacha' ri etamanic ri e u yo'm ri a Dios chawe, chebacojo' k'atal tak tzij xukuje' takanelab chquibana' c'u ri suq'uil chque conojel ri winak pa ri ajawibal ri c'o pa ri u kajebal k'ij che ri nima' Euprats, we chque conojel ri queta'm ri u pixab ri a Dios; xukuje' are' tak c'u ri man queta'm ta chetijox che.

²⁶ Ronojel c'ut ri man cutz'akatisaj ta ri u banic ri u pixab ri a Dios; xukuje' tak ri u pixab ri ajawinel, chc'okox che cämical, chesaj bic pa jun tinimit chic, chutojo' ri torobal rib, we man cutojo chcoj pa che'.”

Ri Esdras cuya' maltioxinic

²⁷ Xuban c'u ch'awem ri Esdras ruc' ri Dios: “Tewichital ri Ajawaxel, Dios que tak ri ka mam, rumal rech chi xuya' pa ri ranima' ri ajawinel ri u nimarisaxic u k'ij ri Rachoch ri Ajawaxel pa Jerusalen,

²⁸ xukuje' chi xuc'ut ri rutzil ranima' chwe chuwäch ri ajawinel xukuje' chquiwäch ri e ya'l tak u no'j xukuje' chquiwäch ri achijab ri sibalaj nimak na qui k'ij pa ri k'atbal tzij, chi xukuje' xuya' chajin anima' chwe, ruc' c'ut ri u to'banic xincuinic xebenmulij ri aj israelib ri sibalaj nimak na qui k'ij rech quetzelej junam wuc'.”